Weight Gain After Marriage: వివాహం తర్వాత అమ్మాయిలు బరువు ఎందుకు పెరుగుతారో తెలుసా?
వివాహం తర్వాత అమ్మాయిల జీవితంలో అనేక మార్పులు సంభవిస్తాయి. ముఖ్యంగా శారీరక మార్పులు చాలానే సంభవిస్తాయి. వివాహం తర్వాత బిడ్డలను జన్మనిచ్చిన తర్వాత మహిళల శరీర బరువు అకస్మాత్తుగా పెరుగుతుంది. పెళ్లి తర్వాత పార్టీలు, బంధువుల ఇళ్లలో పార్టీలు మొదలుకుని ప్రసవం, కుటుంబ బాధ్యతలు వరకు..
Updated on: May 27, 2025 | 9:34 PM
అమ్మాయిలు పుట్టినప్పటి నుంచి వృద్ధాప్యం వరకు వారి జీవితంలో వివిధ పాత్రలు పోషించాల్సి ఉంటుంది. అయితే అన్ని దశల్లో వారి శరీరక, మానసిక వ్యవస్థల్లో చెప్పలేనన్ని మార్పులు వస్తాయి. ముఖ్యంగా వివాహం తర్వాత అమ్మాయిల జీవితంలో అనేక మార్పులు సంభవిస్తాయి. ముఖ్యంగా శారీరక మార్పులు చాలానే సంభవిస్తాయి. వివాహం తర్వాత బిడ్డలను జన్మనిచ్చిన తర్వాత మహిళల శరీర బరువు అకస్మాత్తుగా పెరుగుతుంది. పెళ్లి తర్వాత పార్టీలు, బంధువుల ఇళ్లలో పార్టీలు మొదలుకుని ప్రసవం, కుటుంబ బాధ్యతలు వరకు ఆయా ప్రయాణాలలో ఎన్నో శారీరక మార్పులు వస్తాయి. అయితే బాధ్యతల్లో మునిగి వ్యాయామం, యోగా చేయలేకపోవడం వల్ల శరీర బరువు క్రమంగా పెరుగుతుంది. అయితే వివాహం తర్వాత బరువు పెరగకుండా ఉండాలనుకుంటే కొన్ని అలవాట్లను తప్పకుండా పాటించాలి. అవేంటంటే..
వివాహం తర్వాత బరువు పెరగకుండా ఉండాలంటే పాటించవల్సిన ఉపాయాలు
తక్కువ పరిమాణంలో తినాలి
వివాహం తర్వాత విందులు, పార్టీలు ఉంటాయి. ఈ పార్టీలలో అందరూ నూతన వధూవరులకు ఎంతో ప్రేమగా తినిపిస్తారు. ఇలా వివాహం తర్వాత అతిగా తినడం వల్ల ఆకస్మిక బరువు పెరగడానికి దారితీస్తుంది. కాబట్టి విందులో మితంగా ఆహారం తీసుకోవాలి.
ఆరోగ్యకరమైన ఆహార అలవాట్లు అనుసరించాలి
మీ ఆహారం మీ బరువును నేరుగా ప్రభావితం చేస్తుంది. కాబట్టి మీ ఆహారంపై శ్రద్ధ చూపడం చాలా ముఖ్యం. తాజా పండ్లు, కూరగాయలు వంటి ఆరోగ్యకరమైన ఆహారాన్ని తినాలి. ఇవి శరీరానికి అవసరమైన పోషణను అందించడమే కాకుండా బరువు తగ్గడానికి కూడా సహాయపడతాయి.
రోజూ వ్యాయామం చేయాలి
వివాహం తర్వాత చాలా మంది వ్యాయామం చేయకుండా ఉంటారు. బరువు పెరగడానికి ఇది కూడా ఒక కారణం. కాబట్టి ప్రతిరోజూ యోగాకు అరగంట కేటాయించుకుని జాగింగ్, నడక, సైక్లింగ్ మొదలైన కార్యకలాపాలు చేయాలి. ఇది కేలరీలను బర్న్ చేయడానికి, ఆరోగ్యంగా ఉంచడానికి సహాయపడుతుంది.
ఎక్కువ నీళ్లు తాగాలి
నీళ్లు తాగడం వల్ల శరీరాన్ని హైడ్రేటెడ్గా ఉంచడమే కాకుండా, జీవక్రియను పెంచుతుంది. ఇది ఆకలిని నియంత్రించడంలో సహాయపడుతుంది. ప్రతిరోజూ కనీసం 8-10 గ్లాసుల నీరు తాగాలి. అందువల్ల, రోజూ తగినంత నీరు తాగడం వల్ల శరీరం నుంచి వ్యర్థాలను బయటకు పంపడంలో సహాయపడుతుంది.
ఆరోగ్యకరమైన పానీయాలు తీసుకోవాలి
స్మూతీలు, మిల్క్ షేక్లకు బదులుగా తాజా పండ్ల రసం, చక్కెర లేని పండ్ల రసం, నిమ్మరసం తాగాలి. దీనితో పాటు, మీరు గ్రీన్ టీ తాగడం కూడా అలవాటు చేసుకోవాలి. ఇది బరువు తగ్గడానికి కూడా సహాయపడుతుంది.
ఒత్తిడిని తగ్గించుకోవాలి
పెళ్లి సమయంలో ప్రతిదీ సజావుగా జరగాలి కాబట్టి ఒత్తిడికి గురికావడం సహజం. కానీ ఈ ఒత్తిడి మీ మానసిక స్థితిని ప్రభావితం చేయడమే కాకుండా, మీ బరువుపై కూడా ప్రత్యక్ష ప్రభావాన్ని చూపుతుంది. ఒత్తిడి కార్టిసాల్ అనే హార్మోన్ను పెంచుతుంది. ఇది బరువు పెరగడానికి దారితీస్తుంది. కాబట్టి ఒత్తిడిని తగ్గించడానికి యోగా, ధ్యానం, శ్వాస వ్యాయామాలు క్రమం తప్పకుండా చేయాలి. పెళ్లి తర్వాత బరువు పెరగకుండా స్లిమ్గా, ఫిట్గా ఉండాలనుకుంటే మీరు ఖచ్చితంగా ఈ అలవాట్లను పాటించాలి.
మరిన్ని ఆరోగ్య కథనాల కోసం క్లిక్ చేయండి.
