NSUI Protest: రోడ్లమీద గుంతలున్నాయని.. గుంత పునుగులు వేసి నిరసన తెలిపిన యువకులు.. ఎక్కడంటే..
గుంటూరు నగరంలో రోడ్లు గుంతలు పడి ప్రయాణానికి ఇబ్బందిగా ఉందంటూ ఎన్ ఎస్ యు ఐ కార్యకర్తలు వినూత్న రీతిలో నిరసన తెలిపారు. తాము చేస్తున్న నిరసన పదిమందికి తెలియాలన్న ఉద్దేశంతో ఎక్కడైతే గుంటలున్నాయో అక్కడే గుంత పునుగులు వేసి తమ నిరసన తెలిపారు. నగరంలోని నందివెలుగు రోడ్డులోనే రైల్వే ప్లైఓవర్ నిర్మాణం జరుగుతోంది.
T Nagaraju | Edited By: Surya Kala
Updated on: Jan 18, 2024 | 2:43 PM
నడి రోడ్డుపై పదిమంది యువకులు చేరారు. వారి చేతిలో చిన్న గ్యాస్ పొయ్యి ఉంది. అంతేకాదు కొద్దీగా పిండి, పునుగుల పెనం కూడా ఉన్నాయి. ఏకంగా నడిరోడ్డుపైనే పొయ్యి పెనం పెట్టి గుంత పునుగులు వేశారు. వేయడమే కాదు ఆ దారిలో వచ్చే పోయే వారికి వాటిని పంచి కూడా పెట్టారు కొంతమంది యువకులు. ఇదంతా ఏమిటి అని అనుకుంటున్నారా.. వివరాల్లోకి వెళ్తే..
గుంటూరు నగరంలో రోడ్లు గుంతలు పడి ప్రయాణానికి ఇబ్బందిగా ఉందంటూ ఎన్ ఎస్ యు ఐ కార్యకర్తలు వినూత్న రీతిలో నిరసన తెలిపారు. తాము చేస్తున్న నిరసన పదిమందికి తెలియాలన్న ఉద్దేశంతో ఎక్కడైతే గుంటలున్నాయో అక్కడే గుంత పునుగులు వేసి తమ నిరసన తెలిపారు. నగరంలోని నందివెలుగు రోడ్డులోనే రైల్వే ప్లైఓవర్ నిర్మాణం జరుగుతోంది. ఈ క్రమంలోనే రోడ్డుపై పెద్ద పెద్ద గుంతలు పడ్డాయి. నిర్మానం జాప్యం కావడంతో ప్రజలు ఇబ్బందులు పడుతున్నారు. ఈ క్రమంలోనే ఎన్ ఎస్ యు ఐ తమ నిరసన తెలియజేయాలనుకుంది. మామూలుగా నిరసన తెలిపితే ఎవరూ పట్టించుకోరన్న ఉద్దేశంతో వినూత్న నిరసనకు దిగారు.
నందివెలుగు రోడ్డులో గుంతలు పడిన రోడ్డుపైనే చిన్న గ్యాస్ స్టవ్ పోట్టారు. వెంటనే పెనం పెట్టి గుంత పునుగులు కూడా వేశారు. వాటిని ఆ దారిలో పోయే వాహనదారులకు పంచి పెట్టారు. అయితే ఈ విషయం తెలసుకుని పోలీసులు వచ్చే సమయానికే ఎన్ ఎస్ యు ఐ కార్యకర్తలు అక్కడ నుండి వెళ్లిపోయారు. నగరంలో రోడ్ల పరిస్థితి అధ్వాహ్నంగా ఉన్నాయని కార్పోరేషన్ అధికారులు పట్టించుకోవడం లేదని ఎన్ ఎస్ యు ఐ జిల్లా అద్యక్షుడు కరీం ఆరోపించారు. ఇప్పటికైనా ప్రభుత్వం స్పందించి రోడ్డు మరమ్మత్తులు చేయాలని డిమాండ్ చేశారు. ఎన్ ఎస్ యు ఐ కార్యకర్తల వినూత్న నిరసనను స్థానికులు ఆసక్తిగా గమనించారు.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..
