Camphor Benefits: కర్పూరం కేవలం పూజలకే కాదు.. మొటిమలు, తలనొప్పి, చుండ్రును వదిలించే అద్భుత ఔషధం!

భారతీయ ఇళ్లలో కర్పూరానికి ఆధ్యాత్మికంగా ఎంతో ప్రాధాన్యత ఉంది. ఇంట్లో కర్పూరం వెలిగించడం వల్ల వాతావరణంలోని ప్రతికూల శక్తులు (నెగటివిటీ) నశించి, సానుకూల శక్తి పెరుగుతుందని మతపరమైన నమ్మకం. సాధారణంగా మార్కెట్లో సహజ కర్పూరం, కృత్రిమ కర్పూరం అని రెండు రకాలు లభిస్తాయి. రసాయనాలతో చేసే కృత్రిమ కర్పూరాన్ని దుస్తులు పాడవకుండా వార్డ్‌రోబ్‌లలో ఉంచడానికి వాడతారు. అయితే ప్రకృతి సిద్ధంగా మొక్కల నుండి లభించే మైనం లాంటి ఘాటైన సహజ కర్పూరాన్ని ‘భీమ్సేని కర్పూరం’ అని పిలుస్తారు. దీనిని పూజలతో పాటు ఆరోగ్య సంరక్షణలో ఔషధంగా ఉపయోగిస్తారు. నిత్యం వేధించే పలు శారీరక సమస్యలకు కర్పూరం ద్వారా ఎలాంటి ఉపశమనం పొందవచ్చో తెలుసుకుందాం.

వివిధ ఆరోగ్య సమస్యలకు కర్పూరంతో చికిత్స తీవ్రమైన తలనొప్పికి నివారణ: ప్రస్తుత కాలంలో మానసిక ఒత్తిడి లేదా అలసట వల్ల చాలా మంది తలనొప్పితో ఇబ్బంది పడుతుంటారు. అటువంటి వారు కర్పూరాన్ని సమాన పరిమాణంలో ఉండే అల్లం, అర్జున చెట్టు బెరడు , తెల్ల చందనంతో కలిపి నూరి మెత్తటి పేస్ట్‌లా తయారు చేసుకోవాలి. ఈ మిశ్రమాన్ని నుదుటిపై పట్టులా వేసుకోవడం వల్ల తలనొప్పి నుండి చాలా త్వరగా ఉపశమనం లభిస్తుంది.

మొటిమలు , మచ్చల నివారణ: కౌమారదశలో ఉండే యువతీ యువకులలో హార్మోన్ల మార్పుల వల్ల ముఖంపై మొటిమలు రావడం ఒక పెద్ద సమస్య. కర్పూరంలో ఉండే యాంటీ బ్యాక్టీరియల్ గుణాలు మొటిమలను కలిగించే బ్యాక్టీరియాను సమర్థవంతంగా నశింపజేస్తాయి. కర్పూరం నూనెను ముఖానికి రాయడం వల్ల మొటిమలు తగ్గడమే కాకుండా అవి మళ్లీ రాకుండా నివారించవచ్చు. అలాగే కర్పూరాన్ని కొబ్బరి నూనెతో కలిపి ముఖంపై ఉండే నల్లటి మచ్చలు, మొటిమలకు క్రమం తప్పకుండా రాస్తే చర్మం మళ్లీ కాంతివంతంగా మారుతుంది.

చుండ్రు, జుట్టు రాలడానికి చెక్: కాలుష్యం, కలుషిత నీటి వాడకం వల్ల నేడు చాలా మంది చుండ్రు , జుట్టు రాలడం (హెయిర్ ఫాల్) వంటి సమస్యలతో సతమతమవుతున్నారు. దీనికోసం కొబ్బరి నూనెను కొద్దిగా వేడి చేసి అందులో కర్పూరం పొడిని కలపాలి. ఈ మిశ్రమాన్ని తల తత్వానికి (స్కాల్ప్) బాగా పట్టించి మసాజ్ చేయడం వల్ల చుండ్రు పూర్తిగా అదుపులోకి వస్తుంది. ఇది తలలోని ఇన్ఫెక్షన్లను దూరం చేసి జుట్టు కుదుళ్లను బలోపేతం చేస్తుంది.

జలుబు, దగ్గు నుండి ఉపశమనం: వాతావరణ మార్పుల వల్ల వచ్చే జలుబు, గొంతు నొప్పి , ముక్కు దిబ్బడ వంటి ఇబ్బందులకు కర్పూరం చక్కటి పరిష్కారం. మరుగుతున్న వేడి నీటిలో కొద్దిగా కర్పూరం వేసి ఆ ఆవిరిని గట్టిగా పీల్చడం వల్ల శ్వాసనాళాలు తెరుచుకుని జలుబు త్వరగా తగ్గుతుంది. అలాగే విపరీతమైన దగ్గుతో బాధపడేటప్పుడు, కర్పూరం కలిపిన ఆవాల నూనె లేదా నువ్వుల నూనెను గోరువెచ్చగా చేసి ఛాతి, వీపు భాగాలపై సున్నితంగా మర్దన (మసాజ్) చేస్తే మంచి ఫలితం ఉంటుంది.

మార్కెట్లో కేవలం రెండు రూపాయలకే లభించే ఈ చిన్న కర్పూర బిళ్లలో ఎన్నో అద్భుతమైన ఆరోగ్య ప్రయోజనాలు దాగి ఉన్నాయి. రసాయన కర్పూరాల జోలికి వెళ్లకుండా, స్వచ్ఛమైన భీమ్సేని కర్పూరాన్ని మాత్రమే ఇటువంటి గృహ చిట్కాలకు ఉపయోగించడం వల్ల ఎటువంటి సైడ్ ఎఫెక్ట్స్ లేకుండా పూర్తి ఉపశమనాన్ని పొందవచ్చు.