దారుణం.. భారీ ట్రక్కులో 64 మృత దేహాల మధ్య..14 మంది సజీవంగా..

మొజాంబిక్ లోని వాయువ్య టేటే ప్రావిన్స్ లో జరిగింది ఓ దారుణం. ఓ కార్గో కంటెయినర్ (భారీ ట్రక్కు) లో 64 మృత దేహాలను పోలీసులు కనుగొన్నారు. ఆ డెడ్ బాడీస్ మధ్య 14 మంది సజీవంగా.. దిక్కుతోచని స్థితిలో కనబడి వారు షాక్ తిన్నారు. ఈ రాష్ట్ర సరిహద్దుల్లో మలావీ నుంచి వస్తున్న ఈ వాహనాన్ని పోలీసులు, ఇమ్మిగ్రేషన్ అధికారులు ఆపివేసి తనిఖీ చేసినప్పుడు ఈ ఘోరం కనబడింది. సరిహద్దుల్లోని జింబాబ్వే నుంచి వఛ్చిన ఇథియోపియన్లుగా వీరిని భావిస్తున్నారు. ఈ వాహనంలో కిక్కిరిసి ఉన్నట్టు కుక్కిన వీరు శ్వాస ఆడక ఉక్కిరిబిక్కిరై ప్రాణాలు కోల్పోయినట్టు తెలుస్తోంది. ఈ కంటెయినర్ డ్రైవర్ ను, అతని అసిస్టెంటును పోలీసులు అరెస్టు చేశారు. మొజాంబిక్ దేశంలోకి ఇథియోపియన్ల అక్రమ ఎంట్రీకి ఎవరు వీలు కల్పించారన్నదానిపై ఆరా తీస్తున్నారు. ఈ వాహనంలో అనేకమంది ఇథియోపియన్లు ప్రయాణిస్తున్నట్టు దక్షిణాఫ్రికా లోని ఇథియోపియన్ ఎంబసీ ద్వారా తమకు సమాచారం అందిందని అడ్డిస్ అబాబాలోని విదేశాంగ మంత్రిత్వ శాఖ తెలిపింది. ఈ ట్రాజెడీ పట్ల తీవ్ర సంతాపం వ్యక్తం చేసింది. సజీవంగా ఉన్నవారిని వెంటనే ఆసుపత్రికి తరలించి చికిత్స అందిస్తున్నారు. ఉపాధికోసం పొట్ట చేతబట్టుకుని అనేకమంది ఇథియోపియన్లు దొంగచాటుగా మొజాంబిక్ దేశంలోకి ప్రవేశిస్తుంటారు. ఇదే అదనని ఫ్రాడ్ స్టర్స్,, వీరి బలహీనతను ఆసరాగా చేసుకుని.. వీరి నుంచి పెద్ద మొత్తంలో డబ్బులు గుంజి అక్రమ మార్గాల ద్వారా తరలిస్తుంటారు.