దేశానికే ఫస్ట్‌ లేడీ కానీ..

అన్నీ ఉన్నా అల్లుడి నోట్లో శని అన్నట్లుంది ఆమె పరిస్థితి. డబ్బు, పదవి, హోదా..అన్నీ ఉన్నాయి. కానీ ఇంద్రభవనం లాంటి ఇంట్లో ఏకాకిగా బతుకుతున్నారు. ఏవో చిన్న చిన్న పనులు చేసుకుంటూ కాలం వెళ్లదిస్తున్నారు. ఇంతకీ ఎవరామె..

ఆమె దేశానికే ఫస్ట్‌ లేడీ. మంచి హోదాలో ఉన్న భర్త. ఇంద్రభవనాన్ని తలపించే శ్వేతసౌధం. ఇంకేం. అన్నీ రాజభోగాలే అనుకుంటాం. ఐతే ఇవన్నీ ఎలా ఉన్నా..ఆమెను ఒంటరితనం వేధిస్తోందట. ఆమె ఎవరో కాదు. సాక్షాత్తూ అమెరికా అధ్యక్షుడు ట్రంప్‌ భార్య మెలనియా ట్రంప్‌..ఆమె వైట్‌హౌస్‌లో ఒంటరి జీవితాన్ని గడుపుతున్నారని సంచలన నిజాలు బయటపెట్టింది కేట్‌ బెనెట్‌ అనే సీఎన్‌ఎన్‌ జర్నలిస్ట్‌ రాసిన బుక్‌.   ఫ్రీ మెలనియా-ద అనాథరైజ్డ్‌ బయోగ్రఫీ పేరుతో వచ్చిన ఈ పుస్తకం సర్వత్రా చర్చనీయాంశంగా మారింది.

మెలనియా, ట్రంప్‌ ఒకే ఇంట్లో ఉంటున్నా..వేర్వేరు అంతస్తుల్లో నిద్రిస్తారట. విదేశీ పర్యటనలకు కూడా ట్రంప్‌ ఒక్కరే వెళ్తారని..కొన్నిసార్లు కలిసివెళ్లినా ఎడమొహం..పెడమొహంగానే ఉంటారట. ఇక ట్రంప్‌ మొదటి బార్య కూతురు ఇవాంకకు, మెలనియాకు మధ్య సన్నిహిత సంబంధాలు లేవట. అధ్యక్షుని భార్యగా దేశ ప్రథమ మహిళ చూసే పనులను ఇవాంక చేస్తుండటం నచ్చక ఇద్దరి మధ్య గొడవలు కూడా జరుగుతాయట.2018లో మెలనియా ఐ రియల్లీ డోన్ట్‌ కేర్‌, డూ యూ అని రాసిన జాకెట్‌ను ధరించడంపై పెద్ద దుమారమే చెలరేగడంతో..అది మీడియాకు సంబంధించింది అని వివరణ ఇచ్చుకోవలసివచ్చింది.

ఇక గతేడాది కిడ్నీప్రాబ్లమ్‌తో అనారోగ్యం పాలైన మెలనియాకు 13 ఏళ్ల కుమారుడు బారెనే లోకమట. అతని బాగోగులతో పాటు వైట్‌హౌస్‌లో చిన్న చిన్న పనులు చేసుకుంటూ ఒంటరిగా గడుపుతున్నారని పుస్తకంలో వివరించారు కేట్‌ బెనెట్‌. మెలనియా పుట్టినప్పటినుంచి తాజా ఘటనల వరకు ఆమె జీవితంలోని ప్రతి కోణాన్ని288 పేజీల పుస్తకంలో వివరించారామె. ఐతే ఆ బుక్‌ బయటికొచ్చినప్పటినుంచి మెలనియా హౌస్‌ అరెస్ట్‌ అయ్యారంటూ సోషల్‌ మీడియాలో వార్తలు వెల్లువెత్తుతున్నాయి.