వాహనదారులకు బిగ్ గుడ్ న్యూస్.. కేవలం 3 వేలతో ఏడాది మొత్తం టోల్ ఫ్రీ..
వాహనదారులకు కేంద్ర ప్రభుత్వం అదిరిపోయే శుభవార్త చెప్పింది. టోల్ ప్లాజా సమీపంలో నివసించే వారి కోసం ఫాస్టాగ్ నిబంధనల్లో కీలక మార్పులు చేస్తూ కొత్త పాలసీని అమల్లోకి తెచ్చింది. ఇకపై ప్రతి నెలా పాస్ రెన్యూవల్ చేసుకోవాల్సిన తిప్పలు లేకుండా.. కేవలం రూ.3,000తో ఏడాది మొత్తం ఎన్నిసార్లైనా టోల్ గేట్ దాటొచ్చని స్పష్టం చేసింది. ఈ కొత్త వార్షిక పాస్ ఎవరికి వర్తిస్తుంది? ఎలా పొందాలి? అనే వివరాలు ఈ స్టోరీలో తెలుసుకుందాం..
Updated on: Oct 08, 2026 | 4:59 PM
జాతీయ రహదారులపై ప్రయాణించే స్థానిక వాహనదారులకు కేంద్ర రోడ్డు రవాణా, రహదారుల మంత్రిత్వ శాఖ భారీ ఊరటనిచ్చింది. టోల్ ప్లాజాల సమీపంలో నివసించే వారి కోసం ఫాస్టాగ్ వార్షిక పాస్‌లకు సంబంధించి కీలక మార్గదర్శకాలను విడుదల చేసింది. టోల్ ప్లాజాకు 20 కిలోమీటర్ల పరిధిలోని నాన్ కమర్షియల్ వాహన యజమానులకు అత్యంత తక్కువ రుసుముతో వార్షిక లోకల్ ఫాస్టాగ్ పాస్ సౌకర్యాన్ని అందుబాటులోకి తీసుకొచ్చింది. గతంలో అమల్లో ఉన్న నిబంధనల ప్రకారం.. రూ. 3,075 వార్షిక పాస్ తీసుకున్నప్పటికీ ఏడాదికి గరిష్టంగా 200 ట్రిప్పులకు మాత్రమే అనుమతి ఉండేది. లేదా ప్రతి నెలా నిర్దిష్ట రుసుము చెల్లించి మంత్లీ పాస్‌ను రెన్యూవల్ చేసుకోవాల్సి వచ్చేది. తాజా నిబంధనలతో ఈ సమస్యలకు శాశ్వత పరిష్కారం లభించింది. సుమారు రూ. 3 వేల స్థిర రుసుముతో తీసుకునే ఈ కొత్త వార్షిక పాస్‌తో ఏడాది పొడవునా సదరు టోల్ ప్లాజా గుండా ఎన్నిసార్లైనా ప్రయాణించవచ్చు.ప్రతి నెలా పాస్ గడువు ముగిసిందని ఆందోళన చెందాల్సిన పనిలేకుండా, ఏడాదికి ఒకేసారి రీఛార్జ్ చేసుకుంటే సరిపోతుంది.
ఈ నిబంధనలు ఎవరికి వర్తిస్తాయి?
సంబంధిత జాతీయ రహదారి టోల్ ప్లాజా కేంద్ర బిందువు నుంచి 20 కిలోమీటర్ల పరిధిలో శాశ్వతంగా నివసించే నివాసితులకు మాత్రమే ఈ వెసులుబాటు వర్తిస్తుంది. ఈ రాయితీ పూర్తిగా వైట్ నంబర్ ప్లేట్ గల కార్లు, జీపులు, వ్యాన్లు వంటి ప్రైవేట్ వాహనాలకు మాత్రమే పరిమితం. ట్యాక్సీలు లేదా ఇతర కమర్షియల్ వాహనాలకు ఇది వర్తించదు. ఫాస్టాగ్‌ను స్థానిక పాస్‌గా మార్చుకోవడానికి వాహన ఆర్సీతో పాటు ఆధార్ కార్డు లేదా ఓటర్ ఐడీ వంటి స్థానిక చిరునామా ధ్రువీకరణ పత్రాలను సమర్పించాల్సి ఉంటుంది. ప్రక్రియ మొత్తం డిజిటల్ విధానంలో సాగుతుంది.
స్థానికులకు దక్కే ప్రధాన ప్రయోజనాలు
నిత్యం ఉద్యోగం, వ్యాపారం, పాఠశాలలు లేదా వ్యవసాయ పనుల నిమిత్తం రోజుకు రెండు మూడు సార్లు టోల్ ప్లాజా దాటే వారికి వేల రూపాయల టోల్ చార్జీలు ఆదా అవుతాయి. లోకల్ పాస్ ఫాస్టాగ్‌తో నేరుగా అనుసంధానం కావడం వల్ల టోల్ గేట్ల వద్ద ఆగాల్సిన అవసరం లేకుండా ఆటోమేటిక్ గేట్ ఓపెన్ అవుతుంది. స్థానికుల ఐడీ చెకింగ్ పేరుతో జరిగే వాగ్వాదాలు, ట్రాఫిక్ జామ్‌లకు తెరపడుతుంది. ఎలాంటి మాన్యువల్ జోక్యం లేకుండా నేరుగా ఫాస్టాగ్ పోర్టల్ లేదా యాప్ ద్వారానే పాస్ పొందవచ్చు. స్థానికులపై పడే ఆర్థిక భారాన్ని గణనీయంగా తగ్గించడంతో పాటు జాతీయ రహదారులపై టోల్ వసూళ్ల ప్రక్రియను మరింత వేగవంతం, పారదర్శకం చేయడమే లక్ష్యంగా కేంద్రం ఈ కొత్త విధానాన్ని అమలులోకి తెచ్చింది.
