Monsoon Hair Care: వర్షాకాలంలోనూ మీ జుట్టు మెరిసిపోవాలంటే.. ఈ సింపుల్ టిప్స్ ఫాలో అవ్వండి..!

తల చర్మాన్ని సరిగా శుభ్రంగా ఉంచకపోతే చెమట, దుమ్ము, నూనె కలిసి ఒక పొరలా తయారవుతాయి. ఇది ఫంగస్ ఇన్ఫెక్షన్లు లేదా చుండ్రు లాంటి సమస్యలకు దారితీస్తుంది. అంతేకాదు జుట్టు వేర్లు బలహీనపడతాయి. మెల్లిమెల్లిగా జుట్టు రాలిపోవడం, పొడిగా మారడం లాంటివి జరుగుతాయి. అందుకే వర్షాకాలంలో తల చర్మానికి మరింత శ్రద్ధ పెట్టాలి.

ఆయిల్ రాసేటప్పుడు జాగ్రత్త

జుట్టు ఆరోగ్యంగా ఉండాలంటే నూనె రాయడం చాలా మంచి పద్ధతి. నూనె రాయడం వల్ల తల చర్మానికి రక్త ప్రసరణ మెరుగుపడుతుంది. ఇది జుట్టును బలంగా, మృదువుగా, మెరిసేలా చేస్తుంది. అయితే వర్షాకాలంలో నూనె రాసేటప్పుడు కొన్ని జాగ్రత్తలు తప్పకుండా పాటించాలి. ఈ కాలంలో గాలిలో తేమ ఎక్కువగా ఉంటుంది. కాబట్టి నూనెను సరిగా రాయకపోతే సమస్యలు ఎక్కువవుతాయి.

తరచుగా ఆయిల్ రాయకండి

వర్షాకాలంలో తలకు నూనె రాయడం పూర్తిగా మానేయాల్సిన అవసరం లేదు. కానీ రోజూ లేదా ఎక్కువసేపు నూనె పెట్టుకోవడం మంచిది కాదు. ఎందుకంటే నూనె తలపై ఎక్కువసేపు ఉంటే దుమ్ము, చెమటను ఆకర్షించి తల చర్మంపై పేరుకుపోతుంది. ఇది ఫంగస్ లేదా చుండ్రుకు కారణం కావచ్చు.

తక్కువ మోతాదు, తక్కువ సమయం

వారానికి ఒకటి లేదా రెండుసార్లు మాత్రమే తక్కువ పరిమాణంలో నూనె రాయడం ఉత్తమం. కొబ్బరి నూనె, బాదం నూనె లేదా ఆర్గాన్ నూనె లాంటి సహజ నూనెలు వాడండి. చాలా తక్కువ నూనె తీసుకుని తలకు రాసి, దాన్ని ఎక్కువసేపు ఉంచకుండా.. అరగంట తర్వాత కడిగేయడం మంచిది. ఎక్కువసేపు నూనె ఉంచడం వల్ల తలపై జిడ్డు పేరుకుపోవచ్చు.

మసాజ్ చేయండి.. తడి జుట్టుకు వద్దు

నూనె రాసిన తర్వాత వేళ్లతో మెల్లగా మసాజ్ చేయండి. ఇది రక్త ప్రసరణకు సహాయపడుతుంది. అయితే తల చెమటతో తడిగా ఉన్నప్పుడు నూనె రాయకూడదు. ఎందుకంటే అప్పుడు నూనె రాయడం వల్ల తల చర్మంపై సమస్యలు వచ్చే అవకాశం ఉంటుంది.

తల స్నానం ముఖ్యం

నూనె రాసిన తర్వాత తల స్నానం చేయడం చాలా ముఖ్యం. రసాయనాలు లేని సల్ఫేట్ ఫ్రీ షాంపూతో తల స్నానం చేయడం ద్వారా తల చర్మంపై పేరుకుపోయే మలినాలను తొలగించవచ్చు. దీని వల్ల జుట్టు పాడవకుండా ఆరోగ్యంగా ఉండే అవకాశం ఎక్కువగా ఉంటుంది.

వర్షాకాలంలో జుట్టు సంరక్షణ కష్టంగా అనిపించినా.. సరైన జాగ్రత్తలు తీసుకుంటే సమస్యలను ఆపొచ్చు. నూనె రాయడంలో నియమాలు పాటించడం, తల శుభ్రంగా ఉంచడం, తేమ నుండి తల చర్మాన్ని కాపాడుకోవడం ద్వారా మీ జుట్టును ఆరోగ్యంగా.. మెరిసేలా ఉంచుకోవచ్చు. ఈ సీజన్‌ లో జుట్టును నిర్లక్ష్యం చేయకుండా సరిగా చూసుకోవడం చాలా అవసరం.