తక్కువ పిండితో ఎక్కువ బజ్జీలు.. చల్లని వాతావరణంలో జస్ట్ 10 నిమిషాల్లోనే వేడి వేడి ఆలూ బజ్జీలు..

వానలు కురుస్తున్నప్పుడు.. వాతావరణం చల్లగా ఉన్నప్పుడు సాయంత్రం వేళ వేడి వేడిగా ఏదైనా తినాలనిపిస్తుంది. అలాంటి హాట్ ఫుడ్‌లో ఆలూ బజ్జి ఒకటి.. చాలా సులభంగా, కేవలం ఐదు నుండి పది నిమిషాల్లో ఆలూ బజ్జీని ఎలా తయారుచేయాలో ఈ కథనంలో వివరంగా తెలుసుకుందాం. ముఖ్యంగా, తక్కువ పిండిని ఉపయోగించి ఎక్కువ క్రిస్పీ ఆలూ బజ్జీలను ఎలా చేయాలో ఈ రెసిపీలో తెలుసుకోవచ్చు. ఇది ఆకలిగా అనిపించినప్పుడు లేదా చల్లని వాతావరణంలో వేడివేడిగా ఏదైనా తినాలనిపించినప్పుడు సరైన స్నాక్.. ఆలూ బజ్జి.. కరకరలాడే ఆలూ బజ్జి తయారీ ఎలానో తెలుసుకుందాం..

బంగాళదుంపల తయారీ:

ముందుగా, గుండ్రంగా ఉండే బంగాళదుంపను ఎంచుకోండి. ఇలా గుండ్రంగా ఉంటే బజ్జీలు కూడా మంచి షేప్ లో వస్తాయి. బంగాళదుంపను పీల్ చేసి, సన్నగా గుండ్రని చక్రాల్లా కట్ చేయాలి. మీ దగ్గర చిప్స్ స్లైసర్ లేకపోతే, కత్తితో కూడా జాగ్రత్తగా సన్నగా కట్ చేయవచ్చు. ఇలా కట్ చేసిన ఆలూ చిప్స్ నల్లబడకుండా వెంటనే నీటిలో వేయాలి. నేను ఇక్కడ రెండు బంగాళదుంపలను ఉపయోగించాను. నీటిలో వేసిన తర్వాత, నీళ్లు తెల్లగా మారే వరకు ఒకటి లేదా రెండు సార్లు శుభ్రంగా కడగాలి. దీనివల్ల బంగాళదుంపలోని స్టార్చ్ తొలగిపోతుంది. శుభ్రం చేసిన ఆలూ చిప్స్ ను నీటిలోనే ఉంచి పక్కన పెట్టుకోండి. ఇలా చేయడం వలన ఆలూ త్వరగా నల్లబడదు.

పిండి తయారీ:

ఇప్పుడు పిండిని కలపడానికి ఒక బౌల్ లోకి ఒక కప్పు (సుమారు 100 గ్రాములు) శనగపిండిని తీసుకోండి. దీనికి ఒక టేబుల్ స్పూన్ బియ్యప్పిండిని కలపాలి. బియ్యప్పిండి కలపడం వల్ల ఆలూ బజ్జీలు ఎక్కువ సమయం క్రిస్పీగా ఉంటాయి. అలాగే, అర టీ స్పూన్ కారం, పావు టీ స్పూన్ పసుపు (మంచి రంగు కోసం, ఇది ఐచ్ఛికం), ఫ్రెష్ గా దంచిన అర టీ స్పూన్ అల్లం పేస్ట్ (రుచి కోసం), సన్నగా తరిగిన ఒక టేబుల్ స్పూన్ కొత్తిమీర ఆకు, అర టీ స్పూన్ వాము (కావాలంటే కొద్దిగా జీలకర్ర కూడా కలుపుకోవచ్చు) వేయాలి. రుచికి సరిపడా ఉప్పు, చిటికెడు వంటసోడాను కూడా కలిపి బాగా మిక్స్ చేయాలి. వంటసోడా వాడటం ఇష్టం లేకపోతే, ఒక టేబుల్ స్పూన్ వేడి ఆయిల్ ను వేసి కలుపుకోవచ్చు.

పిండి కలపడం:

మొదట పొడి పదార్థాలను కలిపిన తర్వాత, నీళ్లను కొద్దికొద్దిగా పోస్తూ పిండిని కలపాలి. మొదట పిండిని కొద్దిగా గట్టిగా కలిపి, ఆ తర్వాత కావలసినంత నీళ్లు పోస్తూ జారుడుగా కలపాలి. ఇలా చేస్తే పిండి ముద్దలు లేకుండా సులభంగా కలుపుకోవచ్చు. పిండి మరీ పల్చగా ఉండకూడదు, ఆలూ ముక్కలకు బాగా కోటింగ్ అయ్యేలా ఉండాలి. పిండి మరీ గట్టిగా ఉంటే ఎక్కువ బజ్జీలు చేయలేము, అలాగే ఆలూకు బాగా పట్టుకొని మిర్చి బజ్జీల్లా వస్తాయి. కాబట్టి, తక్కువ పిండితో ఎక్కువ ఆలూ బజ్జీలు చేయాలంటే పిండి సరైన విధంగా ఉండాలి.

బజ్జీలు వేయడం:

మరో పక్కన డీప్ ఫ్రై చేయడానికి సరిపడా నూనెను మీడియం వేడిలో వేడి చేయండి. నూనె సరైన వేడిలో ఉందో లేదో తెలుసుకోవడానికి, కొద్దిగా పిండి ముద్దను వేసి చూడండి. పిండి పైకి లేస్తే, నూనె సరైన వేడిలో ఉన్నట్లు. ఇప్పుడు ఆలూ చిప్స్ లోని నీటిని వంపేసి, ఒక్కో ఆలూ చిప్ ను పిండిలో బాగా ముంచి, ఎక్కువ పిండి ఉంటే గిన్నె అంచుకు రుద్ది తీసి, వేడి నూనెలో మెల్లగా వేయండి. ఇలా సరిపడా ఆలూ బజ్జీలను నూనెలో వేసి, మంటను మీడియం ఫ్లేమ్ లో ఉంచి, తిప్పుతూ బంగారు రంగు వచ్చేవరకు, క్రిస్పీగా మారేవరకు బాగా ఫ్రై చేయండి.

బజ్జీలు మంచి రంగులోకి మారి క్రిస్పీగా తయారైన తర్వాత, నూనెను దులుపుకుని తీసుకోండి. వీటిని టిష్యూ పేపర్ లోకి తీసుకోవచ్చు లేదా వేడివేడిగా అలాగే వడ్డించవచ్చు. అప్పటికప్పుడు వేగంగా స్నాక్ చేయాలనుకున్నా, చల్లని వాతావరణంలో వేడివేడిగా ఏదైనా తినాలనుకున్నా, ఈ ఆలూ బజ్జీలు ఐదు, పది నిమిషాల్లోనే తయారుచేసుకొని కరకరలాడే టేస్టీ స్నాక్ ను ఆస్వాదించవచ్చు. దీనికి కొంచెం కారం పొడి ఉంటే.. అద్దిరిపోతుంది.. ఇంకెందుకు ఆలస్యం మీరు కూడా ఆలూ బజ్జి తయారు చేసుకోండి..

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..