Budget 2024: ఈ బడ్జెట్‌లో మధ్యతరగతి వారికి ఉపశమనం కలుగనుందా?

Union Budget

సార్వత్రిక ఎన్నికలకు కొద్ది నెలల ముందు ప్రకటించనున్న ఫిబ్రవరి 1న రానున్న మధ్యంతర బడ్జెట్‌లో ప్రభుత్వం ప్రజాకర్షక ప్రకటనలకు దూరంగా ఉంటుందని ఆర్థిక నిపుణులు భావిస్తున్నారు. బడ్జెట్ 2024-25 బదులుగా ఆర్థిక వివేకంపై దృష్టి పెడుతుంది. అయితే, మహిళలు కొన్ని ప్రత్యేక పన్ను ఉపశమన చర్యలను పొందుతారని కొందరు నమ్ముతున్నారు. పాత పెన్షన్ విధానాన్ని తప్పనిసరిగా అమలు చేయాలనే డిమాండ్ల మధ్య కొత్త పెన్షన్ స్కీమ్ (ఎన్‌పిఎస్)ని కూడా ప్రభుత్వం ఆకర్షణీయంగా చేస్తుంది. ఎన్నికల సంవత్సరంలో స్టాండర్డ్ డిడక్షన్‌ని పెంచడం ద్వారా ప్రభుత్వం మధ్యతరగతి వారికి కొంత ఉపశమనం కలిగించే అవకాశం కూడా ఉంది.

ఆర్థిక మంత్రి నిర్మలా సీతారామన్ ఫిబ్రవరి 1న పార్లమెంట్‌లో 2024-25 మధ్యంతర బడ్జెట్‌ను ప్రవేశపెట్టనున్నారు. ఇది ఆమెకు ఆరో బడ్జెట్. ప్రఖ్యాత ఆర్థికవేత్త, బెంగళూరులోని డాక్టర్ బీఆర్ అంబేద్కర్ స్కూల్ ఆఫ్ ఎకనామిక్స్ యూనివర్శిటీ వైస్-ఛాన్సలర్ డాక్టర్ ఎన్ఆర్ భానుమూర్తి మాట్లాడుతూ.. ప్రభుత్వ గత చరిత్రను బట్టి రానున్న మధ్యంతర బడ్జెట్ ప్రజాకర్షకమయ్యే అవకాశం లేదని అన్నారు. ఎందుకంటే, ప్రధానమంత్రి గరీబ్ కళ్యాణ్ అన్న యోజన వంటి పథకాలను ప్రధానమంత్రి ఇప్పటికే ప్రకటించారు. రాబోయే సంవత్సరాల్లో ఇవి కొనసాగే అవకాశం ఉంది.

పెన్షన్ స్కీమ్ (ఎన్‌పిఎస్) ఆకర్షణీయంగా ఉండేలా బడ్జెట్‌లో ప్రభుత్వం కొన్ని ప్రకటనలు చేయవచ్చని అంచనాలు ఉన్నాయని ఆయన అన్నారు. పాత పెన్షన్ స్కీమ్ రాజకీయ సమస్య దృష్ట్యా ఇది జరగవచ్చు. పంజాబ్, రాజస్థాన్ సహా ఇతర రాష్ట్రాలు ఇప్పటికే పాత పెన్షన్ విధానాన్ని అమలు చేశాయి. ఇది చూసి కేంద్ర ప్రభుత్వ ఉద్యోగులు కూడా పాత పెన్షన్ విధానాన్ని అమలు చేయాలని డిమాండ్ చేశారు. ఇది చూసిన ప్రభుత్వం జాతీయ పెన్షన్ వ్యవస్థ (ఎన్‌పీఎస్)పై సమీక్షించేందుకు గతేడాది ఏప్రిల్‌లో ఆర్థిక శాఖ కార్యదర్శి టీవీ సోమనాథన్‌ నేతృత్వంలో కమిటీని ఏర్పాటు చేసింది.

మరిన్ని బిజినెస్ వార్తల కోసం ఇక్కడ క్లిక్ చేయండి