హైదరాబాద్ : టెకీ మిస్సింగ్ మిస్టరీ.. 9 రోజులైనా జాడే లేదు!

హైదరాబాద్ ఆపిల్ ఇండియా ఉద్యోగి అయిన 34 ఏళ్ల రోహిత 2019 డిసెంబర్ 26 నుంచి కనిపించకుండాపోయింది. పోలీసుల దర్యాప్తు అంతంతమాత్రంగా ఉండటంతో, ఆమె ఆచూకీ కనుగొనడంలో కుటుంబసభ్యులు ప్రజల సహాయం తీసుకుంటున్నారు. ఆ రోజు మధ్యాహ్నం 3:15 గంటలకు సైబరాబాద్ పోలీసు పరిధిలోని గచ్చిబౌలి వద్ద విప్రో సర్కిల్ సమీపంలో ఆమె ఆటో రిక్షాలో ఎక్కింది. ఆమె అదృశ్యం అయి నేటికీ తొమ్మిది రోజులు.

రోహిత తన ఇద్దరు మిత్రులతో కలిసి సెలెస్టా అపార్ట్‌మెంట్లో నివసిస్తున్నది. రోహిత సోదరుడు పరీక్షిత్ మాట్లాడుతూ.. తన సోదరి ఆచూకీ కనుగొనడంలో పోలీసులు తమ వంతు కృషి చేస్తున్నారని చెప్పారు. సిసిటివి ఫుటేజ్ పరిశీలించగా ఆమె తన అపార్ట్ మెంట్ భవనం ముందు ఆటోలో వెళ్లడం చూపిస్తుంది. ఆ తరువాత ఆమె ఎక్కడికి వెళ్ళారనే దానిపై స్పష్టత లేదు. రోహిత తన ఫోన్‌ను అపార్ట్‌మెంట్‌లోనే ఉంచడంతో, ఆమెను ట్రేస్ చెయ్యడం పోలీసులకు సాధ్యం కావడంలేదు.

డిసెంబర్ 26 న రోహిత తప్పిపోయినప్పటికీ, ఆమె కుటుంబ సభ్యులు డిసెంబర్ 29 న పోలీసులకు ఫిర్యాదు చేశారు. “ఆమె చివరిసారిగా డిసెంబర్ 24 న మాతో మాట్లాడింది” అని సోదరుడు పరీక్షిత్ తెలిపారు. రోహిత ఆచూకీని గుర్తించడానికి పోలీసులు రెండు బృందాలుగా ఏర్పడి గాలింపు ముమ్మరం చేశారని గచ్చిబౌలి పోలీస్ స్టేషన్ ఇన్స్‌పెక్టర్ సురేందర్ రెడ్డి తెలిపారు. ఆమె ఆచూకీ గురించి ఎవరికైనా వివరాలు తెలిస్తే, ఈ నంబర్ కు 9032422274 సంప్రదించండని పరీక్షిత్ తెలిపాడు.