గోదావరిలో పులస.. పులికాట్‌లో రొయ్య.. ఒక్కసారి తింటే వదిలిపెట్టరు..

కొన్ని ప్రాంతాల్లో మాత్రమే లభించే సీ ఫుడ్‌కు ప్రత్యేకమైన క్రేజ్ ఉంటుంది. గోదావరి జిల్లాల్లో దొరికే పులస ఇందుకు మంచి ఉదాహరణ. సముద్రం నుంచి నదిలోకి వచ్చిన తర్వాత ఇలసగా, పులసగా మారే ఈ చేపకు ఉండే ప్రత్యేక రుచి కారణంగా భారీ డిమాండ్ ఏర్పడింది. రాష్ట్రం నలుమూలల నుంచే కాదు.. ఇతర ప్రాంతాల నుంచి కూడా పులసను తెప్పించుకుని తినేవారు ఉన్నారు.

ఇదే తరహాలో ఉమ్మడి నెల్లూరు జిల్లాలోని పులికాట్ సరస్సులో లభించే రొయ్యలకు కూడా ప్రత్యేక గుర్తింపు ఉంది. పులికాట్ రొయ్యలను ఒక్కసారి రుచి చూసిన వారు.. మళ్లీ వాటి కోసం వెతుకుతారని స్థానికులు చెబుతున్నారు. అసలు ఈ రొయ్యల్లో అంత ప్రత్యేకత ఏమిటి? సముద్రంలో దొరికే ఇతర రొయ్యలకు భిన్నంగా వీటికి ఎందుకు ఇంత డిమాండ్?

సముద్రం నుంచి సరస్సులోకి..

పులికాట్ సరస్సు సముద్రానికి అనుసంధానమై ఉండటంతో బ్యాక్‌వాటర్‌ ద్వారా సముద్రపు ఉప్పునీరు సరస్సులోకి వస్తుంది. అదే సమయంలో సమీపంలోని చిన్న చిన్న నదులు, వాగుల ద్వారా తియ్యటి నీరు కూడా సరస్సులోకి చేరుతుంది. ఇలా ఉప్పునీరు, తియ్యటి నీరు కలిసే ప్రత్యేకమైన నీటి వాతావరణంలో పులికాట్ రొయ్యలు సహజసిద్ధంగా పెరుగుతాయి. సరస్సు మధ్యలో ఉన్న లంక గ్రామాల చుట్టూ నాలుగు వైపులా ఉప్పునీరు ఉన్నప్పటికీ.. అక్కడి భూగర్భ జలాలు మాత్రం తియ్యగా ఉంటాయని స్థానికులు చెబుతున్నారు. ఈ ఉప్పునీరు, తియ్యటి నీటి కలయికతో ఏర్పడే ప్రత్యేకమైన లవణీయత.. పులికాట్ సరస్సులోని జీవావరణంపై ప్రభావం చూపుతుందని వారు అంటున్నారు.

ఎలాంటి సాగు లేకుండానే..

సాధారణంగా రొయ్యల సాగు చేపట్టేటప్పుడు వ్యాధుల నియంత్రణ కోసం వివిధ రకాల మందులు, రసాయనాలు ఉపయోగిస్తారు. వాటి పెరుగుదల కోసం ప్రత్యేకంగా ఫీడ్ అందిస్తారు. ఫీడ్ ధరలు పెరగడంతో సాగు ఖర్చులు కూడా భారీగా పెరుగుతున్నాయి. అయితే పులికాట్ సరస్సులో లభించే రొయ్యలకు ప్రత్యేకంగా సాగు చేయాల్సిన అవసరం ఉండదు. సరస్సులో సహజంగా లభించే ఆహారాన్ని తింటూ అవి పెరుగుతాయి. వానపాములు, ఇతర జలచరాలు వంటి సహజ ఆహారం సరస్సులో లభిస్తుండటంతో చేపలు, రొయ్యలు సహజసిద్ధంగా పెరుగుతాయని స్థానికులు చెబుతున్నారు. అందుకే సాగు రొయ్యలతో పోలిస్తే పులికాట్ రొయ్యలకు ప్రత్యేకమైన రుచి ఉంటుందని వారి అభిప్రాయం.

రుచే.. అసలు డిమాండ్!

పులికాట్ రొయ్యలకు ఉన్న ప్రత్యేక రుచికి అక్కడి నీరు, వాతావరణం, సహజసిద్ధమైన పెరుగుదలే కారణమని స్థానికులు చెబుతున్నారు. ఎలాంటి ప్రత్యేక పెంపకం లేకుండా.. సహజంగా పెరిగే రొయ్యలు కావడం.. వాటికి ప్రత్యేకమైన రుచి ఉండటం.. ఈ రెండే వీటికి భారీ డిమాండ్‌ తీసుకొస్తున్నాయని అంటున్నారు. పులికాట్ పరిసర ప్రాంతాల్లో లభించే ఈ రొయ్యలు స్థానిక మార్కెట్‌కే పరిమితం కాకుండా చుట్టుపక్కల జిల్లాలు, ఇతర ప్రాంతాలకు కూడా తరలిపోతున్నాయి.

పట్టిన రొయ్యలు.. అదే రోజు మార్కెట్‌కు!

పులికాట్ రొయ్యల మరో ప్రత్యేకత వాటి తాజాదనం. సాధారణంగా సాగు రొయ్యలను పట్టిన తర్వాత ఐస్‌లో ఉంచి నిల్వ చేసి మార్కెట్‌కు తరలిస్తారు. కానీ పులికాట్‌లో పట్టే రొయ్యలను మాత్రం రోజూ పట్టిన రొయ్యలను అదే రోజు మార్కెట్‌కు తీసుకొస్తారని వ్యాపారులు చెబుతున్నారు. అక్కడి నుంచి వ్యాపారులు వాటిని ఇతర ప్రాంతాలకు తరలిస్తారు. దీంతో వినియోగదారులకు తాజాగా పట్టిన రొయ్యలు అందుతున్నాయి.

పులసకు ఏమాత్రం తీసిపోని క్రేజ్..

గోదావరి పులసకు ఉన్న ప్రత్యేకమైన గుర్తింపు తరహాలోనే పులికాట్ రొయ్యలు కూడా స్థానిక సీ ఫుడ్‌లో ప్రత్యేక స్థానాన్ని సంపాదించుకున్నాయి. పులికాట్ రొయ్యల రుచి గురించి తెలిసిన వారు.. ప్రత్యేకంగా ఇక్కడి నుంచి వాటిని కొనుగోలు చేసి తీసుకెళ్లి తినడానికి ఆసక్తి చూపుతున్నారు. కొత్తగా వీటి గురించి తెలిసిన వారికీ స్థానికులు వీటి ప్రత్యేకతను చెబుతున్నారు. సహజసిద్ధంగా పెరగడం.. ప్రత్యేకమైన నీటి వాతావరణం.. తాజాగా మార్కెట్‌కు చేరడం.. అన్నింటికంటే ప్రత్యేకమైన రుచి ఉండటం..ఇవే పులికాట్ రొయ్యలకు ప్రత్యేక గుర్తింపు, భారీ డిమాండ్‌కు ప్రధాన కారణాలుగా స్థానికులు చెబుతున్నారు. గోదావరిలో పులసకు ఉన్న క్రేజ్.. పులికాట్‌లో రొయ్యలకు!