Skincare Tips: కీరాను ఇలా ఉపయోగించారంటే.. వేసవిలో ఎదురయ్యే చర్మ సమస్యలకు అడ్డుకట్ట వేసినట్లే..!
వేసవికాలంలో చర్మ సమస్యలు అధికంగా ఉంటాయి. ఈ క్రమంలో చర్మం హైడ్రేట్గా లేకపోతే జీవం కోల్పోయి కళా విహీనమవుతుంది. అయితే వేసవిలో..
Updated on: Mar 06, 2023 | 9:50 AM
చాలా మంది తమ శరీరం డీహైడ్రేట్ కాకుండా జాగ్రత్తలు తీసుకుంటారు. అయితే శరీరం ఒక్కటే కాదు చర్మం కూడా డీ హైడ్రేట్ అవుతుంది. అందువల్ల ఆ సమస్య ఎదురు కాకుండా ముందుగానే జాగ్రత్తలు తీసుకోవాలి. లేకపోతే చర్మం పొడిబారిపోయి.. చర్మంపై దద్దుర్లు, దురద వంటి పలు చర్మ సంబంధిత సమస్యలు తలెత్తుతాయి. ముఖ్యంగా వేసవికాలంలో ఈ సమస్యలు అధికంగా ఉంటాయి. ఈ క్రమంలో చర్మం హైడ్రేట్గా లేకపోతే జీవం కోల్పోయి కళా విహీనమవుతుంది. అయితే వేసవిలో ఈ సమస్య నుంచి గట్టెక్కేందుకు ఒకే ఒక మాస్క్ చాలంటున్నారు చర్మ, ఆరోగ్య నిపుణులు. అదేమిటంటే కీరా దోస. కీరా అనేది ఆరోగ్యపరంగా అద్భుతమైన పదార్ధం.
కీరా విశేషమేమిటంటే.. ఇందులో 95 శాతం నీరే ఉంటుంది. అందుకే కీరా ఎక్కువగా సేవించడం ద్వారా శరీరాన్ని హైడ్రేట్గా ఉంచవచ్చని నిపుణులు అంటున్నారు. కీరా అనేది కేవలం ఆరోగ్యానికే కాదు చర్మ సంరక్షణకు కూడా అద్భుతంగా ఉపయోగడుతుందని చాలా తక్కువ మందికి తెలుసు. కీరాతో ఫేసియల్ చేయడం వర్ల చర్మం లోపలి నుంచి కూడా హైడ్రేట్ అవుతుంది. ఫలితంగా మీ చర్మం జీవం కోల్పోకుండా కళకళలాడుతుంటుంది. ఇంకా సూర్యుని తాపం, టాన్నింగ్ వంటి సమస్యల నుంచి ఉపశమనం పొందేందుకు కూడా కీరా ఉపయోగపడుతుంది. దీంతోపాటు కీరాలో పుష్కలంగా ఉండే యాంటీ ఏజీయింగ్ గుణాల కారణంగా వయస్సు పెరిగినా ఆ లక్షణాలు దూరంగా ఉంటాయి.
కీరా ఫేసియల్ మాస్క్ తయారీ విధానం:
కీరా ఫేసియల్ తయారు చేసేందుకు కీరా రసం, రోజ్ వాటర్, మినరల్ వాటర్ ఉంటే చాలు. ముందుగా ఒక కీరా దోసను తీసుకుని ముక్కలు చేసి మిక్సీలో వేసి రసం తీయాలి. ఈ రసంలో రోజ్ వాటర్, మినరల్ వాటర్ కలపాలి. అన్నింటిని బాగా కలపిన తర్వాత ఈ మిశ్రమాన్ని ఒక స్ప్రే బాటిల్లో వేసి స్టోర్ చేసుకోవాలి. ఇందులో ఒక స్పూన్ పుదీనా రసం కలిపితే ఇంకా బాగుంటుంది. రోజుకు 2 సార్లు ఈ మిశ్రమాన్ని ముఖంపై స్ప్రే చేసుకుని ఓ 20 నిమిషాలు అలా ఉంచాలి. ఆ తరువాత నీళ్లతో శుభ్రం చేసుకోవాలి. ఇలా చేయడం వల్ల చర్మం ఎప్పుడూ డీహైడ్రేట్ కాకుండా ఉంటుంది.
మరిన్ని హెల్త్ ఆర్టికల్స్ కోసం క్లిక్ చేయండి..
