Vikram: 400కు పైగా థియేటర్లలో విక్రమ్ సినిమా.. తెలుగు రాష్ట్రాల్లోనూ కమల్ మూవీ..

యూనివర్సల్ హీరో కమల్ హాసన్ ప్రధాన పాత్రలో డైరెక్టర్ లోకేష కనగరాజ్ తెరకెక్కిస్తున్న లేటేస్ట్ చిత్రం విక్రమ్. భారీ యాక్షన్ థ్రిల్లర్ నేపథ్యంలో రాబోతున్న ఈ సినిమాలో విజయ్ సేతుపతి, ఫహద్ ఫాసిల్ కీలపాత్రలలో నటిస్తున్నారు.. అంతేకాకుండా.. తమిళ్ స్టార్ హీరో సూర్య అతిథి పాత్రలో నటిస్తుండడంతో ఈ సినిమాపై అంచనాలు భారీగానే ఉన్నాయి. ఇటీవలే విడుదలైన సినిమాపై భారీ అంచనాలు పెంచేసింది. ఇప్పటికే అన్ని కార్యక్రమాలు పూర్తిచేసుకున్న ఈ మూవీ జూన్ 3న ప్రేక్షకుల ముందుకు రాబోతుంది.

ఇక గురువారం ఈ సినిమా సెన్సార్ కార్యక్రమాలను సైతం పూర్తిచేసుకున్న సంగతి తెలిసిందే. సెన్సార్ బోర్డ్ ఈ చిత్రానికి యు/ఎ సర్టిఫికెట్ ఇచ్చింది. స్టార్ హీరో నితిన్ హోమ్ బ్యానర్ శ్రేష్ఠ్ మూవీస్ ఈ చిత్రాన్ని తెలుగు రాష్ట్రాల్లో విడుదల చేయనుంది. ఇప్పటికే ట్రైలర్‌తో ప్రమోషన్‌ల జోరు పెంచారు. ఆంధ్రప్రదేశ్, తెలంగాణలో 400+ థియేటర్లలో ఈ చిత్రం భారీగా విడుదల కానుంది. ఇదీలావుండగా నితిన్ తండ్రి నిర్మాత డిస్ట్రిబ్యూటర్ సుధాకర్ రెడ్డి, కమల్ హాసన్‌ను కలిసేందుకు చెన్నై వెళ్లారు. ఈ సందర్భంగా విక్రమ్ తెలుగు పోస్టర్‌ను కమల్ హాసన్‌కి అందించారు. తెలుగులో ప్రమోషన్ స్ట్రాటజీ గురించి చర్చించారు. కమల్ హాసన్ తో పాటు చిత్ర యూనిట్ తో తెలుగులో గ్రాండ్ ఈవెంట్‌ని ప్లాన్ చేస్తున్నారు. ఈ చిత్రానికి అనిరుధ్ రవిచందర్ సంగీతం అందిస్తుండగా, గిరీష్ గంగాధరన్ సినిమాటోగ్రాఫర్ గా, ఫిలోమిన్ రాజ్ ఎడిటర్ గా పని చేస్తున్నారు.