బ్రిటానియా గోడౌన్‌లో అగ్నిప్రమాదం.. రూ.10 కోట్లు నష్టం..

కృష్ణాజిల్లాలోని బ్రిటానియా పరిశ్రమ గోడౌన్‌లో అగ్ని ప్రమాదం జరిగింది. ప్రమాదంలో దాదాపు రూ. 10కోట్ల మేర ఆస్తి నష్టం సంభవించింది. తెల్లవారు జామున ఒక్కసారిగా మంటలు వ్యాపించడంతో.. క్షణాల్లోనే లోపల ఉన్న సరుకంతా కాలిబూడిదయ్యింది. సమాచారం అందుకున్న ఫైర్ సిబ్బంది ఘటనా స్థలానికి చేరుకుని మంటలు ఆర్పే ప్రయత్నం చేశారు. గోడౌన్‌కు ఫైర్ సేఫ్టీ అనుమతులు లేవని అధికారులు గుర్తించారు. మంటలను ఆర్పేందుకు దాదాపు ఆరు గంటల పాటు శ్రమించారు. అయినప్పటికి మంటలు అదుపులోకి రాకపోవడంతో.. గోడౌన్ మొత్తం మంటలకు కుప్పకూలింది. లోపల ఉన్న బ్రిటానియా ఉత్పత్తులు కాలి బూడిదయ్యాయి. ఈ మంటలకు పక్కన ఉన్న అపార్ట్‌మెంట్ గోడలు కూడా వేడెక్కిపోవడంతో అందులో జనాలు భయంతో బయటకు పరుగులు తీశారు. అయితే షార్ట్ సర్క్యూట్ కారణంగానే ప్రమాదం జరిగి ఉంటుందని పోలీసులు చెబుతున్నారు.