Prediabetes Symptoms: మధుమేహం వచ్చే ముందు శరీరంలో కనిపించే 5 సంకేతాలివే.. నిర్లక్ష్యం చేయకండి..

డయాబెటిస్ అనేది ప్రపంచవ్యాప్తంగా మిలియన్ల మంది ప్రజలను ప్రభావితం చేసే తీవ్రమైన వ్యాధి. రక్తంలో చక్కెర (గ్లూకోజ్) స్థాయి పెరగడం వల్ల ఇది జరుగుతుంది. ప్రస్తుత కాలంలో ముధుమేహం కేసులు భారీగా పెరుగుతున్నాయి. డయాబెటిస్‌ను సకాలంలో నియంత్రించకపోతే.. ఇది గుండె జబ్బులు, స్ట్రోక్, కిడ్నీ వ్యాధి, అంధత్వం వంటి అనేక తీవ్రమైన ఆరోగ్య సమస్యలను కలిగిస్తుంది. ఇది ఒకసారి వ్యాపిస్తే.. జీవితాంతం పీడిస్తూనే ఉంటుంది.. అయితే దీనిగురించి పెద్దగా భయపడాల్సిన పనిలేదు. బ్లడ్ షుగర్ నియంత్రణ కోసం చర్యలు తీసుకోవడం ద్వారా దీనిని అదుపులో ఉంచవచ్చు..

మధుమేహం ప్రారంభ దశలలో (ప్రీడయాబెటిస్ అని పిలుస్తారు) కొన్ని హెచ్చరిక సంకేతాలు కనిపిస్తాయి.. వాటిని గమనించడం చాలా ముఖ్యం.. మీరు ఈ లక్షణాలలో దేనినైనా అనుభవిస్తే, మీరు వెంటనే వైద్యుడిని సందర్శించి మీ బ్లడ్ షుగర్ పరీక్ష చేయించుకోవడం చాలా ముఖ్యం..

ప్రీడయాబెటిస్ సంకేతాలివే..

1. తరచుగా మూత్ర విసర్జన: మీరు మునుపటి కంటే ఎక్కువ తరచుగా మూత్ర విసర్జన చేస్తుంటే, ముఖ్యంగా రాత్రిపూట, మీ శరీరం అదనపు గ్లూకోజ్‌ను బయటకు పంపడానికి ప్రయత్నిస్తున్నట్లు సంకేతం కావచ్చు. ఇలా తరచూ జరుగుతుంటే వైద్యుడిని సంప్రదించండి..
2. పదే పదే దాహం వేయడం: మీరు పుష్కలంగా నీరు త్రాగినప్పటికీ నిరంతరం దాహం వేస్తుంటే.. మీ రక్తంలో చక్కెర స్థాయిలు ఎక్కువగా ఉన్నాయని మరొక సంకేతం కావచ్చు.
3. బాగా ఆకలిగా అనిపించడం: మీరు తిన్న తర్వాత కూడా మీరు నిరంతరం ఆకలితో అనిపిస్తుంటే.. అది మీ శరీరానికి తగినంత గ్లూకోజ్ అందడం లేదని సంకేతం కావచ్చు.
4. అలసట: మీరు ఎటువంటి కారణం లేకుండా అలసిపోయినట్లు అనిపిస్తే, మీ శరీరం శక్తి కోసం తగినంత గ్లూకోజ్‌ని ఉపయోగించకపోవడానికి సంకేతం కావచ్చు.
5. దృష్టి మసకబారడం: మీ దృష్టి అస్పష్టంగా లేదా మబ్బుగా మసకబారినట్లు అనిపిస్తే, అది మీ రక్తంలో చక్కెర స్థాయి చాలా ఎక్కువగా ఉందని సంకేతం కావచ్చు.

ఇలాంటి లక్షణాలు కనిపిస్తే నిర్లక్ష్యం చేయకుండా వెంటనే వైద్యులను సంప్రదించి చికిత్స తీసుకోవాలి..

మరిన్ని హెల్త్ వార్తల కోసం ఇక్కడ క్లిక్ చేయండి..