భార్యాభర్తల మధ్య అనుబంధాన్ని బలపరుచే 2-2-2 రూల్ మీకోసం!

వివాహ జీవితాన్ని సంతోషంగా కొనసాగించడానికి భాగస్వాముల మధ్య మానసిక సమన్వయం చాలా అవసరం. ఈ మధ్య పెళ్లైన జంటలు ఒకరికొకరు సమయం కేటాయించకపోవడం వల్ల అనేక సమస్యలు ఎదుర్కొంటున్నారు. ఈ సమస్యల నుంచి బయటపడేందుకు 2-2-2 రూల్ అనే కొత్త పద్ధతి ప్రస్తుతం సోషల్ మీడియాలో ట్రెండ్ గా మారింది. ఇది పాటించడం ద్వారా భార్యభర్తల మధ్య అనుబంధం మరింత బలపడి, జీవితం ఆనందంతో నిండిపోతుందట. 2-2-2 అంటే రెండు వారాలకు ఒకసారి, రెండు నెలలకు ఒకసారి, రెండు సంవత్సరాలకు ఒకసారి అని అర్ధం. ఈ 2-2-2 పై పూర్తి వివరాలను ఇప్పుడు తెలుసుకుందాం.

రెండు వారాలకు ఒకసారి

పనుల్లో నిత్యం బిజీగా ఉండటం వల్ల, మనసుకు ప్రశాంతంత లేకుండా పోతుంది. ఈ కారణంగా అనేక సమస్యలు ఎదుర్కోవాల్సి వస్తుంది. మొదటి 2 రూల్ ప్రకారం.. ప్రతి రెండు వారాలకు ఒకసారి మీ భాగస్వామితో డిన్నర్ లేదా లంచ్ డేట్ కి ప్లాన్ చేసి వెళ్లండి. ఇది మీ ఇద్దరి మధ్య అనుబంధాన్ని గట్టిగా చేస్తుంది. సినిమా చూడటం లేదా నిశ్శబ్దంగా ఒక కప్పు కాఫీ తాగుతూ మాట్లాడడం కూడా మంచి ఆలోచన. ఇది అపోహలను తొలగించి మనసులోని భావాలను పంచుకోవడానికి చాలా చక్కటి మార్గం.

రెండు నెలలకు ఒకసారి

రెండు నెలలకు ఒకసారి కాస్త టూర్ లకు వెళ్లడం మంచిది. ఇంటి పనులు, ఆఫీసు ఒత్తిడి, ఇతర బాధ్యతలతో బిజీగా ఉండడం వల్ల మనసు అలసిపోయి గొడవలకు దారితీస్తుంది. ఈ 2 రూల్ ప్రకారం.. మీ భాగస్వామితో కలిసి ఒక వీకెండ్ ట్రిప్ ప్లాన్ చేయండి. పెద్ద దూరానికి వెళ్లలేకపోతే, నగరం చుట్టూ విహారయాత్రకు వెళ్లండి. అక్కడ మీ మీ పనుల గురించి పక్కనపెట్టి, ప్రశాంతంగా కలిసి గడపడం వల్ల సంబంధం మరింత బలపడుతుంది.

రెండేళ్లకు ఒకసారి

వివాహ జీవితంలో కొన్ని జ్ఞాపకాలను సృష్టించడం చాలా ముఖ్యం. ప్రతి రెండేళ్లకు ఒకసారి మీ భాగస్వామితో మరపురాని గుర్తులను ఏర్పరుచుకోవాలంటే ఒక వారం కలిసి గడపండి. కుటుంబం, కెరీర్, వ్యాపారం వంటి విషయాలను పక్కన పెట్టి ఈ సమయాన్ని పూర్తిగా మీ ఇద్దరి కోసం వినియోగించుకోండి. ఒకరితో ఒకరు మాట్లాడడం, గత జ్ఞాపకాలను పంచుకోవడం, కొత్త అభిరుచులను కనుగొనడం ద్వారా వివాహ బంధం మరింత బలపడుతుంది.

ఈ రూల్ ఎలా పనిచేస్తుంది ?

2-2-2 రూల్ పాటించడం వల్ల భాగస్వాముల మధ్య మానసిక ఒత్తిడి తగ్గి, పరస్పర అవగాహన పెరుగుతుంది. సాధారణంగా, రోజువారీ జీవితంలో మనం చేసే పనులే గొడవలకు కారణమవుతాయి. అయితే ఈ రూల్ అనుసరించడం ద్వారా ఆ పనుల ఒత్తిడి తగ్గి ఆనందాన్ని అందిస్తుంది.