Nagula Chavithi 2026: నాగుల చవితి ఎప్పుడు? పూజా ముహూర్తం, విధానం తెలుసుకోండి!

Nagula Chavithi Puja Muhurat, Rituals and Significance: హిందూ సంప్రదాయంలో నాగ దేవతల ఆరాధనకు ఎంతో విశిష్టమైన స్థానం ఉంది. ముఖ్యంగా నాగుల చవితి పండుగను తెలుగు రాష్ట్రాలతోపాటు దక్షిణాది రాష్ట్రాల్లో ప్రాంతాల్లో భక్తిశ్రద్ధలతో జరుపుకుంటారు. ఈ రోజున వివాహిత మహిళలు తమ పిల్లల ఆయురారోగ్యాలు, క్షేమం, దీర్ఘాయుష్షు కోసం నాగ దేవతలను పూజిస్తారు. కుటుంబానికి సుఖసంతోషాలు, సర్పదోషాల నుంచి రక్షణ కలగాలని ప్రార్థిస్తారు. 2026లో నాగుల చవితి పండుగను నవంబర్ 13, శుక్రవారం జరుపుకోనున్నారు.

నాగుల చవితి 2026 తేదీ, పూజా ముహూర్తం

కార్తీక మాసంలో దీపావళి అమావాస్య తర్వాత వచ్చే చవితి తిథిని నాగుల చవితిగా జరుపుకుంటారు. హిందూ పంచాంగం ప్రకారం 2026 నవంబర్ 13న నాగుల చవితి పూజకు శుభ ముహూర్తం ఉదయం 11:01 గంటల నుంచి మధ్యాహ్నం 1:10 గంటల వరకు ఉంది. ఈ సమయంలో భక్తులు నాగ దేవతలకు పూజలు నిర్వహించవచ్చు.

• నాగుల చవితి: నవంబర్ 13, శుక్రవారం
• పూజా ముహూర్తం: ఉదయం 11:01 నుంచి మధ్యాహ్నం 1:10 వరకు
• ముహూర్తం వ్యవధి: 2 గంటల 9 నిమిషాలు
• చవితి తిథి ప్రారంభం: నవంబర్ 12 సాయంత్రం 6:09 గంటలకు
• చవితి తిథి ముగింపు: నవంబర్ 13 రాత్రి 8:42 గంటలకు

నాగుల చవితి ఎందుకు జరుపుకుంటారు?

హిందూ పురాణాలు, సంప్రదాయాల్లో నాగ దేవతలకు ప్రత్యేకమైన ప్రాధాన్యత ఉంది. ఆదిశేషుడు, వాసుకి వంటి సర్పరాజులను దైవ స్వరూపాలుగా కొలుస్తారు. ప్రకృతిలో పాములకు ఉన్న ప్రాముఖ్యతను గుర్తుచేస్తూ వాటిని పవిత్ర జీవులుగా భావించి పూజిస్తారు. నాగుల చవితి రోజున మహిళలు ప్రత్యేకంగా ఉపవాసం ఉండి నాగ దేవతలను ఆరాధిస్తారు. తమ పిల్లలకు ఎలాంటి ఆపదలు కలగకుండా చూడాలని, వారు ఆరోగ్యంగా, సంతోషంగా, దీర్ఘాయుష్షుతో జీవించాలని ప్రార్థిస్తారు. కుటుంబ సౌభాగ్యం కోసం కూడా ఈ పూజలు నిర్వహిస్తారు.

నాగుల చవితి పూజా విధానం

నాగుల చవితి రోజున భక్తులు తెల్లవారుజామునే నిద్రలేచి తలస్నానం చేసి పూజకు సిద్ధమవుతారు. అనంతరం నాగుల పుట్ట వద్దకు లేదా నాగ దేవతల ఆలయాలకు వెళ్లి పూజలు చేస్తారు. పసుపు, కుంకుమ, పూలు సమర్పించి పాలు, పండ్లు, నైవేద్యాలు సమర్పిస్తారు. భక్తిశ్రద్ధలతో నాగ దేవతలను ప్రార్థించి కుటుంబ క్షేమం కోసం మొక్కుకుంటారు. కొన్ని ప్రాంతాల్లో పుట్టలోని నాగులను ప్రత్యక్షంగా పూజించే సంప్రదాయం ఉంది. అయితే పాములకు ఎలాంటి హాని కలగకుండా జాగ్రత్తలు తీసుకోవాలి. పాములను పట్టుకోవడం, ఇబ్బంది పెట్టడం చేయకూడదు. ఆలయాల్లో లేదా సురక్షితమైన పూజా ప్రదేశాల్లో ఆరాధించడం మంచిది.

పూజించే నాగ దేవతలు ఎవరు?

నాగుల చవితి సందర్భంగా సంప్రదాయంగా అనేక నాగ దేవతలను ఆరాధిస్తారు. వారిలో అనంతుడు, వాసుకి, శేషుడు, పద్ముడు, కంబళుడు, కర్కోటకుడు, అశ్వతరుడు, ధృతరాష్ట్రుడు, శంఖపాలుడు, కాళీయుడు, తక్షకుడు, పింగళుడు ముఖ్యులు. వీరి నామాలను స్మరిస్తూ పూజలు నిర్వహిస్తారు.

నాగుల చవితి మంత్రాలు

ఈ రోజున నాగ దేవతలను స్మరిస్తూ సంప్రదాయ మంత్రాలను పఠిస్తారు.

నాగ దేవతల ప్రార్థనా మంత్రం:

సర్వే నాగాః ప్రీయంతాం మే యే కేచిత్ పృథ్వీతలే। యే చ హేలిమరీచిస్థా యేఽంతరే దివి సంస్థితాః॥

నాగ దేవతల నామ స్మరణ:

ఏతాని నవ నామాని నాగానాం చ మహాత్మనామ్ | సాయంకాలే పఠేన్నిత్యం ప్రాతఃకాలే విశేషతః ||

ఈ మంత్రాలను భక్తితో పఠిస్తూ నాగ దేవతల అనుగ్రహం కోసం ప్రార్థిస్తారు.

నాగుల చవితి విశిష్టత

నాగుల చవితి కేవలం ఒక పండుగ మాత్రమే కాదు. ప్రకృతిలోని ప్రతి జీవిని గౌరవించాలనే సందేశాన్ని కూడా అందిస్తుంది. నాగ దేవతలను పూజించడం ద్వారా కుటుంబ రక్షణ, పిల్లల ఆరోగ్యం, ఆయురారోగ్యాలు కలగాలని భక్తులు కోరుకుంటారు. ముఖ్యంగా కార్తీక మాసంలో వచ్చే ఈ పర్వదినాన్ని భక్తిశ్రద్ధలతో జరుపుకోవడం దక్షిణ భారతదేశంలో తరతరాలుగా వస్తున్న సంప్రదాయం.

(Disclaimer: ఈ కథనంలోని ఆధ్యాత్మిక అంశాలు, పూజా సమయాలు, హిందూ సంప్రదాయాలు, విశ్వాసాల ఆధారంగా అందించబడ్డాయి. ప్రాంతాలను బట్టి పూజా సమయాల్లో మార్పులు ఉండవచ్చు.)

మరిన్ని ఆసక్తికర ఆధ్యాత్మిక వార్తల కోసం ఇక్కడ క్లిక్ చేయండి.