ఘోర రోడ్డు ప్రమాదం: వాగులోకి దూసుకెళ్లిన కారు.. ఆరుగురు మృతి

గుంటూరు జిల్లాలో ఘోర రోడ్డు ప్రమాదం జరిగింది. ఈ ప్రమాదంలో ఆరుగురు కుటుంబసభ్యులు అక్కడికక్కడే మృతి చెందారు. వట్టి చెరుకూరు మండలంలోని పుల్లడిగుంటలో ఈ విషాద ఘటన చోటుచేసుకుంది. అదుపుతప్పిన తుఫాన్ వాహనం వాగులోకి దూసుకెళ్లింది. ఈ ఘటనలో ఆరుగురు మృతి చెందగా, పలువురు గాయపడ్డారు. కాగా మృతులు కాకాని గ్రామానికి చెందినవారిగా గుర్తించారు. ఓ శుభకార్యానికి వెళ్లి వస్తుండగా ఈ ప్రమాదం చోటుచేసుకుంది. మృతులు పొగడ్త వీరలక్ష్మి(48), పొగడ్త రమణ(48), సమాధుల వన్నూరు(55), సమాధుల సీతమ్మ(65), సమాధుల శ్రీను(50)లు కాగా.. మరికొందరి వివరాలు తెలియాల్సి ఉంది. అయితే అతివేగమే ఈ ప్రమాదానికి కారణమని పోలీసులు అభిప్రాయపడుతున్నారు. క్షతగాత్రులను గుంటూరు ప్రభుత్వ ఆస్పత్రికి తరలించి చికిత్స అందిస్తున్నారు.