షాకింగ్‌ న్యూస్.. ఒకే “ఐఎమ్ఈఐ” నెంబర్‌తో వేల ఫోన్లు..!

ఐఎమ్ఈఐ.. ఇంటర్ నేషనల్ మొబైల్ ఎక్విప్‌మెంట్‌ ఐడెంటిటీ.. ఇది మనం వాడే ప్రతి ఫోన్‌కు ఉండే  నెంబర్. దీని ఆధారంగా మనం వాడే సిమ్ గురించి సదరు సంస్థకు తెలుస్తుంది. అంతేకాదు.. ఆ మొబైల్‌లో వేరే సిమ్ కార్డు మార్చినా ఆ విషయాన్ని ఐఎమ్ఈఐ నంబర్ ద్వారా ట్రేస్ చేయవచ్చు. అయితే ఇదంతా న్యాయ పరంగా జరిగే ప్రాసెస్. అందుకే మన ఫోన్లు పోగొట్టుకుంటే పోలీసులకు ఫిర్యాదు చేసేందుకు వెళ్లినప్పుడు ఫోన్ ఐఎమ్ఈఐ నెంబర్ ఉందా అని ప్రశ్నిస్తారు. ఎందుకంటే దాని ద్వారా ఆ ఫోన్‌ను ట్రేస్ చేసే అవకాశం ఉంటుంది కాబట్టి. అలాంటి ఐఎమ్‌ఈఐ నెంబర్ ఒక ఫోన్‌కు ఒకటే ఉంటుంది. కానీ తాజాగా యూపీలో ఓ షాకింగ్ విషయం బయటపడింది.

మీరట్‌లో బయటపడ్డ ఈ విషయాన్ని అక్కడి పోలీసులు వివరించారు. వారు తెలిపిన ప్రకారం.. ఒకే ఐఎమ్ఈఐ నెంబర్‌తో దేశంలో దాదాపు 13,500 ఫోన్లు ఉన్నాయని తెలిపారు. వివరాల్లోకి వెళితే.. మీరట్‌కు చెందిన ఓ పోలీస్ అధికారి మొబైల్ కొద్ది రోజుల క్రితం పాడైపోయింది. దీంతో దాన్ని రిపేర్ చేసేందుకు టెక్నీషియన్‌కు ఇచ్చినప్పటికీ మళ్లీ సేమ్ సమస్య తలెత్తుతోంది. దీంతో ఆ ఫోన్‌లో ఏం సమస్య ఉందో తెలుసుకొవాలంటూ సైబర్‌ క్రైంకు చెందిన ఓ సిబ్బందికి ఇచ్చారు. ఈ క్రమంలో అసలు విషయం బయటపడింది. ఫోన్‌కు అసలు సమస్య ఐఎమ్ఈఐ నెంబర్ అని తేలింది. దీంతో సదరు మొబైల్ కంపెనీపై పోలీసులు కేసు నమోదు చేశారు. ఈ ఘటనపై మీరట్ ఎస్పీ స్పందించారు. దాదాపు 13,500 సెల్ ఫోన్లకు ఒకే ఐఎమ్ఈఐ నెంబర్‌తో వాడకంలో ఉన్నాయని.. ఇది సెక్యురిటీకి సంబంధించిన అంశమని.. కంపెనీ నిర్లక్ష్యం ఈ ఘటనలో స్పష్టంగా కనిపిస్తోందన్నారు.