అక్షయ తృతీయ.. వేల కోట్ల విలువైన బంగారం అమ్మకాలు! అయినా కూడా..

మన దేశంలో శతాబ్దాలుగా కొనసాగుతున్న బంగారం కొనుగోలు సంప్రదాయం ఒక నిశ్శబ్ద కానీ గణనీయమైన మార్పు దిశగా సాగుతోంది. ఈ ఏడాది అక్షయ తృతీయ సందర్భంగా దాదాపు రూ.20,000 కోట్ల విలువైన బంగారం కొనుగోలు జరిగినప్పటికీ, ఓ ఆసక్తికరమైన విషయం వెలుగులోకి వచ్చింది. ధరలు గత ఏడాదితో పోలిస్తే సుమారు 60 శాతం పైగా పెరగడంతో, వినియోగదారులు ఖర్చు ఎక్కువ చేసినా కొనుగోలు చేసిన బంగారం పరిమాణం తగ్గింది. వ్యాపారుల అంచనాల ప్రకారం, పండుగ సీజన్‌లో సగటు విక్రయాలు 25 నుంచి 50 గ్రాముల మధ్యే పరిమితమయ్యాయి.

మరో ముఖ్యమైన పరిణామం ఏమిటంటే, కొత్త కొనుగోళ్లలో దాదాపు సగం వరకూ పాత బంగారాన్ని మార్పిడి చేసుకోవడమే జరిగింది. అంటే మార్కెట్‌లోకి కొత్త డబ్బు ప్రవాహం తగ్గిపోగా, కుటుంబాల వద్ద ఉన్న బంగారమే తిరిగి వినియోగంలోకి వస్తోంది. దీంతో భారత బంగారం మార్కెట్ క్రమంగా ఒక సర్క్యులర్ మోడల్ వైపు మారుతున్నట్లు నిపుణులు భావిస్తున్నారు. ఇక డిజిటల్ రూపంలోని బంగారం పెట్టుబడులు వేగంగా పెరుగుతున్నాయి. ఒకే త్రైమాసికంలో గోల్డ్ ETFలలో భారీగా రూ.31,600 కోట్ల ఇన్వెస్ట్‌మెంట్ నమోదవ్వడం, అలాగే డిజిటల్ గోల్డ్ లావాదేవీలు దాదాపు 69 శాతం పెరగడం ఈ మార్పుకు నిదర్శనం. గోల్డ్‌ ETFs, సావరిన్‌ గోల్డ్‌ బాండ్స్‌ వంటి ఆర్థిక సాధనాలు పెట్టుబడిదారులను ఆకర్షిస్తున్నాయి. భౌతిక బంగారంతో పోలిస్తే నిల్వ సమస్యలు లేకపోవడం, తక్కువ ఖర్చుతో కొనుగోలు చేసే సౌలభ్యం ఉండటం వీటి ప్రత్యేకత.

అయితే ఈ మార్పుల మధ్య కూడా బంగారం పట్ల భారతీయుల భావోద్వేగ అనుబంధం అలాగే కొనసాగుతోంది. పండుగలు, శుభకార్యాల్లో బంగారం కొనుగోలు సంప్రదాయం కొనసాగుతూనే ఉంది. కానీ ఇప్పుడు వినియోగదారులు సంప్రదాయాన్ని పూర్తిగా విడిచిపెట్టకుండా, ఆధునిక పెట్టుబడి మార్గాలను కూడా స్వీకరిస్తున్నారు. ఈ పరిణామం భారత ఆర్థిక వ్యవస్థలో ఒక పెద్ద మార్పుకు సంకేతంగా భావిస్తున్నారు. భౌతిక ఆస్తుల నుంచి ఆర్థిక ఆస్తుల వైపు ప్రజలు మళ్లుతున్న ధోరణి వేగం పుంజుకుంటోంది. భవిష్యత్తులో భారతీయ కుటుంబాల సంపద నిర్వహణ విధానంలో ఇది కీలక మార్పులకు దారి తీసే అవకాశముంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి