చీతా vs బబూన్: అడవిలో జరిగే ఈ ఆసక్తికర పోరులో విజేత ఎవరంటే..?

ఆఫ్రికా గడ్డి మైదానాల్లో గంటకు 100 కిలోమీటర్లకు పైగా వేగంతో పరిగెత్తే చీతా కనిపిస్తే, దాదాపు ఏ జంతువైనా భయపడుతుంది. కానీ ఒక జంతువు మాత్రం చీతా ముందు అంత తేలిగ్గా వెనక్కి తగ్గదు. అదే బబూన్. శాస్త్రీయంగా బబూన్ అని పిలిచే కోతి. చాలామంది బబూన్స్ పండ్లు, ఆకులు మాత్రమే తింటాయని అనుకుంటారు. కానీ అది నిజం కాదు. బబూన్లు సర్వభక్షకాలు. పండ్లు, గింజలు, కీటకాలతో పాటు పక్షుల గుడ్లు, చిన్న పక్షులు, ఎలుకలు, కుందేళ్లు, చిన్న జంతువులను కూడా వేటాడి తింటాయి. అవకాశం దొరికితే చనిపోయిన జంతువుల మాంసాన్ని కూడా ఆహారంగా తీసుకుంటాయి. అందుకే చీతా–బబూన్ మధ్య జరిగే పోరాటాలు ప్రకృతిలో చాలా ఆసక్తికరంగా ఉంటాయి.

ఒక చీతా.. బబూన్ల గుంపును గమనిస్తే, సాధారణంగా చిన్నది లేదా గుంపు నుంచి దూరమైన బబూన్‌ను మాత్రమే లక్ష్యంగా ఎంచుకుంటుంది. ఎందుకంటే గుంపు మధ్యలోకి వెళ్లడం అంటే ప్రమాదాన్ని ఆహ్వానించినట్టే. చీతా దూసుకొస్తున్నట్లు గుర్తించిన వెంటనే పెద్ద మగ బబూన్స్ గట్టిగా అరుస్తూ ముందుకు వస్తాయి. వాటి పొడవైన కోరపళ్లు, బలమైన చేతులు, గుంపుగా దాడి చేసే స్వభావం చీతాను అప్రమత్తం చేస్తాయి. కొన్ని సందర్భాల్లో అవి చీతాపైకి ఎదురుగానే పరిగెత్తి దానిని వెనక్కి తగ్గిస్తాయి.

ఇక్కడ ఒక ఆశ్చర్యకరమైన విషయం ఉంది. చీతా బబూన్లను చూసి భయపడటం కాదు. గాయపడటానికి భయపడుతుంది. చీతా శరీరం వేగం కోసం రూపొందింది. ఒక చిన్న గాయం కూడా అయితే అది కొన్ని వారాల పాటు వేటాడలేకపోవచ్చు. వేటాడలేకపోతే ఆకలితో అలమటించాల్సి వస్తుంది. అందుకే అవసరం లేని పోరాటాలను అది తప్పించుకుంటుంది. కొన్ని అడవి పరిశీలనల్లో చీతా ఒక జింకను వేటాడి తింటుండగా, బబూన్ల గుంపు వచ్చి గట్టిగా అరుస్తూ దానిని తరిమివేసిన ఘటనలు కూడా నమోదయ్యాయి. చీతా వెనక్కి వెళ్లిన తర్వాత అదే వేటను బబూన్లు తిన్న సందర్భాలు ఉన్నాయి.

అయితే దీని అర్థం బబూన్లు ఎప్పుడూ గెలుస్తాయని కాదు. ఒక ఒంటరి బబూన్ లేదా చిన్న బబూన్ చీతాకు దొరికితే, తన అద్భుత వేగంతో దానిని పట్టుకునే అవకాశం ఎక్కువ. కానీ గుంపుగా ఉన్న బబూన్స్ విషయంలో పరిస్థితి పూర్తిగా మారిపోతుంది. ఈ పోరాటంలో అసలు విజేత ఎవరు అంటే ఒంటరి బబూన్ అయితే చీతాకు పైచేయి. గుంపుగా ఉన్న బబూన్స్ అయితే – చాలాసార్లు చీతా వెనక్కి తగ్గుతుంది. వేగం ఒక గొప్ప ఆయుధం. కానీ ఐక్యత, ధైర్యం, వ్యూహం కలిసొస్తే, వేగవంతమైన వేటగాడు కూడా రెండుసార్లు ఆలోచించాల్సి వస్తుంది.