కరోనా వైరస్‌ని కట్టడి చేసిన మాస్కులు.. న్యూ స్టడీ

ముఖ మాస్కులు కరోనా వైరస్‌ని చాలావరకు కట్టడి చేశాయని ఓ నూతన అధ్యయనంలో తేలింది. ఈ నిబంధనలను పాటించకుంటే.. ఇంకా లక్షలాది ఇన్ఫెక్షన్లు సోకి ఉండేవని ఈ స్టడీ పేర్కొంది. ఏప్రిల్ 6 నుంచి  ఇటలీలో, అదే నెల 17 న న్యూయార్క్ సిటీలోను ప్రజలు మాస్కులు ధరించడం ప్రారంభించారు. ఈ వైరస్ వ్యాప్తి నివారణకు మాస్కుల ధారణ చాలా ముఖ్యమని.. భౌతిక దూరం పాటింపు, స్టే ఎట్ హోమ్ వంటి ఉత్తర్వులు కూడా వైరస్‌ని కట్టడి చేయగలిగాయని రీసెర్చర్లు వివరించారు. తమ అధ్యయన ఫలితాలను వీరు నేషనల్ అకాడమీ ఆఫ్ సైన్సెస్‌లో ప్రచురించారు.

ఏప్రిల్ 6, మే 9 మధ్య  ఇటలీలో ఇన్ఫెక్షన్లు 78 వేల వరకు ….. అలాగే న్యూయార్క్ సిటీలో ఏప్రిల్ 17-మే 9 మధ్య 66 వేల వరకు ఇన్ఫెక్షన్లు  తగ్గాయి అని వీరు పేర్కొన్నారు.  ముఖ్యంగా న్యూయార్క్‌లో మాస్కులను తప్పనిసరి చేయడం వల్ల ఇన్ఫెక్షన్ల రేటు రోజుకు సుమారు 3 శాతం తగ్గినట్టు  తెలిపారు. కానీ దేశంలో ఇతర చోట్ల వైరస్ కేసులు పెరుగుతూనే ఉన్నాయన్నారు. ఈ నిబంధనల విధింపునకు ముందు.. క్వారంటైన్, ఐసోలేషన్, హ్యాండ్ శానిటైజేషన్ వంటి చర్యలు కూడా చేపట్టారని, కానీ డైరెక్ట్ కాంటాక్ట్ ద్వారా వైరస్ ఇన్ఫెక్షన్స్‌ని ఇవి పరిమితం మాత్రమే చేయగలిగాయని ఈ పరిశోధకులు స్పష్టం చేశారు.