Prudhvi: ‘ఆ కారణంగానే సినిమాలకు దూరమయ్యాను.. ఆ పొరపాటు ఇప్పుడు అర్థమైంది’.. నటుడు పృథ్వీ కామెంట్స్..

తెలుగు చిత్రపరిశ్రమలో ప్రేక్షకులకు ఎప్పటికీ గుర్తుండిపోయే విలక్షణ నటులలో పృథ్వీ (Prudhvi) ఒకరు. డైరెక్టర్ కోడి రామకృష్ణ తెరకెక్కించిన పెళ్లి సినిమాలో ప్రతి నాయకుడి పాత్రలో కనిపించారు. 1997లో విడుదలైన ఈ సినిమా బ్లాక్ బస్టర్ హిట్‏గా నిలిచింది. అంతేకాకుండా.. ఈ మూవీతో పృథ్వీకి విపరీతమైన క్రేజ్ వచ్చేసింది. దీంతో తెలుగులో వరుస అవకాశాలను అందుకున్నారు. విలన్‏గానే కాకుండా తన కామెడీ టైమింగ్‏తో ఆడియన్స్ ను అలరించారు. సమరసింహారెడ్డి, నువ్వు నాకు నచ్చావ్, దేవుళ్లు, ప్రేయసి రావే వంటి చిత్రాల్లో నటిస్తూ.. కెరీర్ మంచి ఫాంలో ఉన్న సమయంలోనే ఆయన సినిమాలకు దూరమయ్యారు. చాలా కాలం వెండితెరపై పృథ్వీ కనిపించలేదు. ఇక ఇటీవలే సినిమాల్లోకి రీఎంట్రీ ఇచ్చాడు. కేవలం మూవీస్ మాత్రమే కాకుండా సీరియల్స్ ద్వారా బుల్లితెర పై సందడి చేస్తున్నాడు. తాజాగా ఓ యూట్యూబ్ ఛానల్‏కు ఇచ్చిన ఇంటర్వ్యూలో తాను సినిమాలకు దూరం కావడానికి గల అసలు కారణం వెల్లడించారు. డిప్రెషన్ కారణంగానే తాను సినిమాలకు దూరమయ్యానని చెప్పారు.

పృథ్వీ మాట్లాడుతూ.. “ఇప్పటికీ అందరూ నన్ను పెళ్లి పృథ్వీ అని పిలుస్తారు. నటుడిగా నేను ఇంకా సంతృప్తి చెందలేదు. చేయాల్సిన పాత్రలు ఇంకా చాలా ఉన్నాయి. మాకు ఒకడే అబ్బాయి. తనకు ప్రస్తుతం 27 ఏల్లు. మానసిక ఎదుగుదల లేదు. మాట్లాడలేడు. మొదటిసారి ఈ విషయం తెలియగానే నేను డిప్రెషన్‏లోకి వెళ్లిపోయాను. అలా తొమ్మిదేళ్లపాటు డిప్రెషన్‏లోనే ఉండిపోయాను. దీంతో సినిమాలు చేయలేదు. వచ్చిన అవకాశాలను వదులుకున్నాను. అది ఎంత పెద్ద పొరపాటు అనేది ఇప్పుడు అర్థమైంది. అలాగే కొందరు హీరోస్.. నా సన్నివేశాలను కట్ చేయించేవారని తెలిసి చాలా బాధపడ్డాను. ఇవన్నీ నా కెరియర్ పై ప్రభావం చూపించాయి”. అంటూ చెప్పుకొచ్చారు. ఇక ఇటీవలే గృహలక్ష్మీ సీరియల్ ద్వారా ప్రేక్షకుల ముందుకు వచ్చిన సంగతి తెలిసిందే.