గ్యాసే కాదు.. బ్యాంక్‌ లాకర్లు కూడా దొరకడం లేదు! ఈ కొరతకు కారణం ఏంటంటే?

ఇండియాలో బ్యాంక్ లాకర్ పొందడం క్రమంగా క్లిష్టంగా మారుతోంది. ఒకప్పుడు సాధారణ బ్యాంకింగ్ సేవగా భావించిన లాకర్లు, ఇప్పుడు వెయిటింగ్ లిస్ట్‌లు, పరిమిత లభ్యతతో వినియోగదారులకు సవాలుగా మారాయి. నిపుణుల ప్రకారం డిమాండ్-సరఫరా మధ్య ఉన్న పెద్ద అంతరం ఈ సమస్యకు ప్రధాన కారణం. పెరుగుతున్న ఆదాయాలు, బంగారం వంటి విలువైన ఆస్తులపై భారతీయుల ఆసక్తి పెరగడం వల్ల లాకర్లకు డిమాండ్ గణనీయంగా పెరిగింది. మరోవైపు, బ్యాంకులు లాకర్ సేవలను విస్తరించడంలో ఆసక్తి చూపడం లేదు. కారణం.. ఈ సేవలు అధిక లాభదాయకం కావు. రుణాలు, డిపాజిట్లతో పోలిస్తే లాకర్ సేవలు బ్యాంకులకు తక్కువ ఆదాయం తెస్తాయి.

ఇక నగరాల్లో స్థలాభావం కూడా ఒక ప్రధాన సమస్య. ముఖ్యంగా మెట్రో నగరాల్లో భూమి, రియల్ ఎస్టేట్ ఖర్చులు ఎక్కువగా ఉండటంతో కొత్త లాకర్ సదుపాయాలను ఏర్పాటు చేయడం కష్టతరమవుతోంది. ఇటీవలి కాలంలో RBI అమలు చేసిన కఠిన నిబంధనలు కూడా ఈ పరిస్థితిని ప్రభావితం చేశాయి. బయోమెట్రిక్ యాక్సెస్, 24/7 సీసీటీవీ పర్యవేక్షణ, ప్రతి యాక్సెస్‌కు అలర్ట్ వ్యవస్థలు వంటి భద్రతా ప్రమాణాలు లాకర్ నిర్వహణను మరింత ఖరీదైనదిగా మార్చాయి. అయితే ఇవి వినియోగదారుల భద్రతను మెరుగుపరచడంలో కీలకంగా మారాయి. కొంతమంది వినియోగదారుల అభిప్రాయం ప్రకారం బ్యాంక్‌తో బలమైన సంబంధాలు ఉన్న వారికి లాకర్ సులభంగా లభిస్తుందనే భావన ఉంది. కానీ అధికారికంగా లాకర్ కేటాయింపును ఇతర ఆర్థిక ఉత్పత్తులతో అనుసంధానించడాన్ని ఆర్‌బిఐ నిషేధించింది.

ఈ నేపథ్యంలో ప్రైవేట్ లాకర్ సేవలు వినియోగదారుల దృష్టిని ఆకర్షిస్తున్నాయి. మైసేఫ్ ఇండియా, ARM వాల్ట్స్, వెల్వెట్ వాల్ట్స్ ప్రైవేట్ లిమిటెడ్ వంటి సంస్థలు ఆధునిక భద్రతా సదుపాయాలతో 24/7 యాక్సెస్ కలిగిన లాకర్ సేవలను అందిస్తున్నాయి. అయితే ప్రైవేట్ లాకర్లు సాధారణంగా బ్యాంక్ లాకర్ల కంటే ఖరీదైనవి. అదనంగా బ్యాంకుల మాదిరిగా కఠిన నియంత్రణలు లేకపోవడంతో భీమా రక్షణపై వినియోగదారులు ప్రత్యేకంగా దృష్టి పెట్టాలి.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి