ఇల్లు కట్టుకుంటున్నారా? మార్బుల్, గ్రానైట్, కోటా స్టోన్.. ఏది తక్కువ ధరలో వస్తుందో తెలుసుకోండి?

ఇల్లు లేదా ఆఫీసు నిర్మాణంలో ఫ్లోరింగ్ అందాన్ని నిర్ణయించే ప్రధాన అంశాల్లో ఒకటి. ప్రస్తుతం చాలా మంది మార్బుల్, గ్రానైట్ లేదా కోటా స్టోన్‌లలో ఏదో ఒకదాన్ని ఎంచుకుంటున్నారు. అయితే వీటిలో ఏది తక్కువ ఖర్చుతో పాటు ఎక్కువ మన్నికను అందిస్తుందనే సందేహం చాలామందికి ఉంటుంది.

కోటా స్టోన్.. తక్కువ బడ్జెట్‌తో ఫ్లోరింగ్ చేయాలనుకునే వారికి మంచి ఎంపికగా భావిస్తారు. దీని ధర సాధారణంగా చదరపు అడుగుకు రూ.20 నుంచి రూ.100 వరకు ఉంటుంది. రకం, రంగును బట్టి ధర మారుతుంది. ఇన్‌స్టాలేషన్‌తో కలిపి మొత్తం ఖర్చు సుమారుగా చదరపు అడుగుకు రూ.50 నుంచి రూ.80 వరకు పడుతుంది. ఎక్కువకాలం మన్నికగా ఉండటం, తక్కువ నిర్వహణ ఖర్చు దీని ప్రత్యేకత.

గ్రానైట్ మధ్యస్థ బడ్జెట్ ఉన్నవారికి అనుకూలంగా ఉంటుంది. దీని ధర చదరపు అడుగుకు సుమారు రూ.60 నుంచి రూ.300 వరకు ఉంటుంది. రంగు, డిజైన్, నాణ్యత ఆధారంగా ధర పెరుగుతుంది. ఫిట్టింగ్, లేబర్ ఖర్చు మరో రూ.30 నుంచి రూ.60 వరకు ఉండొచ్చు. గ్రానైట్ మరకలను సులభంగా నిరోధిస్తుంది. పాలిషింగ్ కూడా సులభంగా చేయవచ్చు.

మార్బుల్ మాత్రం అత్యంత ఖరీదైన ఎంపికగా చెప్పొచ్చు. సాధారణ మార్బుల్ ధర చదరపు అడుగుకు రూ.100 నుంచి రూ.500 వరకు ఉండగా, ఇటాలియన్ మార్బుల్ వంటి ప్రీమియం రకాల ధరలు ఇంకా ఎక్కువగా ఉంటాయి. ఫిట్టింగ్, గ్రైండింగ్, లేబర్ కోసం మరో రూ.50 నుంచి రూ.100 వరకు ఖర్చు అవుతుంది. నిర్వహణ ఖర్చు కూడా ఎక్కువే. అయితే ఇది ఇంటికి విలాసవంతమైన, ప్రీమియం లుక్‌ను అందిస్తుంది.

మీ ఇంటికి ఏ రాయి సరిపోతుందో నిర్ణయించే ముందు, దాన్ని ఏ ప్రదేశంలో ఉపయోగించబోతున్నారో, ఎంత బడ్జెట్ కేటాయించారో పరిశీలించడం మంచిది. గదులు, మెట్లు, బాత్రూమ్‌లు లేదా ప్రాంగణాలకు అవసరాన్ని బట్టి కోటా స్టోన్, గ్రానైట్ లేదా మార్బుల్‌ను ఎంచుకుంటే ఖర్చు, అందం, మన్నిక మధ్య సరైన సమతుల్యత సాధించవచ్చు.