Thangalaan Movie: ఎలాంటి నిషేధం లేదు.. తంగలాన్ మూవీ ఓటీటీ విడుదలకు లైన్ క్లియర్.. కోర్టు ఆదేశాలు..
కోలీవుడ్ స్టార్ విక్రమ్ చియాన్ నటించిన లేటేస్ట్ బ్లాక్ బస్టర్ హిట్ మూవీ తంగలాన్. ఇందులో పార్వతి తిరువోతు, మాళవిక మోహనన్ కీలకపాత్రలు పోషించగా.. డైరెక్టర్ పా. రంజిత్ దర్శకత్వం వహించారు. అయితే ఈ సినిమా ఓటీటీలో విడుదల చేయకుండా ఆపాలని హైకోర్టులో పిటిషన్ దాఖలైంది.
ఓటీటీలో తంగలాన్ సినిమా విడుదలపై ఎలాంటి నిషేధం లేదని మద్రాసు హైకోర్టు ఆదేశించింది. తిరువళ్లూరుకు చెందిన ఓ వ్యక్తి మద్రాసు హైకోర్టులో ప్రజా ప్రయోజన పిటిషన్ దాఖలు చేసిన సంగతి తెలిసిందే. డైరెక్టర్ రంజిత్ దర్శకత్వంలో కోలీవుడ్ హీరో చియాన్ విక్రమ్ నటించిన ఈ సినిమా సూపర్ హిట్ అయిన సంగతి తెలిసిందే. ఈ చిత్రంలో వైష్ణవులను కించపరిచే సన్నివేశాలున్నాయని విమర్శలు వచ్చాయి. బౌద్ధాన్ని పవిత్రంగా, వైష్ణవాన్ని జోక్‌గా చిత్రీకరించే సన్నివేశాలు ఉన్నాయని ఆరోపించారు. ఇప్పటికే థియేటర్లలో సినిమాను విడుదల చేయగా, త్వరలో ఓటీటీలో విడుదల చేస్తే ఇరువర్గాల మధ్య ఘర్షణకు దారితీసే సన్నివేశాలు ఉన్నాయని పిటిషన్‌లో పేర్కొన్నారు. అందుకే ఈ చిత్రాన్ని ఓటీటీలో రిలీజ్ చేయకుండా నిషేదించాలని పిటిషన్ లో కోరారు. ఈ పిటిషన్‌ను విచారించిన ప్రధాన న్యాయమూర్తి జస్టిస్‌ శ్రీరామ్‌, జస్టిస్‌ సెంథిల్‌ కుమార్ రామ్‌మూర్తి.. సెన్సార్‌ సర్టిఫికేట్‌ పొంది సినిమా విడుదలైనందున తంగాళన్‌ సినిమాను ఓటీటీ రిలీజ్ చేసేందుకు ఎలాంటి అడ్డంకి లేదని ఆదేశిస్తూ కేసును కొట్టివేసింది.
2021లో ప్రారంభమైన ఈ చిత్రం 2023లో పూర్తయింది. విడుదల తేదీని వరుసగా మూడు వాయిదాల తర్వాత ఆగస్టు 15న ఈ చిత్రం థియేటర్లలోకి వచ్చింది. స్టూడియో గ్రీన్, నీలం ప్రొడక్షన్స్ సంయుక్తంగా నిర్మించిన ఈ సినిమాలో విక్రమ్, పార్వతి తిరువోతు, మాళవిక మోహనన్ కీలకపాత్రలు పోషించారు. జివి ప్రకాష్ కుమార్ సంగీతం అందించిన ఈ చిత్రం కర్ణాటక రాష్ట్రంలోని కోలార్ బంగారు క్షేత్రంలో జరిగిన యదార్థ సంఘటనల ఆధారంగా రూపొందించారు. విక్రమ్ అద్భుతమైన నటన, పార్వతి వాస్తవికత సినిమాకు హైలెట్ అయ్యాయి. ఇక ఈ చిత్రాన్ని దర్శకుడు రూపొందించిన తీరపై ప్రశంసలు వచ్చాయి.
ఈ చిత్రం థియేటర్లలో విడుదలై ప్రేక్షకుల నుండి భారీ స్పందనను అందుకుంది. సినిమా తీసిన తీరు, చిత్రీకరణ తీరును పలువురు ప్రశంసించారు. అయితే సినిమాలో కొన్ని సన్నివేశాలు మాత్రం వివాదాస్పదంగా ఉన్నాయని.. అందుకే ఈ చిత్రాన్ని ఓటీటీలో రిలీజ్ చేయడాన్ని నిషేధించాలని కోరుతూ పిటిషన్ దాఖలైంది. కానీ హైకోర్టు ఈ పిటిషన్‌ను కొట్టివేసింది. ఈ సినిమాను ఓటీటీలో విడుదల చేయడానికి ఎలాంటి నిషేధం లేదని తెల్చీ చెప్పింది.
ఇది చదవండి : Tollywood: వణుకుపుట్టించే థ్రిల్లర్ మూవీ.. ఈ సినిమాను అస్సలు మిస్సవద్దు..
మరిన్ని సినిమా వార్తల కోసం ఇక్కడ క్లిక్ చేయండి.
