విక్రమ్-ఇర్ఫాన్‌ పఠాన్‌ మూవీ టైటిల్, మోషన్ పోస్టర్ విడుదల

హిట్, ఫ్లాప్‌లను పట్టించుకోకుండా వైవిధ్య కథల్లో నటించేందుకే ఆసక్తిని చూపే చియాన్ విక్రమ్.. ప్రస్తుతం అజయ్ ఙ్ఞానముత్తు దర్శకత్వంలో నటిస్తోన్న విషయం తెలిసిందే. విక్రమ్ 58వ చిత్రంగా తెరకెక్కుతున్న ఈ మూవీ ద్వారానే టీమిండియా మాజీ క్రికెటర్ ఇర్ఫాన్ పఠాన్ సినీ ఇండస్ట్రీలోకి పరిచయం అవుతున్నాడు. ఇక ఈ చిత్రంలో విక్రమ్ సరసన శ్రీనిధి శెట్టి నటిస్తుండగా.. దర్శకుడు కేఎస్ రవికుమార్ మరో కీలక పాత్రలో కనిపించనున్నారు. కాగా క్రిస్మస్‌ను పురస్కరించుకొని ఈ మూవీ టైటిల్‌తో పాటు పోస్టర్‌ను విడుదల చేశారు. మొదట ఈ మూవీకి అమర్ అనే టైటిల్ పెట్టబోతున్నట్లు వార్తలు వచ్చినప్పటికీ.. తాజాగా కోబ్రాను ఫిక్స్ చేశారు.

ఈ సందర్భంగా వచ్చిన మోషన్ పోస్టర్‌ కూడా అందరినీ ఆకట్టుకుంటోంది. చూస్తుంటే థ్రిల్లర్ కథాంశంతో ఈ చిత్రం తెరకెక్కినట్లు అర్థమవుతోంది. కాగా ఇందులో విక్రమ్ 25 పాత్రల్లో కనిపించబోతున్నట్లు వార్తలు వినిపిస్తున్నాయి. 7 స్క్రీన్ స్టూడియో నిర్మిస్తోన్న ఈ మూవీకి రెహమాన్ సంగీతం అందిస్తుండగా.. వచ్చే ఏడాది జూన్‌లో కోబ్రాను ప్రేక్షకుల ముందుకు తీసుకురావాలని దర్శకనిర్మాతలు ప్లాన్ చేస్తున్నారు. కాగా గత కొన్నేళ్లుగా విక్రమ్ ఖాతాలో మంచి హిట్ లేదు. ఈ ఏడాది వచ్చిన కదరమ్ కోండన్(తెలుగులో మిస్టర్ కేకే) కమర్షియల్‌గా హిట్ అయినప్పటికీ.. గొప్ప విజయంగా నిలవలేదు. ఈ నేపథ్యంలో కోబ్రా చిత్రంపై చాలా అంచనాలు పెట్టుకున్నాడు విక్రమ్. ఇదిలా ఉంటే గౌతమ్ మీనన్ దర్శకత్వంలో విక్రమ్ నటించిన ధ్రువ నచ్చిత్రమ్ షూటింగ్ ఎప్పుడో పూర్తి అయినప్పటికీ.. కొన్ని కారణాల వలన ఈ మూవీ ఇప్పటికీ విడుదలకు నోచుకోలేదు.