తమిళ బ్యూటీ… మూడు పెద్ద ప్రాజెక్టులు!

ఈ మధ్యకాలంలో తెలుగు పరిశ్రమపై ఇతర భాష హీరోయిన్ల ఆసక్తి ఎక్కువైందని చెప్పాలి. బాలీవుడ్ నుంచి కోలీవుడ్ వరకు అందరూ కూడా తెలుగు సినిమాలో నటించడం కోసం వరుసగా క్యూ కడుతున్నారు. ఇక ఈ జాబితాలో తమిళ నటి నివేదా పేతురాజ్ ఒకరు. హీరో శ్రీ విష్ణు ప్రధాన పాత్రలో నటించిన ‘మెంటల్ మదిలో’ సినిమాతో తెలుగులోకి  ఎంట్రీ ఇచ్చిన ఆమె.. ఆ తర్వాత ‘చిత్రలహరి’, ‘బ్రోచేవారెవరురా’ సినిమాల్లో నటించి మెప్పించింది.

ఇది ఇలా ఉండగా ఆమె చేతిలో ప్రస్తుతం మూడు పెద్ద ప్రాజెక్టులు ఉన్నట్లు తెలుస్తోంది. వాటిలో రెండు స్టైలిష్ స్టార్ అల్లు అర్జున్ సినిమాలే కావడం విశేషం. త్రివిక్రమ్, బన్నీ కాంబినేషన్‌లో రూపొందుతున్న సినిమాలో నటిస్తున్న ఆమె వేణు శ్రీరామ్ డైరెక్షన్‌లో తెరకెక్కనున్న ‘ఐకాన్’ చిత్రంలో కూడా అవకాశం దక్కించుకుందని సమాచారం. ఇక వీటితో పాటు రామ్, కిషోర్ తిరుమల కొత్త చిత్రంలో కూడా ఆమె మెయిన్ హీరోయిన్‌గా ఎంపికైనట్లు తెలుస్తోంది. మొత్తానికి ఈ చెన్నై చిన్నది సైలెంట్‌గా తెలుగు పరిశ్రమలో పాగా వేసేలా కనిపిస్తోంది.