Andhra Pradesh: ఏపీ ప్రజలకు సర్కార్ అదిరిపోయే గుడ్ న్యూస్.. వారికి కూడా తల్లికి వందనం స్కీమ్ వర్తింపు..
ఏపీలో చదువుకునే పిల్లల కుటుంబాలకు ఇది పండగలాంటి వార్త. అర్హత ఉండి కూడా పథకానికి దూరమైన వేలాది మంది విద్యార్థులకు ఏపీ కేబినెట్ గుడ్ న్యూస్ తెలిపింది. వారందరినీ లబ్ధిదారుల జాబితాలో చేర్చేందుకు గ్రీన్ సిగ్నల్ ఇచ్చింది. ఏకంగా రూ.10,208 కోట్ల భారీ నిధులతో రెండో విడత జమకు లైన్ క్లియర్ చేయడమే కాకుండా.. హాస్టల్ విద్యార్థుల డైట్ ఛార్జీలు, గిరిజన బిడ్డలకు ఉచిత ఐఐటీ కోచింగ్‌కు సంబంధించి కేబినెట్ కీలక నిర్ణయాలు తీసుకుంది.
Updated on: Oct 07, 2026 | 10:00 PM
ఆంధ్రప్రదేశ్‌లో విద్యార్థుల చదువులకు దన్నుగా నిలిచే తల్లికి వందనం పథకం అమలుపై ప్రభుత్వం కీలక ముందడుగు వేసింది. అర్హులైన ప్రతి విద్యార్థికీ న్యాయం చేయాలనే లక్ష్యంతో గతంలో విడుదల చేసిన నిబంధనలను ఆమోదించడంతో పాటు క్షేత్రస్థాయి పరిశీలన ద్వారా గుర్తించిన కొత్త లబ్ధిదారులను కూడా ఈ జాబితాలో చేర్చింది. ముఖ్యమంత్రి నేతృత్వంలో జరిగిన కేబినెట్ భేటీలో ఈ కీలక నిర్ణయం తీసుకుంది. సాంకేతిక లేదా ఇతర కారణాలతో గతంలో పథకానికి దూరమైన మరో 58,601 మందిని తాజాగా పరిపాలనా అనుమతుల ద్వారా అర్హులుగా చేర్చారు. దీనితో పాటు రెండో విడత కింద ఎంపికైన 3,29,201 మంది విద్యార్థుల తల్లుల ఖాతాల్లోకి సహాయం జమ చేసే ప్రక్రియను అధికారులు క్లియర్ చేశారు. ఈ మార్పులతో కలిపి రాష్ట్రంలో ఈ పథకం కింద ఆర్థిక తోడ్పాటు అందుకోనున్న విద్యార్థుల మొత్తం సంఖ్య 68,05,791కి చేరుకుంది. వీరి కోసం ఖజానాపై పడే రూ.10,208 కోట్ల వ్యయానికి మంత్రివర్గం ఆమోదం తెలిపింది.
విద్యార్థుల ఆకలి తీర్చేలా డైట్ ఛార్జీలు అప్ గ్రేడ్
కేవలం నగదు ప్రోత్సాహకానికే పరిమితం కాకుండా సంక్షేమ హాస్టళ్లలో ఉంటూ చదువుకుంటున్న విద్యార్థుల పోషకాహారంపై కూడా ప్రభుత్వం దృష్టి సారించింది. బీసీ, ఎస్సీ, ఎస్టీ, మైనార్టీ గురుకులాలు, వసతి గృహాల్లో మెనూ ఛార్జీలను 10 శాతం మేర పెంచుతూ నిర్ణయం తీసుకుంది. తద్వారా విద్యార్థులకు మరింత నాణ్యమైన భోజనం అందనుంది.
ఐఐటీ, నీట్ దిశగా గిరిజన బిడ్డలు.. విదేశీ వర్సిటీలకు ఆహ్వానం
రాష్ట్రంలోని అట్టడుగు వర్గాల విద్యార్థులను ఉన్నత శిఖరాలకు చేర్చే లక్ష్యంతో విశాఖపట్నం కేంద్రంగా అకడమిక్ సెంటర్ ఆఫ్ ఎక్సలెన్స్‌ను నెలకొల్పనున్నారు. ఇక్కడ గిరిజన యువతకు జాతీయ స్థాయి ప్రవేశ పరీక్షలైన JEE, NEET లలో ఉచిత నిపుణుల శిక్షణ కల్పించనున్నారు. మరోవైపు గ్లోబల్ ప్రమాణాలతో కూడిన హయ్యర్ ఎడ్యుకేషన్ పాలసీ-2026 రూపకల్పన ద్వారా అంతర్జాతీయ విద్యా సంస్థలను ఏపీకి రప్పించే ప్రణాళికలకు కేబినెట్ గ్రీన్ సిగ్నల్ ఇచ్చింది.
