ముఖం కడిగేటప్పుడు ఈ తప్పు చేస్తున్నారా..? జాగ్రత్త మీ కళ్లకే ప్రమాదం..!

ముఖం కడుక్కునేటప్పుడు కళ్ళు తెరిచి వాటిపై నేరుగా నీళ్లు చల్లడం చాలా మందికి అలవాటు. కానీ ఇది కళ్ళకు చాలా ప్రమాదకరం. కళ్ళలో మంట, దురద తగ్గించడానికి ఇలా చేస్తుంటారు. బయట నుంచి వచ్చినప్పుడు లేదా కంప్యూటర్ పని ముగించిన తర్వాత ముఖం, కళ్ళను కడుక్కుంటే రిఫ్రెషింగ్‌ గా అనిపిస్తుంది. అందుకే చాలా మంది రోజులో అనేక సార్లు ఇలా చేస్తుంటారు. అయితే 100 మందిలో 90 మంది ఈ అలవాటుతో కళ్ళకు తెలియకుండానే హాని చేసుకుంటున్నారని నిపుణులు చెబుతున్నారు. దీని వల్ల తర్వాత పెద్ద సమస్యలు వచ్చి ఆసుపత్రికి వెళ్లాల్సిన పరిస్థితి రావచ్చు అంటున్నారు.

ఎందుకు ప్రమాదకరం..?

కళ్ల మంట తగ్గుతుందని భావించి ఇలా నీళ్లు చల్లడం పొరపాటని నిపుణులు అంటున్నారు. ఎందుకంటే మనం వాడే నీటి pH స్థాయి మన కన్నీటి pH స్థాయికి సరిపోలదు. మనం తాగే నీరు ఎక్కువగా క్షార స్వభావం (pH 8 లేదా అంతకంటే ఎక్కువ) కలిగి ఉంటుంది. అంతేకాకుండా నీటిలో ఉండే రసాయనాలు కూడా కళ్ళకు హాని కలిగిస్తాయి. క్షార లేదా ఆమ్ల స్వభావం ఉన్న నీరు రెండూ కళ్ళకు ప్రమాదకరమే.

ముఖం కడిగే సరైన పద్ధతి

కళ్ళను తెరిచి నీళ్లు చల్లడం మానుకోవాలని నిపుణులు సూచిస్తున్నారు. ముఖం కడిగేటప్పుడు కళ్ళను గట్టిగా మూసుకోవాలి. ఇలా చేయడం వల్ల కంటి ఉపరితలం సురక్షితంగా ఉంటుంది. కళ్ళ లోపలి కన్నీటి ద్రవంలోకి నీరు వెళ్లకుండా జాగ్రత్త పడాలి. అలాగే గులాబీ నీరు లేదా ఆయుర్వేద పదార్థాలు వాడేటప్పుడు అవి తాజాగా, శుభ్రంగా ఉన్నాయో లేదో నిర్ధారించుకోవడం ముఖ్యం. లేకపోతే ఇన్ఫెక్షన్లు వచ్చే ప్రమాదం ఉంది.

తాగు నీరు సురక్షితమేనా..?

చాలా మంది తాగునీటి TDS మాత్రమే చూస్తారు కానీ కళ్ళ విషయంలో pH స్థాయి చాలా ముఖ్యం. RO లేదా ఫిల్టర్ నీటిలోనూ రసాయనాలు ఉండవచ్చు కాబట్టి కళ్ళకు మంచిది కాదు. కళ్ళను శుభ్రం చేయాలంటే నిల్వ ఉన్న నీటి బదులు పారుతున్న నీటిని వాడటం మంచిది. దీనిలో మలినాలు తక్కువగా ఉంటాయి.

కళ్లకు వచ్చే ప్రమాదాలు

ఏ రకం నీటితో అయినా కళ్ళను కడగడం తీవ్రమైన నష్టం కలిగించవచ్చు. ఇన్ఫెక్షన్, అలర్జీలు రావచ్చు. నీటిలోని రసాయనాలు కార్నియా, రెటీనా వంటి సున్నితమైన భాగాలను దెబ్బతీస్తాయి. దీని వల్ల దురద, మంట, తీవ్ర పరిస్థితుల్లో చూపు కోల్పోయే ప్రమాదం కూడా ఉంది. నీటితో కడిగిన తర్వాత ఇలాంటి సమస్యలు వస్తే వెంటనే మృదువైన బట్టతో తుడిచి నేత్ర వైద్యుడిని సంప్రదించాలి.