రూ. 8 కోట్ల కుక్క కిడ్నాప్..పట్టిస్తే రూ. 1 లక్ష గిఫ్ట్

కుక్క ఖరీదు రూ 8 కోట్లు అంటే నమ్ముతారా..?. అందులో ఒక్క కోటి ఇస్తే చాలు లైఫ్ లాంగ్ బ్రతికేస్తాం, కుక్కను అంత రేటు పెట్టి కొనాలా భయ్యా అంటారు చాలామంది. కానీ ఎవరి లవ్ వాళ్లది. కొంతమంది పెట్స్‌ని ప్రాణంగా భావిస్తుంటారు. కొన్ని రకాల రేర్ బ్రీడ్‌లను ఇష్టంగా పెంచుకుంటూ ఉంటారు. అలాగే అలస్కన్ మలముటే అనే బ్రీడ్‌లో పుట్టిన కుక్క ఖరీదు రూ. 8 కోట్లు వరకూ ఉంటుందని సమాచారం. ఈ జాతి కుక్కలు భారత్‌లో మూడే ఉన్నాయి. అందులో ఒకదాన్ని బెంగుళూరులోని శ్రీనగర్‌లో నివశిస్తోన్న సతీశ్ అనే వ్యక్తి ఎంతో ప్రేమగా పెంచుకుంటున్నాడు. అయితే ఇటీవల ఆ కుక్క కిడ్నాప్ అవ్వడంతో అతడు తెగ హైరనా పడిపోతున్నాడు.

చుట్టుపక్కల ప్రాంతాలన్నీ గాలించిన అనంతరం తను పెంచుకుంటున్న రేర్ బ్రీడ్ కుక్క కిడ్నాపయ్యిందని నగరంలోని హనుమంతనగర పోలీసులకు ఫిర్యాదు చేశాడు. కుక్క ఫోటోలను..పాంప్లెట్స్‌లో ముద్రించి నగరంతా పంచుతున్నాడు. దాని ఆచూకి తెలపినవారికి రూ 1 లక్ష బహుమానం కూడా ప్రకటించాడు.  అలస్కన్ మలముటే బ్రీడ్  చైనాలో మాత్రమే ఉంటుంది. ఎరుపు, తెలుపు రంగుల మిక్స్ంగ్ కలర్‌లో దీని లుక్ ఉంటుంది.  సతీష్ మూడేళ్ల క్రితం  రూ. 3 కోట్లు చెల్లించి  ఈ కుక్కను కొనుగోలు చేశాడు. అప్పట్నుంచి ఆ పెట్‌ డాగ్‌ను ప్రాణంగా చూసుకుంటున్నాడు.