December: పిప్పిప్పి.. డుండుండుం.. తెలుగు రాష్ట్రాల్లో పెళ్లిళ్ల సందడి.. డిసెంబరులో వేలాదిగా వివాహాలు
తెలుగు రాష్ట్రాల్లో డిసెంబర్‌లో పెళ్లి బాజాలు మోగనున్నాయి. మూడు నెలలుగా ముహూర్తాలు లేవు. మాఘమాసంలో కూడా పెద్దగా మంచి రోజులు లేవు. అందుకే డిసెంబర్‌ 2 నుంచి 21 వరకు శుభ ముహూర్తాలు ఉండటంతో.. వేలాది పెళ్లిళ్లు జరగనున్నాయి. దేశ వ్యాప్తంగా అయితే.. మూడున్నర లక్షల పెళ్లిళ్లు జరగనున్నాయి.
మూడునెలల నుంచి ఎప్పుడెప్పుడూ మూఢం పోతుందా.. ముహూర్తాలు వస్తాయా అని ఎదురుచూసిన ఎంతోమంది డిసెంబర్‌లో ఒక్కటవబోతున్నారు. నవంబరుతో మూఢం పోతోంది. డిసెంబరు నెల మొత్తం ఇక పెళ్లి సందడే.. డిసెంబర్‌ మాసంలో వేల సంఖ్యలో పెళ్లిళ్లు జరగనున్నాయి. దీంతో కల్యాణ మండపాలకి, ఈవెంట్‌ మేనేజర్లకీ గిరాకీ పెరిగింది.
మూఢం కారణంగా మూణ్నెళ్లు బ్రేక్
డిసెంబరు 2 నుంచి భారీ సంఖ్యలో జరగనున్న పెళ్లిళ్లతో తెలుగు రాష్ట్రాలు కళకళలాడనున్నాయి. డిసెంబరులో కూడా నాలుగైదు మాత్రమే మంచి ముహూర్తాలు ఉండడంతో వివాహాలు, రిసెప్షన్‌ వేడుకలతో మండపాలు కిక్కిరిసిపోనున్నాయి. సాధారణంగా ఆశ్వయుజ, కార్తీక, మార్గశిర మాసాల్లో పెద్ద సంఖ్యలో పెళ్లిళ్లు జరుగతాయి. అయితే మూడు నెలలుగా మూఢాల కారణంగా మాంగళ్యం తంతునానేనా కు బ్రేక్ పడింది. అక్టోబరు, నవంబరు నెలల్లో మంగళవాయిద్యాల ముచ్చటే లేకుండా పోయింది. నవంబరు నెలాఖరుతో మూఢం ముగియడంతో కొత్త జంటలు వివాహ వేడుకలకు సిద్ధమయ్యాయి.
బుక్కయిన కల్యాణ మండపాలు, బాంక్వెట్‌ హాళ్లు
అది కూడా..డిసెంబరు 2 నుంచి 21 వరకే మంచి రోజులున్నాయి. ఆ తర్వాత పుష్యమాసం వస్తుంది. ఆ నెలంతా, అంటే జనవరి రెండో భాగం వరకు మంచి ముహూర్తాలు లేవు. అలాగని మరికొంత కాలం వేచి చూడాలని భావించినా.. 2023 ఫిబ్రవరి, మార్చి నెలల్లో మాఘ, ఫాల్గుణ మాసాల్లో కొద్ది సంఖ్యలోనే ముహూర్తాలు ఉన్నాయి. ఏప్రిల్‌లో అంటే ఉగాది తర్వాత చైత్రమాసంలో మళ్లీ మూఢం వస్తోంది. శుభ ముహూర్తాలు మేలో కానీ ఉండవు. దీంతో డిసెంబరులో అందుబాటులో ఉన్న కొన్ని ముహూర్తాల్లోనే ఎక్కువ మంది పెళ్లి ఏర్పాట్లు చేసుకుంటున్నారని పండితులు చెబుతున్నారు. ఒక్క హైదరాబాద్‌లోనే డిసెంబరు 20లోగా వేలాదిగా వివాహాలు జరగనున్నాయని ఈవెంట్‌ మేనేజ్‌మెంట్‌ వర్గాలు అంటున్నాయి. దీంతో కల్యాణ మండపాలకు విపరీతమైన గిరాకీ ఏర్పడింది. హైదరాబాద్‌తో పాటు చుట్టుపక్కల 2 వేలకు పైగా కల్యాణ మండపాలు, 2 వేల వరకు బాంక్వెట్‌ హాళ్లు ఉన్నాయి. ఇవన్నీ పెళ్లిళ్లు, రిసెప్షన్లకు బుక్‌ అయిపోయాయని, కొన్ని మ్యారేజ్‌ హాల్స్‌ ఉదయం ఒకరు, సాయంత్రం మరొకరు బుక్‌ చేసుకోవాల్సినంత రద్దీ ఏర్పడిందని ఆ వర్గాలు చెబుతున్నాయి.
నార్త్‌లో మూడు లక్షలకు పైగా పెళ్లిళ్లు
తెలుగు రాష్ట్రాల్లోనే ఇలా ఉంటే..ఇక దేశ వ్యాప్తంగా చూస్తుంటే..ఒక్క నార్త్‌లోనే మూడు లక్షలకు పైగా పెళ్లిళ్లు జరగనున్నాయట. ఇందుకోసం రెండు లక్షల కోట్లకు పైగా బిజినెస్ కూడా జరుగుతోందట. మరోవైపు, కొవిడ్‌ కారణంగా ఎన్‌ఆర్‌ఐలు స్వదేశానికి వచ్చేందుకు అనేక ఆటంకాలు ఏర్పడ్డాయి. భారత్‌ వస్తే మళ్లీ తిరిగి వెళ్లేందుకు ఇబ్బందులు ఎదురవుతాయేమో అనే భయంతో చాలా మంది పెళ్లిళ్లు వాయిదా వేసుకున్నారు. ఇప్పుడు విదేశాల నుంచి రాకపోకలపై ఆంక్షలు సడలించారు. పైగా డిసెంబరులో అమెరికాలో క్రిస్మస్‌ సందడి ఉంటుంది. ఎన్నారైలకు ఈ సమయంలో సెలవులు సులభంగానే దొరుకుతాయి.. దీంతో, విదేశాల్లో ఉద్యోగాల్లో స్థిరపడిన యువతీ యువకులు రెక్కలు కట్టుకుని స్వదేశంలో వాలిపోయి ఓ ఇంటివారవుతున్నారు. దగ్గరి బంధువులు విదేశాల్లో ఉన్న వారు కూడా డిసెంబరు అయితే సౌకర్యంగా ఉంటుందని వివాహాలు నిశ్చయించుకున్నారని పురోహితులు చెబుతున్నారు. సో.. మొత్తానికి డిసెంబర్‌ మొత్తం.. పిప్పిప్పి.. డుండుండుం..అన్నమాట.
మరిన్ని తాజా వార్తలు కోసం ఇక్కడ క్లిక్ చేయండి
