బుడ్డొడి ప్రాణం తీసిన కిల్లర్ పెన్ క్యాప్ !

అనంతపురం జిల్లాలో విషాద సంఘటన చోటు చేసుకుంది. ఏడేళ్ల బాలుడు స్కూల్లో అనుమానాస్పద స్థితిలో మృతిచెందాడు. జిల్లా కేంద్రానికి సమీపంలోని ఓ ప్రైవేట్ స్కూల్ లో చదువుకుంటున్న ఏడేళ్ల చిన్నారి క్లాస్ రూమ్ లో ఊపిరాడని స్థితిలో కనిపించాడు. బాలుడి పరిస్థితిని గమనించిన తోటి విద్యార్థులు వెంటనే క్లాస్ టీచర్ కు చెప్పారు. దీంతో స్కూల్ యాజమాన్యం సాయంతో 108 వాహనంలో బాలుడిని హుటాహుటినా స్థానిక ప్రభుత్వాసుపత్రికి తీసుకెళ్లారు. అయితే, అప్పటికే బాలుడు మృతిచెందినట్లుగా వైద్యులు వెల్లడించారు. విషయం తెలుసుకున్న బాలుడి తల్లిదండ్రులు పాఠశాల ఎదుట ఆందోళకు దిగారు. స్కూల్ యాజమాన్యం నిర్లక్ష్యం కారణంగానే తమ కుమారుడు చనిపోయాడని ఆరోపించారు. తమ బిడ్డ బాగా చదువుకోవాలనే ఆశతో లక్షల ఫీజులు కడుతూ పాఠశాలలో చేర్పించామని, యాజమన్యం విద్యార్థులను పట్టించుకోకపోవటం కారణంగానే చిన్నారులు ప్రమాదాలకు గురవుతున్నారని ఆవేదన వ్యక్తం చేశారు. అయితే, జరిగిన ఘటనపై పాఠశాల యాజమాన్యం మాత్రం..బాలుడు పెన్ను క్యాప్ మింగాడని, దానివల్లే ఊపిరాడక మరణించాడని చెబుతున్నారు. కేసు నమోదు చేసుకున్న పోలీసులు దర్యాప్తు చేపట్టారు.