8th Pay Commission: వేతన సంఘ సమావేశం.. బేస్‌ పే ఎంత ఉండొచ్చంటే..?

కేంద్ర ప్రభుత్వ ఉద్యోగులు, పెన్షనర్ల కోసం ఎనిమిదవ వేతన సంఘానికి సంబంధించిన ప్రక్రియ వేగం పుంజుకుంటోంది. మే 13, 14 తేదీల్లో ఢిల్లీలో జరిగిన కీలక సమావేశాల్లో రక్షణ మంత్రిత్వ శాఖ, రైల్వే మంత్రిత్వ శాఖకు అనుబంధంగా ఉన్న ఉద్యోగ సంఘాలతో వేతన సంఘం ప్రతినిధులు చర్చలు ప్రారంభించారు. ఈ సమావేశాల్లో ఉద్యోగుల వేతన నిర్మాణం, అలవెన్సులు, పెన్షన్లు, ద్రవ్యోల్బణ భత్యం వంటి అంశాలపై విస్తృతంగా చర్చించినట్లు సమాచారం. ఈ చర్చల ఆధారంగా కమిషన్ ఒక ప్రాథమిక బ్లూప్రింట్ సిద్ధం చేసి, తదుపరి ప్రభుత్వానికి సిఫార్సులు సమర్పించనుంది. ఉద్యోగ సంఘాల ప్రధాన డిమాండ్ ప్రస్తుతం ఉన్న కనీస మూల వేతనాన్ని రూ.18,000 నుంచి నేరుగా రూ.65,000కు పెంచాలన్నదే. పెరుగుతున్న జీవన వ్యయం, ద్రవ్యోల్బణం, పట్టణ జీవన ఖర్చులు దృష్ట్యా ప్రస్తుత వేతనాలు సరిపోవడం లేదని సంఘాలు వాదిస్తున్నాయి.

ముఖ్యంగా సీరియస్‌ ప్రిన్సిపల్‌ ఆధారంగా వేతన నిర్మాణాన్ని పునర్వ్యవస్థీకరించాలని వారు కోరుతున్నారు. ఫిట్‌మెంట్ ఫ్యాక్టర్‌ను ప్రస్తుతం ఉన్న 2.57 నుంచి 3.8కి పెంచాలని చేసిన ప్రతిపాదన ఉద్యోగుల్లో భారీ ఆశలు రేకెత్తిస్తోంది. ఇది అమల్లోకి వస్తే, ఉద్యోగుల నెలవారీ జీతాల్లో గణనీయమైన పెరుగుదల కనిపించే అవకాశం ఉంది. కరువు భత్యం (డీఏ) విధానంపై కూడా ఉద్యోగ సంఘాలు అసంతృప్తి వ్యక్తం చేస్తున్నాయి. ప్రస్తుత విధానం వాస్తవ ద్రవ్యోల్బణాన్ని ప్రతిబింబించడం లేదని, అందువల్ల ప్రతి ఆరు నెలలకోసారి కనీసం 4 శాతం గ్యారెంటీ పెంపు ఉండాలని వారు డిమాండ్ చేస్తున్నారు. మరో కీలక ప్రతిపాదన ప్రకారం, డీఏ 50 శాతానికి చేరిన వెంటనే దానిని మూల వేతనంలో విలీనం చేయాలని కోరుతున్నారు. ఇది ఉద్యోగుల భవిష్యత్ పెన్షన్, ఇతర అలవెన్సుల లెక్కలపై కూడా సానుకూల ప్రభావం చూపుతుంది.

వార్షిక వేతన పెంపును 3 శాతం నుంచి 5 శాతానికి పెంచాలని, సవరించిన మూల వేతనాన్ని తదుపరి రూ.1,000కు రౌండ్ ఆఫ్ చేయాలని కూడా ఉద్యోగ సంఘాలు సూచించాయి. అదే సమయంలో ఇంటి అద్దె భత్యం (HRA) విషయంలో కూడా కీలక మార్పులను కోరుతున్నారు. ప్రస్తుతం ఉన్న X, Y, Z నగరాల HRA రేట్లను వరుసగా 10 శాతం, 20 శాతం, 30 శాతం నుంచి 12 శాతం, 24 శాతం, 36 శాతానికి పెంచాలని ప్రతిపాదించారు. అలాగే HRAను డీఏతో అనుసంధానించే నిబంధనను రద్దు చేయాలని కూడా డిమాండ్ చేస్తున్నారు. అయితే వేతన సంఘం కేవలం ఉద్యోగుల డిమాండ్ల ఆధారంగా నిర్ణయాలు తీసుకోదని అధికారులు స్పష్టం చేస్తున్నారు. ప్రభుత్వ ఖజానాపై భారం, దేశ ఆర్థిక పరిస్థితి, రాష్ట్ర ప్రభుత్వాల ఆర్థిక సామర్థ్యం, ప్రభుత్వ-ప్రైవేట్ రంగాల మధ్య వేతన సమతుల్యత వంటి అంశాలను కూడా కమిషన్ సమగ్రంగా పరిశీలించనుంది. తుది నివేదిక సమర్పించడానికి కమిషన్‌కు 18 నెలల గడువు ఇవ్వబడినట్లు సమాచారం. అవసరమైతే ఉద్యోగులకు తక్షణ ఉపశమనం కల్పించేందుకు మధ్యంతర నివేదికను కూడా విడుదల చేసే అవకాశం ఉందని తెలుస్తోంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి