చికెన్ vs మటన్.. మంచి ఆరోగ్యం కోసం ఏది తినాలి.. ఓర్నాయనో పెద్ద కథే ఉందిగా..

చికెన్, మటన్.. అంటే నాన్‌వెజ్ ప్రియులకు పండగే.. ఆదివారం వచ్చిందంటే చాలు.. ఇష్టంగా తింటారు.. ఈ ఒక్క రోజే కాదు.. ఏ రోజైనా తినేవారు చాలా మంది ఉంటారు. అయితే.. చికెన్, మటన్ (మేక మాంసం) రెండూ ప్రోటీన్ పుష్కలంగా ఉండే మాంసాహారాలు. అయితే, వాటి పోషక విలువలు, ఆరోగ్య ప్రభావాలు వేర్వేరుగా ఉంటాయని ఆరోగ్య నిపుణులు చెబుతున్నారు.. చికెన్, మటన్ (మేక మాంసం) రెండూ ప్రపంచవ్యాప్తంగా ప్రసిద్ధి చెందిన మాంసాహారాలు. అయితే, ఈ రెండింటిలో ఏది ఆరోగ్యానికి మంచిదనే చర్చ తరచుగా జరుగుతుంది. ఈ రెండు మాంసాలలోని పోషక విలువలను పోల్చి చూసి, మీ ఆరోగ్య అవసరాలకు అనుగుణంగా సరైన ఎంపిక చేసుకోవడం ఎలాగో తెలుసుకుందాం.. వండే విధానం కూడా పోషకాలపై ప్రభావం చూపుతుందని డైటీషియన్లు చెబుతున్నారు..

చికెన్.. మటన్.. ఏది మంచిది..?

క్యాలరీలు – బరువు నియంత్రణ:

బరువు తగ్గాలనుకునే వారికి క్యాలరీల లెక్క చాలా ముఖ్యం. 100 గ్రాముల వండిన చికెన్ బ్రెస్ట్‌లో సుమారు 165 క్యాలరీలు ఉంటాయి. దీనికి విరుద్ధంగా, 100 గ్రాముల మటన్‌లో 204 క్యాలరీలు ఉంటాయి. అంటే మటన్ కంటే చికెన్‌లో క్యాలరీలు తక్కువగా ఉంటాయి. మీరు బరువు తగ్గడానికి ప్రయత్నిస్తున్నట్లయితే, మటన్ స్థానంలో చికెన్ బ్రెస్ట్ ఎంచుకోవడం వల్ల వారానికి 273 క్యాలరీలను తగ్గించుకోవచ్చు.. ఇది దీర్ఘకాలంలో బరువు తగ్గడానికి సహాయపడుతుంది.

ప్రోటీన్ విలువలు:

ప్రోటీన్ కండరాల నిర్మాణానికి, కణజాలాల మరమ్మత్తుకు అత్యవసరం. 100 గ్రాముల చికెన్ బ్రెస్ట్‌లో 31 గ్రాముల ప్రోటీన్ ఉండగా, 100 గ్రాముల మటన్‌లో 28 గ్రాముల ప్రోటీన్ ఉంటుంది. ఈ రెండూ ప్రోటీన్‌కు మంచి వనరులే అయినప్పటికీ, చికెన్‌లో కొద్దిగా ఎక్కువ ప్రోటీన్ ఉంటుంది. ప్రతి కిలో శరీర బరువుకు 0.8 గ్రాముల ప్రోటీన్ అవసరం. ఉదాహరణకు, 80 కిలోల బరువున్న వ్యక్తికి రోజుకు 64 గ్రాముల ప్రోటీన్ అవసరం. ఈ గణన ఆధారంగా మీ శరీరానికి ఎంత ప్రోటీన్ కావాలో అంచనా వేసుకోవచ్చు.

