ఏ విటమిన్ ఏ వ్యాధి నుంచి రక్షిస్తుంది..? కచ్చితంగా తెలుసుకోవాల్సిన విషయాలివే..

విటమిన్లు శరీరానికి అవసరమైన పోషకాలు.. ఇవి మన మొత్తం ఆరోగ్యాన్ని కాపాడుకోవడంలో కీలక పాత్ర పోషిస్తాయి. శరీరానికి శక్తిని అందించడానికి, అవయవాల సరైన పనితీరును నిర్వహించడానికి, రోగనిరోధక వ్యవస్థను బలోపేతం చేయడానికి సహాయపడతాయి. ప్రతి విటమిన్‌కు ఒక ప్రత్యేకమైన పని ఉంటుంది.. ఉదాహరణకు ఎముకలను బలోపేతం చేయడం.. మరికొన్ని చర్మ, కంటి ఆరోగ్యాన్ని మెరుగుపరుస్తాయి.

శరీరం చాలా విటమిన్లను స్వయంగా ఉత్పత్తి చేసుకోలేదు. కాబట్టి వాటిని ఆహారం ద్వారా పొందడం చాలా అవసరం. ఈ విటమిన్ల లోపం వివిధ ఆరోగ్య సమస్యల ప్రమాదాన్ని పెంచుతుంది. తగినంత మోతాదులో విటమిన్లను తీసుకోవడం శరీరాన్ని ఆరోగ్యంగా ఉంచడమే కాకుండా, అనేక వ్యాధులను నివారిస్తుంది.. శరీర పనితీరును మెరుగుపరుస్తుంది. అందువల్ల, సమతుల్య ఆహారంలో విటమిన్లను చేర్చడం చాలా కీలకం. ఏ విటమిన్లు ఏ వ్యాధుల నుండి రక్షణ కల్పిస్తాయి.. ఆరోగ్య నిపుణులు ఏం చెబుతున్నారో ఈ కథనంలో తెలుసుకుందాం..

ఏ విటమిన్ ఏ వ్యాధిని నివారిస్తుంది?

రోగనిరోధక శక్తిని పెంచే విటమిన్లు

ఆర్ఎంఎల్ హాస్పిటల్ లోని వైద్య విభాగం డైరెక్టర్ అయిన ప్రొఫెసర్ డాక్టర్ సుభాష్ గిరి విటమిన్‌ల ఆవశ్యకత గురించి వివరించారు. విటమిన్ సి, విటమిన్ డి శరీర రోగనిరోధక వ్యవస్థను బలపరుస్తాయని తెలిపారు. అంతేకాకుండా ఇన్ఫెక్షన్లతో పోరాడటానికి సహాయపడతాయి.. శరీరం అనారోగ్యానికి గురికాకుండా నిరోధించడంలో కీలక పాత్ర పోషిస్తాయి.

ఎముకలు – కండరాలను బలపరిచే విటమిన్లు

ఎముకలు, కండరాల బలానికి విటమిన్ డి, బి12 చాలా అవసరం.. అవి బలాన్ని అందించి, బలహీనత, ఎముకలకు సంబంధించిన సమస్యలను తగ్గించడంలో సహాయపడతాయి.

కంటి, చర్మ ఆరోగ్యానికి అవసరమైన విటమిన్లు..

విటమిన్ ఎ, విటమిన్ ఇ దృష్టి, చర్మ ఆరోగ్యాన్ని కాపాడటానికి సహాయపడతాయి. చర్మాన్ని ఆరోగ్యంగా ఉంచడంలోనూ, కళ్ళను రక్షించడంలోనూ ఇవి కీలక పాత్ర పోషిస్తాయి.

మీ గుండె, మెదడును ఆరోగ్యంగా ఉంచే విటమిన్లు

గుండె, మెదడు సరిగ్గా పనిచేయడానికి విటమిన్ బి6, బి12 చాలా అవసరం. అవి రక్త ప్రసరణను మెరుగుపరిచి, మానసిక ఆరోగ్యానికి తోడ్పడతాయి.

విటమిన్ లోపాన్ని ఏ పరీక్ష గుర్తించగలదు?

విటమిన్ లోపాలను గుర్తించడానికి నిర్దిష్ట రక్త పరీక్షలు నిర్వహిస్తారు. వీటిలో విటమిన్ డి, విటమిన్ బి12, ఐరన్ ప్రొఫైల్, కాల్షియం పరీక్షలు ఉంటాయి. మీ లక్షణాల ఆధారంగా వైద్యులు తగిన పరీక్షలను సిఫార్సు చేస్తారు.

ఒక వ్యక్తికి తరచుగా అలసట, నీరసం, జుట్టు రాలడం లేదా చర్మ సమస్యలు వంటివి కనిపిస్తే, అది విటమిన్ లోపానికి సంకేతం కావచ్చు. క్రమం తప్పని వైద్య పరీక్షలు ఈ పరిస్థితిని నిర్ధారించి, తగిన చికిత్సను ప్రారంభించడానికి సహాయపడతాయి.

విటమిన్ లోపాన్ని ఎలా భర్తీ చేసుకోవాలి..?

విటమిన్ లోపాలను అధిగమించడానికి, సమతుల్యమైన, పోషకమైన ఆహారం తీసుకోవడం చాలా ముఖ్యం. మీ రోజువారీ ఆహారంలో ఆకుకూరలు, పండ్లు, పాలు, పప్పులు, ఎండు ఫలాలను చేర్చుకోండి. అలాగే, కొంత సమయం ఎండలో గడపడం కూడా ముఖ్యం.. ఇది శరీరానికి సహజ విటమిన్లను అందిస్తుంది.

లోపం తీవ్రంగా ఉంటే, వైద్యుని సలహాతో సప్లిమెంట్లు తీసుకోవచ్చు. ఆరోగ్యకరమైన జీవనశైలిని అలవర్చుకోవడం.. ఆరోగ్యకరమైన అలవాట్లను పాటించడం ద్వారా విటమిన్ లోపాలను నివారించవచ్చు.

మరిన్ని హెల్త్ వార్తల కోసం ఇక్కడ క్లిక్ చేయండి..