దారుణం: 11 నెమళ్లకు విషం పెట్టి చంపిన  రైతు.. ఎందుకో తెలిస్తే ఆశ్చర్యపోతారు.?

ఒకవైపు యావత్ ప్రపంచాన్ని కరోనా వైరస్ పట్టి పీడిస్తుంటే.. మరోవైపు మనుషుల్లో మానవత్వం చచ్చిపోయి.. క్రూరత్వం పెరిగిపోతోంది. ఏనుగులు, కుక్కలు, కోతులు.. ఇలా అన్నింటిని అతి దారుణంగా చంపుతున్నారు. క్రూర మృగాలు కూడా మనుషులను చంపనంత కిరాతకంగా ఏ పాపం తెలియని ఈ మూగ జీవాలను తినే పదార్ధాలలో బాంబులు, టపాసులు పెట్టి మరీ వాటి ప్రాణాలను తీస్తున్నారు. ఇక తాజాగా తన స్వార్ధం కోసం 11 నెమళ్లకు విషం పెట్టి చంపాడు ఓ రైతు. ఎందుకు అని ఆరా తీస్తే.. తన పంటపొలాన్ని రక్షించుకోవడం కోసం ఇలా చేశానని చెప్పుకొచ్చాడు.

వివరాల్లోకి వెళ్తే.. తిరుపూర్ జిల్లా తారాపురం సమీపంలోని పుత్తూర్ ప్రాంతంలో రైతులు తమ వ్యవసాయ పొలంలో కూరగాయలు, పండ్లు సాగు చేస్తుంటారు. అయితే ఆ పక్కనే ఉన్న సమీప ప్రాంతం నుంచి తరుచుగా నెమళ్లు వచ్చి ఈ పొలాల్ని ధ్వంసం చేస్తుంటాయి. దీనిపై పలువురు రైతులు అటవీశాఖ అధికారులకు కూడా ఫిర్యాదు చేశారు. ఈ క్రమంలోనే సోమవారం ఉదయం ఓ రైతు పొలంలో 11 నెమళ్లు మృతి చెంది ఉండటం గుర్తించిన స్థానిక రైతులు వెంటనే అటవీశాఖ, వ్యవసాయశాఖ అధికారులకు సమాచారం అందించారు. వారు ఘటనాస్థలానికి చేరుకొని విచారణ చేపట్టగా.. శామలైప్పాన్ అనే రైతు ఈ ఘాతకానికి ఒడిగిట్టినట్లు తేలింది. తన పంటను రోజూ వచ్చి ఆ నెమళ్లు నాశనం చేస్తుండటంతో.. వాటికి ముడి బియ్యంలో విషం కలిపి పెట్టానని శామలైప్పాన్ నిజాన్ని ఒప్పుకున్నాడు. దీనితో పోలీసులు అతడిపై వైల్డ్ లైఫ్ ప్రొటెక్షన్ యాక్ట్ సెక్షన్ 9, 51 కింద కేసు నమోదు చేసి అదుపులోకి తీసుకున్నారు.