బ్రహ్మాజీ తన ట్విట్టర్ అకౌంట్ అందుకే డిలీట్ చేశాడా…

Actor Brahmaji :హైదరాబాద్‌లో జోరుగా కురుస్తున్న వర్షాలకు తన ఇల్లు నీటిలో మునిగిపోయిందని టాలీవుడ్ న‌టుడు బ్ర‌హ్మాజీ తన ట్విట‌ర్‌లో పోస్ట్ చేసిన సంగ‌తి తెలిసిందే. వ‌ర‌ద నీటిలో త‌న ఇల్లు ఉన్న ఫొటోల‌తోపాటు… చిన్న సెటైర్‌ను కూడా బ్రహ్మాజీ జత చేశారు. అందులో.. తాను బోటు కొనాల‌నుకుంటున్నాన‌ని స‌ర‌దాగా కామెంట్ పెట్ట‌డంతో.. బ్ర‌హ్మాజీ వ్యాఖ్య‌ల‌పై కొంత‌మంది నెటిజ‌న్లు అభ్యంత‌రం వ్య‌క్తం చేస్తూ.. కామెంట్స్ పెట్టారు. దీంతో ముందుగా ఆ ఫోటోలను డిలీట్ చేశాడు. అయితే నెటిజన్ల కామెంట్స్ పెరిగిపోతుంటంతో త‌న ట్విట‌ర్ అకౌంట్ ను డిలీట్ చేశాడు బ్ర‌హ్మాజీ. ట్విట‌ర్ ఖాతాను తొల‌గించడానికి గ‌ల కార‌ణాన్ని కూడా బ్రహ్మాజీ వివ‌రించాడు.

’నేను, నా కుమారుడు ఆ స‌మ‌యంలో బ‌య‌టి నుంచి ఇంటికి ద‌గ్గ‌ర‌గా వ‌చ్చాం. చాలా వ‌ర‌ద నీరు ఇంటిని చుట్టుముట్టింది. వ‌ర‌ద ఉధృతి కూడా ఎక్కువే ఉంది. నా ఇంటి ద‌గ్గ‌ర‌కు కారు వెళ్లే ప‌రిస్థితి లేదు. దీంతో స‌మీపంలోని కాల‌నీ వాసుల‌ను అడిగి కారు అక్క‌డే పార్కు చేశాను. నేను నా భార్య ఇంటికి న‌డుచుకుంటూ వెళ్లాల‌ని నిర్ణ‌యించుకున్నాం. అయితే వ‌ర‌ద ఎక్కువ‌గా ఉండ‌టంతో.. కొంత‌ మంది స్థానికులు వ‌చ్చి మేం ఇంటికి సుర‌క్షితంగా వెళ్లేలా సాయం చేశారు. బేస్ మెంట్‌లో కూడా వ‌ర‌ద ప్ర‌వాహం ఎక్కువ‌గా ఉంది. అప్పు‌డే నేను బోటును కొనాల‌నుకుంటున్నాన‌ని’ ట్విట‌ర్ లో చిన్న జోక్ వేశాన‌ని బ్ర‌హ్మాజీ రాసుకొచ్చారు. తాను ఎప్పుడైనా హైద‌రాబాద్‌, చెన్నై, బెంగ‌ళూరు, ఢిల్లీలో ఉన్న‌పుడు ఇలాంటివి త‌న‌పై తానే జోకులు వేసుకుంటాన‌ని బ్రహ్మాజీ పేర్కొన్నారు.