16 ఓవర్లు.. 180 పరుగులు.. టీ20 చరిత్రలోనే చెత్త రికార్డులో టీమిండియా తోపు..!

IND vs NZ T20I: న్యూజిలాండ్‌తో ఐదు టీ20ల సిరీస్‌ను భారత్ 3-2తో సొంతం చేసుకుంది. అయితే భారత సీనియర్ పేసర్ భువనేశ్వర్ కుమార్ (Bhuvneshwar Kumar) మాత్రం ఈ సిరీస్‌ను నిరాశతో ముగించాడు. నాలుగేళ్ల విరామం తర్వాత అంతర్జాతీయ టీ20ల్లోకి తిరిగి వచ్చిన భువీ.. ఆశించిన స్థాయిలో రాణించలేకపోయాడు.

నాలుగు మ్యాచ్‌లు ఆడిన భువనేశ్వర్ కేవలం ఒక్క వికెట్ మాత్రమే తీసుకున్నాడు. 16 ఓవర్లు బౌలింగ్ చేసి ఏకంగా 180 పరుగులు సమర్పించుకున్నాడు. అతడి ఎకానమీ 11.25గా నమోదైంది. ముఖ్యంగా అతడి బౌలింగ్ సగటు ఏకంగా 180.00గా ఉండటం ఆందోళన కలిగించే విషయం.

ఇది టీ20 అంతర్జాతీయ సిరీస్‌లో ఏ బౌలర్‌కైనా నమోదైన అత్యంత చెత్త సగటుగా నిలిచింది. ఇంతకుముందు ఈ రికార్డు న్యూజిలాండ్ పేసర్ కైల్ జేమీసన్ (Kyle Jamieson) పేరిట ఉంది. 2021లో ఆస్ట్రేలియాతో జరిగిన సిరీస్‌లో జేమీసన్ 175.00 సగటుతో బౌలింగ్ చేశాడు. ఇప్పుడు భువనేశ్వర్ ఆ రికార్డును అధిగమించాడు.

తొలి మ్యాచ్‌లోనే భారీగా పరుగులు..

సిరీస్‌లో తొలి టీ20లో భువనేశ్వర్ నాలుగు ఓవర్లలో 49 పరుగులు ఇచ్చి ఒక్క వికెట్ కూడా తీయలేదు. ఇది అతడి కెరీర్‌లోనే అత్యంత ఖరీదైన ప్రదర్శనల్లో ఒకటిగా నిలిచింది.

రెండో టీ20లో ఒక్క వికెట్ తీసుకున్నప్పటికీ పరిస్థితి మెరుగుపడలేదు. నాలుగు ఓవర్లలో 50 పరుగులు సమర్పించుకున్నాడు. ఈ మ్యాచ్‌లో తీసుకున్న వికెట్‌నే మొత్తం సిరీస్‌లో అతడికి దక్కిన ఏకైక వికెట్.

మూడో టీ20లోనూ భువీకి భారీ దెబ్బే తగిలింది. నాలుగు ఓవర్లలో 40 పరుగులు ఇచ్చాడు. దీంతో నాలుగో మ్యాచ్‌లో అతడిని తుది జట్టు నుంచి తప్పించారు.

అయితే చివరి టీ20లో మరోసారి అవకాశం లభించింది. ఈ మ్యాచ్‌లోనూ భువనేశ్వర్ తన ప్రభావం చూపలేకపోయాడు. నాలుగు ఓవర్లలో 41 పరుగులు ఇచ్చాడు. దీంతో మొత్తం సిరీస్‌లో అతడి గణాంకాలు 1/180గా మారాయి.

న్యూజిలాండ్‌లో మరింత దిగజారిన రికార్డు..

ఈ సిరీస్‌కు ముందు న్యూజిలాండ్‌లో భువనేశ్వర్ ఐదు టీ20లు ఆడాడు. 19 ఓవర్లలో 160 పరుగులు ఇచ్చి నాలుగు వికెట్లు మాత్రమే తీసుకున్నాడు. అక్కడ అతడి ఎకానమీ 8.40గా ఉంది. ఏ దేశంలోనూ లేనంత ఎక్కువ ఎకానమీ న్యూజిలాండ్‌లోనే ఉండటం గమనార్హం.

అప్పటివరకు న్యూజిలాండ్‌లో భువీ బౌలింగ్ సగటు 40.00గా ఉండేది. ఈ సిరీస్ తర్వాత అది ఏకంగా 68కి పెరిగింది. స్ట్రైక్‌రేట్ కూడా 42కి చేరింది. న్యూజిలాండ్‌తో జరిగిన ఈ సిరీస్ భువనేశ్వర్ అంతర్జాతీయ పునరాగమనంపై తీవ్ర ప్రశ్నలు రేకెత్తించేలా చేసింది.

మరిన్ని క్రీడా వార్తల కోసం ఇక్కడ క్లిక్ చేయండి..