కొవ్వు పదార్థాలు (ఫ్యాట్):

శరీరానికి కొవ్వు కూడా అవసరమే, కానీ ఆరోగ్యకరమైన కొవ్వును ఎంచుకోవడం ముఖ్యం. 100 గ్రాముల మటన్‌లో 9 గ్రాముల కొవ్వు, అందులో 3 గ్రాముల సంతృప్త కొవ్వు (సాచురేటెడ్ ఫ్యాట్) ఉంటుంది. అదే 100 గ్రాముల చికెన్ బ్రెస్ట్‌లో 3.6 గ్రాముల కొవ్వు, కేవలం 1 గ్రాము సంతృప్త కొవ్వు మాత్రమే ఉంటుంది. సంతృప్త కొవ్వు అధికంగా ఉంటే గుండె జబ్బుల ప్రమాదం పెరుగుతుంది, ఎందుకంటే ఇది రక్తనాళాల్లో అడ్డంకులను సృష్టించవచ్చు. కాబట్టి, కొవ్వును పరిమితం చేయాలనుకునేవారికి, చికెన్ బ్రెస్ట్ మెరుగైన ఎంపిక. మొత్తం క్యాలరీలలో 10% మించకుండా సంతృప్త కొవ్వును తీసుకోవాలని నిపుణులు సూచిస్తారు.

కార్బోహైడ్రేట్లు:

చికెన్, మటన్ రెండింటిలోనూ కార్బోహైడ్రేట్లు ఉండవు. కార్బోహైడ్రేట్లు తక్షణ శక్తిని అందిస్తాయి. బరువు తగ్గాలనుకునేవారు కార్బోహైడ్రేట్లను తగ్గించి, ప్రోటీన్ తీసుకోవడం పెంచుకుంటే ప్రయోజనకరంగా ఉంటుంది.

విటమిన్లు:

విటమిన్లు సూక్ష్మ పోషకాలు, శరీరానికి తక్కువ స్థాయిలో అవసరం. చికెన్, మటన్ రెండింటిలోనూ పెద్దగా విటమిన్లు లేనప్పటికీ, కొన్ని తేడాలు ఉన్నాయి. చికెన్‌లో కోలిన్, విటమిన్ బి, విటమిన్ ఏ ఎక్కువగా ఉంటాయి. మటన్‌లో ఫోలేట్ (గర్భధారణ సమయంలో అవసరం).. విటమిన్ బి ఎక్కువగా ఉంటాయి. మీ విటమిన్ అవసరాలకు అనుగుణంగా ఎంపిక చేసుకోవచ్చు.

ఖనిజాలు (మినరల్స్):

ఖనిజాలు కూడా శరీరానికి అవసరం. రెండింటిలోనూ పొటాషియం, భాస్వరం, మెగ్నీషియం, ఇనుము, జింక్ వంటి ఖనిజాలు ఉంటాయి. అయితే, మటన్‌లో జింక్ చికెన్ కంటే దాదాపు ఐదు రెట్లు అధికంగా ఉంటుంది. గాయాలు త్వరగా మానడానికి జింక్ సహాయపడుతుంది. జింక్ అవసరం ఉన్నవారు మటన్‌ను ఎంచుకోవచ్చు.

అవసరాలను బట్టి ఎంచుకోవడం బెటర్..

చికెన్, మటన్ రెండూ వాటి స్వంత పోషక ప్రయోజనాలను కలిగి ఉంటాయి. మీ వ్యక్తిగత ఆరోగ్య లక్ష్యాలు, ఆహార ప్రాధాన్యతలు, శారీరక అవసరాలను బట్టి ఏది ఎంచుకోవాలో నిర్ణయించుకోవాలి. మాంసాన్ని వండే విధానం కూడా దాని పోషక విలువలపై గణనీయమైన ప్రభావాన్ని చూపుతుందని డైటీషియన్లు చెబుతున్నారు. అయితే.. ఏమైనా అనారోగ్య సమస్యలతో బాధపడుతున్నవారు.. చికెన్, మటన్ డైట్ లో అనుసరించే మందు వైద్య నిపుణులను సంప్రదించడం మంచిది..