Magic Show: ఇలాంటి మెజిషియన్ తెలుగువాడు అవ్వడం మనందరికీ గర్వకారణం

విశాఖపట్నంకు చెందిన ప్రఖ్యాత ఇల్యూషనిస్ట్ బీఎస్ రెడ్డి, తన అద్భుతమైన ప్రదర్శనలతో ప్రపంచవ్యాప్తంగా ప్రేక్షకులను మంత్రముగ్ధులను చేస్తున్నారు. ప్రముఖులను ఎటువంటి ఆధారం లేకుండా గాలిలో నిలబెట్టడం, తేలియాడించడం వంటి విస్మయం కలిగించే ప్రదర్శనలు ఆయన నైపుణ్యానికి నిదర్శనం. వివిధ రియాల్టీ షోలలో ఆయన ప్రదర్శన అందరి దృష్టిని ఆకర్షించింది. “మ్యాజిక్ అనేది నిజానికి ప్రతిదీ కూడా ఒక లాజిక్, ప్రతి మ్యాజిక్ వెనుక ఒక ట్రిక్ ఉంటుంది. దానికి సాధన, ప్రాక్టీస్ కూడా తోడవుతాయి” అని బీఎస్ రెడ్డి వివరిస్తారు. ప్రేక్షకులు చూసేది నిజమని భ్రమ కల్పించడమే తమ లక్ష్యమని ఆయన పేర్కొన్నారు. తన ప్రదర్శనలలో మనిషిని రెండు ముక్కలు కట్ చేసి అతికించడం వంటివి ఎలాంటి బాక్సులను ఉపయోగించకుండానే చేస్తారు. ఇది కేవలం కల్పించే భ్రమ మాత్రమేనని, వాస్తవానికి ఇది అసాధ్యమని ఆయన స్పష్టం చేశారు.

ఈయన లైవ్ ప్రదర్శనల్లో గ్రాఫిక్స్, ఎడిటింగ్ లేకుండానే అద్భుతాలు సృష్టిస్తారు. బాలీవుడ్, హాలీవుడ్ సెలబ్రిటీలను సైతం తన మ్యాజిక్‌తో ఆశ్చర్యపరిచిన బీఎస్ రెడ్డి, అనేక జాతీయ, అంతర్జాతీయ అవార్డులను గెలుచుకున్నారు. ప్రపంచ ప్రఖ్యాత మెజీషియన్ డేవిడ్ కాపర్ఫీల్డ్ స్ఫూర్తితో పదేళ్ల వయసు నుంచే ఈ కళపై ఆసక్తి పెంచుకున్నారు. 35 సంవత్సరాలుగా అమెరికా, ఆస్ట్రేలియా, మలేషియా వంటి దేశాల్లో ఆయన ప్రదర్శనలిచ్చారు. తమ కళ్ల ముందు జరిగేదంతా నిజమేనన్న భ్రమను తన ప్రదర్శనలతో కల్పించానని ఆయన అన్నారు. మ్యాజిక్ ఆస్కార్‌గా పిలవబడే అమెరికాలోని వరల్డ్ మెజీషియన్స్ సొసైటీ ఇచ్చే ఇంటర్నేషనల్ మెర్లిన్ అవార్డును కూడా బీఎస్ రెడ్డి గెలుచుకున్నారు. అకాడమీ అవార్డుల మాదిరిగానే ప్రతి సంవత్సరం ఈ అవార్డులను ప్రదానం చేస్తారు. “మోస్ట్ ఒరిజినల్ ఇల్యూషనిస్ట్ ఇన్ ఇండియా” కేటగిరీలో తాను ఈ అవార్డును అందుకున్నట్లు ఆయన తెలిపారు. టీవీలో గ్రాఫిక్స్ ద్వారా మానిప్యులేట్ చేసే వాటికి భిన్నంగా, స్టేజ్ మీద పది అడుగుల దూరంలో ఉన్న ప్రేక్షకులకు కూడా అద్భుతాలను ప్రత్యక్షంగా చూపించడం తమ ప్రత్యేకత అని ఆయన అన్నారు. స్టేజ్ మీద మాయమైపోయి క్షణాల్లో ఆడియన్స్ మధ్యలో ప్రత్యక్షం కావడం వంటివి ప్రత్యక్షంగా చూసినప్పుడు ప్రేక్షకులు అది నిజమేనని నమ్మాల్సిన పరిస్థితి వస్తుందని ఆయన వివరించారు. ఒక చిన్న మ్యాజిక్ చేయాలన్నా వందసార్లు రిహార్సల్స్ చేస్తామని బీఎస్ రెడ్డి చెప్పారు. ఒక ఐటమ్ కోసం కనీసం 50 నుంచి 100 సార్లు సాధన చేసి, వీడియోలు షూట్ చేసుకుని, సొంతంగా తప్పులను సరిదిద్దుకుని, అత్యుత్తమ అవుట్‌పుట్ వచ్చాకే స్టేజ్ మీద ప్రదర్శిస్తామని తెలిపారు. మ్యాజిక్ అనేది సైన్స్ తప్ప మరొకటి కాదని, ప్రతి మ్యాజిక్ ట్రిక్ వెనుక ఒక సైన్స్ సూత్రం ఉంటుందని ఆయన ఉద్ఘాటించారు. ఆ సైన్స్, టెక్నాలజీ బయటికి కనిపించకుండా, కంటికి మాత్రం అద్భుతం కనిపించేలా చేయడమే మెజీషియన్ నైపుణ్యం అని బీఎస్ రెడ్డి పేర్కొన్నారు. ఏది ఏమైనా ఇంతటి స్కిల్, టాలెంట్ ఉన్న బీఎస్ రెడ్డి తెలుగువారు అవ్వడం మన అందరికీ గర్వకారణం.