Cyclone Murasu Alert: అతి భారీ వర్షాలు.. రేపు పాఠశాలలకు సెలవు..!

Cyclone Murasu Alert: బంగాళాఖాతంలో ఏర్పడిన ‘మురసు’ తుఫాను తీవ్ర తుఫానుగా బలపడటంతో ఆంధ్రప్రదేశ్‌లో వాతావరణ పరిస్థితులు ఆందోళన కలిగిస్తున్నాయి. తుఫాను ప్రభావంతో దక్షిణ కోస్తా జిల్లాల్లో భారీ నుంచి అత్యంత భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ఈ నేపథ్యంలో విద్యార్థుల భద్రతను దృష్టిలో పెట్టుకుని పలు జిల్లాల్లో పాఠశాలలు, కళాశాలలకు సెలవులు ప్రకటించారు. తీరంవైపు దూసుకొస్తున్న మురసు తుఫాను పశ్చిమ మధ్య బంగాళాఖాతంలో తీవ్ర తుఫానుగా మారింది. నవంబర్ 2 అర్ధరాత్రి నుంచి నవంబర్ 3 తెల్లవారుజాము మధ్య నెల్లూరు నుంచి నరసాపురం మధ్య, ఒంగోలు సమీపంలో తీరం దాటే అవకాశం ఉందని భారత వాతావరణ శాఖ అంచనా వేసింది. తీరం దాటే సమయంలో గంటకు 100–110 కిలోమీటర్ల వేగంతో గాలులు వీచే అవకాశం ఉండగా, గాలుల వేగం అప్పుడప్పుడు 120 కిలోమీటర్లకు చేరవచ్చని హెచ్చరించింది.

ఏపీ జిల్లాల్లో విద్యాసంస్థలకు సెలవులు

తుఫాను ప్రభావం నేపథ్యంలో ముందస్తు జాగ్రత్త చర్యల్లో భాగంగా ఏపీలోని ఎన్టీఆర్, పల్నాడు, నెల్లూరు, గూడూరు ప్రాంతాల్లో పాఠశాలలు, కళాశాలలకు సెలవులు ప్రకటించినట్లు తాజా నివేదికలు వెల్లడించాయి. కొన్ని ప్రాంతాల్లో విద్యాసంస్థలను తాత్కాలిక తుఫాను పునరావాస కేంద్రాలుగా వినియోగించే అవకాశం ఉంది. అయితే సెలవులపై నిర్ణయాలు జిల్లా యంత్రాంగం ఆధారంగా మారవచ్చు. తల్లిదండ్రులు సంబంధిత జిల్లా కలెక్టర్ లేదా పాఠశాల నుంచి అధికారిక సమాచారాన్ని నిర్ధారించుకోవాలి.

ఈ జిల్లాల్లో భారీ వర్షాల హెచ్చరిక

కృష్ణా, గుంటూరు, బాపట్ల, ప్రకాశం, నెల్లూరు జిల్లాల్లో తుపాను ప్రభావం ఎక్కువగా ఉండే అవకాశం ఉందని వాతావరణ శాఖ హెచ్చరించింది. కొన్ని ప్రాంతాల్లో అత్యంత భారీ వర్షాలు కురిసే సూచనలు ఉన్నాయి. తీర ప్రాంతాల్లో బలమైన ఈదురుగాలులు వీచే అవకాశం ఉండటంతో అధికారులు అప్రమత్తమయ్యారు.

అత్యవసర సహాయం కోసం

• అత్యవసర సేవలు: 112
• విపత్తుల నిర్వహణ హెల్ప్‌లైన్: 1070
• ఏపీ విపత్తుల నిర్వహణ టోల్ ఫ్రీ: 1800-425-0101

మరిన్ని ఏపీ వార్తల కోసం ఇక్కడ క్లిక్ చేయండి