Insurance: పిల్లల భవిష్యత్తే ముఖ్యం.. ఈ ఇన్సూరెన్స్కు పెరుగుతున్న ఆదరణ
భారతీయ మహిళలు తమ ఆర్థిక ప్రాధాన్యతలను ఎలా మార్చుకుంటున్నారు? ముఖ్యంగా పిల్లల భవిష్యత్తు, ఆరోగ్యం పట్ల వారి ఆలోచనలు ఏమిటి? ప్రముఖ బీమా సంస్థ బజాజ్ అలయంజ్ లైఫ్ ఇన్సూరెన్స్ నిర్వహించిన ఒక సర్వేలో ఈ ఆసక్తికర విషయాలు వెల్లడయ్యాయి. టర్మ్ ఇన్సూరెన్స్ను కేవలం ప్రాణరక్షణకే కాకుండా, తమ కుటుంబాలకు సమగ్ర ఆర్థిక భద్రత కల్పించే సాధనంగా మహిళలు ఎలా చూస్తున్నారో ఈ సర్వే స్పష్టం చేసింది. ఈ వివరాలను లోతుగా పరిశీలిద్దాం.
Updated on: Jun 20, 2025 | 5:51 PM
భారతీయ దిగ్గజ ప్రైవేట్ లైఫ్ ఇన్సూరెన్స్ సంస్థ బజాజ్ అలయంజ్ లైఫ్ ఇన్సూరెన్స్ ఓ కీలక సర్వే నిర్వహించింది. పిక్సిస్ గ్లోబల్, క్వాల్స్.ఏఐ భాగస్వామ్యంతో చేపట్టిన ‘బజాజ్ అలయంజ్ లైఫ్ ఉమెన్ టర్మ్ సర్వే’ ఆసక్తికర అంశాలను వెలుగులోకి తెచ్చింది. దేశంలోని మెట్రో, ప్రథమ, ద్వితీయ శ్రేణి నగరాల నుండి వెయ్యి మందికి పైగా ఉద్యోగినులు, స్వయం ఉపాధి పొందుతున్న మహిళలు ఈ సర్వేలో పాలుపంచుకున్నారు.
ఆర్థిక ప్రాధాన్యతలలో మార్పులు
మహిళల ఆర్థిక ప్రాధాన్యతలలో గణనీయమైన మార్పులు చోటు చేసుకున్నట్లు సర్వే స్పష్టం చేసింది. పిల్లల భవిష్యత్తు, వారి విద్యా వ్యయాలు, ఆరోగ్యం ముఖ్యమైన అంశాలుగా మారాయి. పిల్లల భవిష్యత్తు రక్షణకు ఆర్థిక సాధనాలలో టర్మ్ ఇన్సూరెన్స్కు మహిళలు ప్రాధాన్యత ఇస్తున్నారు. ఆరోగ్య సంబంధిత రిస్కులపై వారిలో అవగాహన పెరిగినట్లు ఇది సూచిస్తుంది.
వైద్యపరమైన అనూహ్య ఖర్చుల వల్ల తమ కుటుంబ పొదుపు తీవ్రంగా దెబ్బతింటుందని 53 శాతం మంది మహిళలు ఆందోళన వ్యక్తం చేశారు.
క్రిటికల్ ఇల్నెస్ కవరేజీకి అత్యధిక ప్రాధాన్యత ఇవ్వాలని 87 శాతం మంది పేర్కొన్నారు. తమ టర్మ్ ప్లాన్లో అంతర్గతంగా హెల్త్ మేనేజ్మెంట్ సేవలు తప్పనిసరిగా ఉండాలని 50 శాతం మంది తెలిపారు.
పిల్లల చదువు ప్రయోజనాలు టర్మ్ ప్లాన్లో భాగంగా ఉండాలని మహిళలు ఆకాంక్షిస్తున్నారు. ఆర్థికంగా స్వతంత్రంగా ఉన్న మహిళలు, బీమాను కేవలం జీవిత రక్షణకు మాత్రమే పరిమితం చేయకుండా, దీర్ఘకాలిక ఆరోగ్యం, కుటుంబ సంక్షేమానికి ఉపయోగపడే సాధనంగా పరిగణిస్తున్న విషయాన్ని ఈ సర్వే ధృవీకరిస్తుంది.
సర్వేలో ప్రధానాంశాలు
ఏదైనా అనుకోనిది జరిగితే పిల్లలకు ఆర్థిక స్థిరత్వం ఎలా కల్పించాలనేది 61 శాతం మంది మహిళల ప్రాథమిక ఆందోళన. ఆదాయ స్థిరత్వం (61%), ఆరోగ్య వ్యయాలు (53%), రిటైర్మెంట్ ప్లానింగ్ (54%), పిల్లల చదువు (57%) ప్రధాన ఆర్థిక ప్రాధాన్యతలుగా ఉన్నాయి.
తమ పిల్లల ఆర్థిక భవిష్యత్తును కాపాడటానికి 46 శాతం మంది మహిళలు టర్మ్ ఇన్సూరెన్స్లో పెట్టుబడులకు ప్రాధాన్యం ఇస్తున్నారు. ఈ లక్ష్య సాధనకు ఇది ఆర్థికంగా అత్యంత ముఖ్యమైన ఎంపికగా నిలుస్తుంది.
టర్మ్ ఇన్సూరెన్స్లో ‘క్రిటికల్ ఇల్నెస్ కవరేజీ’ అత్యంత ఆకర్షణీయమైన అంశమని 87 శాతం మంది మహిళలు భావిస్తున్నారు. టర్మ్ ప్లాన్లో ‘అంతర్గతంగా హెచ్ఎంఎస్, హెల్త్/సీఐ కవర్’ తప్పనిసరిగా ఉండాలని 57 శాతం మంది మహిళలు కోరుకుంటున్నారు.
టర్మ్ ప్లాన్లో ‘చైల్డ్ ఇన్కం సెక్యూరిటీ’ ఫీచర్ అత్యంత ఆకర్షణీయమైనదిగా 93 శాతం మంది మహిళలు భావిస్తున్నారు.
మహిళలు కోరుకునే ఇతర ఫీచర్లు:
జీవితంలో ముందుకెళ్లే కొద్దీ పరిస్థితులకు అనుగుణంగా కవరేజీ పెంచుకునే వెసులుబాటు, మెచ్యూరిటీ బెనిఫిట్స్ కావాలని 51 శాతం మంది ఆశిస్తున్నారు. టర్మ్ ప్లాన్లలో పిల్లల చదువుపరంగా ఆర్థిక ప్రయోజనాలు తప్పనిసరిగా ఉండాలని 33 శాతం మంది తల్లులు కోరుకుంటున్నారు. అత్యధిక లైఫ్ కవరేజీ ఉన్న టర్మ్ ప్లాన్లు కావాలని 28 శాతం మంది మహిళలు ఆకాంక్షిస్తున్నారు.
టర్మ్ ప్లాన్లలో లోపాలు:
కవరేజీని సవరించుకునే వెసులుబాటు లేకపోవడం, మెచ్యూరిటీ ప్రయోజనాలు లేకపోవడం, క్లెయిమ్ ప్రక్రియలు సంక్లిష్టంగా ఉండటం ప్రధాన నిరోధకాలుగా ఉన్నాయని మహిళలు తెలిపారు. ప్రీమియంలు అందుబాటు స్థాయిలో ఉండాలని, హెల్త్/సీఐ కవరేజీ రైడర్లు కావాలని అత్యధికంగా కోరుకుంటున్నారు.
