సౌదీలో ఎయిర్‌పోర్టుపై క్షిపణి దాడి.. 12 మంది మృతి.. 309 మందికి గాయాలు!

రియాద్‌, అక్టోబర్ 11: సౌదీ అరేబియాలోని రియాద్‌లో తీవ్ర విషాదం చోటుచేసుకుంది. కింగ్ ఖాలిద్ అంతర్జాతీయ విమానాశ్రయంపై క్షిపణి దాడి జరిగినట్లు సౌదీ అరేబియా జనరల్ అథారిటీ ఆఫ్ సివిల్ ఏవియేషన్ (GACA) వెల్లడించింది. ఈ దాడిలో 12 మంది మరణించగా, మరో 309 మంది గాయపడినట్లు ప్రకటించింది. క్షతగాత్రుల్లో కొందరి పరిస్థితి విషమంగా ఉన్నట్లు తెలిపింది. బాధితులకు పలు ఆసుపత్రుల్లో చికిత్స అందిస్తున్నారు. GACA వెల్లడించిన వివరాల ప్రకారం.. మృతుల్లో నలుగురు సౌదీ పౌరులు ఉన్నారు. మరో ఎనిమిది మంది వివిధ దేశాలకు చెందినవారు. వీరిలో ఇద్దరు బంగ్లాదేశీయులు కాగా, అమెరికా, ఈజిప్ట్, జోర్డాన్, సిరియా, పాలస్తీనా, సూడాన్ దేశాలకు చెందిన ఒక్కొక్కరు ఉన్నారు. దాడిలో విమానాశ్రయ ఆస్తులకు కూడా నష్టం వాటిల్లిందని, నష్ట తీవ్రతను అంచనా వేస్తున్నామని అధికారులు తెలిపారు. మృతుల కుటుంబాలకు సానుభూతి తెలిపిన అధికారులు, గాయపడినవారు త్వరగా కోలుకోవాలని ఆకాంక్షించారు. క్షతగాత్రులకు అవసరమైన వైద్య సేవలు అందిస్తున్నట్లు స్పష్టం చేశారు.

దాడి అనంతరం కింగ్ ఖాలిద్ అంతర్జాతీయ విమానాశ్రయంలో కార్యకలాపాలను తాత్కాలికంగా నిలిపివేశారు. ప్రయాణికులను అక్కడి నుంచి సురక్షిత ప్రాంతాలకు తరలించినట్లు సమాచారం. క్షతగాత్రులను ఆసుపత్రులకు తరలించేందుకు పెద్ద సంఖ్యలో అంబులెన్స్‌లు విమానాశ్రయానికి చేరుకున్నాయి. ప్రయాణికులు విమానాశ్రయానికి బయలుదేరే ముందు తమ విమానాల షెడ్యూల్‌ను సంబంధిత విమానయాన సంస్థల ద్వారా తెలుసుకోవాలని అధికారులు సూచించారు. దీంతో విమానాల రాకపోకలపై తీవ్ర ప్రభావం పడింది. ఫ్లైట్ ట్రాకింగ్ ప్లాట్‌ఫామ్ Flightradar24 ప్రకారం.. రియాద్‌కు రావాల్సిన విమానాలను ఇతర ప్రాంతాలకు మళ్లించారు. చివరి విమానం స్థానిక కాలమానం ప్రకారం మధ్యాహ్నం 2.05 గంటలకు ల్యాండ్ అయిన దాదాపు నాలుగు గంటల తర్వాత కూడా విమానాల మళ్లింపు కొనసాగినట్లు పేర్కొంది.

24 గంటల్లో 225 విమానాలు రద్దు

విమానాల రాకపోకలకు అంతరాయం ఏర్పడటంతో ప్రయాణికులు తీవ్ర ఇబ్బందులు ఎదుర్కొన్నారు. 24 గంటల వ్యవధిలో కింగ్ ఖాలిద్ అంతర్జాతీయ విమానాశ్రయంలో దాదాపు 225 విమానాలు రద్దయ్యాయి. అమెరికా, బ్రిటన్ దౌత్య కార్యాలయాలు కూడా తమ పౌరులకు హెచ్చరికలు జారీ చేశాయి. రియాద్‌లోని అమెరికా రాయబార కార్యాలయం విమానాశ్రయంపై దాడి జరిగినట్లు తమకు సమాచారం అందిందని పేర్కొంది. అమెరికా పౌరులు విమానాశ్రయం, పరిసర ప్రాంతాలకు దూరంగా ఉండాలని సూచించింది. బ్రిటన్ రాయబార కార్యాలయం కూడా ఈ ఘటనను తీవ్రమైన సంఘటనగా అభివర్ణిస్తూ, బ్రిటిష్ పౌరులు విమానాశ్రయ ప్రాంతానికి వెళ్లవద్దని హెచ్చరించింది. గత వారం రోజులుగా రియాద్‌లోని కింగ్ ఖాలిద్ అంతర్జాతీయ విమానాశ్రయం లక్ష్యంగా పలు దాడులు జరిగాయి.

పొరుగున ఉన్న యెమెన్‌లో ఇరాన్ మద్దతు ఉన్న హూతీ తిరుగుబాటుదారులపై సౌదీ నేతృత్వంలోని కూటమి భారీ సైనిక చర్య ప్రారంభించిన నేపథ్యంలో ఈ పరిణామాలు చోటుచేసుకున్నట్లు తెలుస్తుంది. అక్టోబర్ 6, 7 తేదీల్లో కింగ్ ఖాలిద్ అంతర్జాతీయ విమానాశ్రయం, అబ్హా అంతర్జాతీయ విమానాశ్రయాలను లక్ష్యంగా చేసుకుని జరిగిన గత దాడుల్లో ముగ్గురు మరణించగా, 36 మంది గాయపడినట్లు GACA గతంలో వెల్లడించింది. తాజా ఘటనతో సౌదీ అరేబియాలో భద్రతా పరిస్థితులపై ఆందోళనలు వ్యక్తమవుతున్నాయి. విమానాశ్రయ కార్యకలాపాలు ఎప్పుడు పూర్తిస్థాయిలో పునరుద్ధరిస్తారనే దానిపై ప్రయాణికులు అధికారిక ప్రకటనల కోసం ఎదురుచూస్తున్నారు.