Wildlife: బోంగో.. 99% మందికి తెలియని అడవి జంతువు

ఈ అద్భుతమైన జంతువును మీరు ఎప్పుడైనా చూశారా? శరీరంపై తెల్లటి చారలు, తలపై మెలికలు తిరిగిన కొమ్ములు.. చూడటానికి ఎంతో ప్రత్యేకంగా కనిపించే ఈ జంతువు పేరు బోంగో. ఆఫ్రికాలోని దట్టమైన ఉష్ణమండల అడవులు వీటికి ప్రధాన నివాస ప్రాంతాలు. ముఖ్యంగా పశ్చిమ, మధ్య ఆఫ్రికా అడవుల్లో లోతట్టు బోంగోలు కనిపిస్తాయి. ఇక పర్వత బోంగోలు కెన్యాలోని పర్వత అడవుల్లో నివసిస్తాయి.

బోంగోలు చూడటానికి పెద్ద జింకల్లా కనిపిస్తాయి. వీటిలో మగ బోంగోలు సాధారణంగా పెద్దగా, బలంగా ఉంటాయి. వాటి తలపై పొడవైన, మెలికలు తిరిగిన కొమ్ములు ప్రత్యేకమైన అందాన్ని ఇస్తాయి. అయితే ఆడ బోంగోలకు కూడా కొమ్ములు ఉంటాయి. కాకపోతే మగవాటి కొమ్ములతో పోలిస్తే ఇవి కొంచెం చిన్నగా, సన్నగా ఉంటాయి.

బోంగోలు పూర్తిగా శాఖాహారులు. ఆకులు, లేత కొమ్మలు, గడ్డి, వివిధ రకాల అడవి మొక్కలను తింటూ దట్టమైన అడవుల్లో ఆహారం వెతుక్కుంటాయి. సాధారణంగా ఆడ బోంగో ఒకేసారి ఒక పిల్లకు జన్మనిస్తుంది. పుట్టిన చిన్న బోంగో చాలా సున్నితంగా ఉంటుంది. అందుకే తల్లి దాన్ని శత్రువుల నుంచి కాపాడేందుకు దట్టమైన వృక్షాల మధ్య దాచి పెడుతుంది. ప్రమాదం ఉందని అనిపించినప్పుడు ఎంతో అప్రమత్తంగా వ్యవహరిస్తుంది.

ఇక బోంగో శరీరంపై ఉండే తెల్లటి చారల వెనుక కూడా ఓ ఆసక్తికరమైన కారణం ఉంది. ఇవి కేవలం అందం కోసం మాత్రమే కాదు. అడవిలోని వెలుతురు, నీడల మధ్య బోంగో శరీర ఆకారాన్ని గుర్తించడం శత్రువులకు కష్టతరం చేస్తాయి. దీంతో అవి అడవిలో సులభంగా కలిసిపోయి శత్రువుల కళ్ల నుంచి తప్పించుకోగలుగుతాయి.

అయితే ఈ అందమైన జంతువులు ప్రస్తుతం కొన్ని తీవ్రమైన ప్రమాదాలను ఎదుర్కొంటున్నాయి. బోంగోల్లో రెండు రకాలు ఉన్నాయి. ఒకటి లోతట్టు బోంగో.. మరొకటి పర్వత బోంగో. వీటిలో లోతట్టు బోంగోలు అంతరించిపోయే ప్రమాదానికి దగ్గరగా ఉన్న జాతిగా గుర్తింపు పొందగా.. పర్వత బోంగోలు మాత్రం తీవ్రంగా అంతరించిపోయే ప్రమాదంలో ఉన్నాయి. అడవుల నాశనం, అక్రమ వేట కారణంగా వీటి సంఖ్య తగ్గిపోతోంది.

చూశారుగా.. శరీరంపై అందమైన చారలు, ప్రత్యేకమైన కొమ్ములు, అడవిలో కలిసిపోయే అద్భుతమైన లక్షణాలు.. ఇలా ఎన్నో ప్రత్యేకతలు బోంగో సొంతం. కానీ వీటి ఉనికికే ఇప్పుడు ముప్పు ఏర్పడుతోంది. వీటి నివాస ప్రాంతాలను కాపాడితేనే భవిష్యత్తులోనూ ఈ అద్భుతమైన జంతువులను మనం చూడగలం!