India Defence: రూ.63 వేల కోట్ల భారీ డీల్..! ఇక భారత్ కదనసీమలో కొదమ సింహమే..
భారత ప్రభుత్వం ఫ్రాన్స్తో రూ.63,000 కోట్లకు పైగా విలువైన ఒప్పందం కుదుర్చుకుని 26 రాఫెల్ మెరైన్ యుద్ధ విమానాలను సేకరించనుంది. ఇందులో 22 సింగిల్-సీటర్, 4 ట్విన్-సీటర్ విమానాలు ఉన్నాయి. ఈ అత్యాధునిక విమానాలు INS విక్రమాదిత్య, విక్రాంత్ నౌకల నుండి పనిచేస్తాయి.
Updated on: Apr 09, 2025 | 4:27 PM
26 రాఫెల్ మెరైన్ యుద్ధ విమానాల కొనుగోలు కోసం ఫ్రాన్స్తో భారత ప్రభుత్వం ఒప్పందం కుదుర్చుకున్నట్లు రక్షణ వర్గాలు బుధవారం వెల్లడించాయి. రూ.63,000 కోట్లకు పైగా విలువైన ఈ ఒప్పందం రాబోయే వారాల్లో అధికారికంగా అమల్లోకి వస్తుందని తెలుస్తోంది. ఈ ఒప్పందంలో భాగంగా 22 సింగిల్-సీటర్ జెట్లతో పాటు నాలుగు ట్విన్-సీటర్ వేరియంట్లు ఇండియన్ నేవీలో చేరనున్నాయి. ఫ్లీట్ నిర్వహణ, లాజిస్టికల్ సపోర్ట్, శిక్షణ, స్వదేశీ తయారీ భాగాల కోసం సమగ్ర ప్యాకేజీని అందించనుంది ఫ్రాన్స్. రాఫెల్ మెరైన్ జెట్లు సముద్రంలో నావికాదళ వైమానిక శక్తిని గణనీయంగా పెంచుతాయి.
రాఫెల్ యుద్ధ విమానాలకు ఈ రాఫెల్ మెరైన్ అడ్వాన్డ్స్ వెర్షన్. ఈ రాఫెల్ మెరైన్ ఫైటర్ జెట్లు 2029 చివరి నాటికి ఇండియన్ నేవీ చేతికి అందుతాయి. మొత్తంగా 2031 నాటికి డీల్ కంప్లీట్ అవుతుంది. ఈ జెట్లు భారతదేశ విమాన వాహక నౌకలైన INS విక్రమాదిత్య, INS విక్రాంత్ నుంచి పనిచేస్తాయి. పాత MiG-29K విమానాల స్థానంలో వీటిని ఉపయోగిస్తారు. ఫ్రెంచ్ తయారీదారు డస్సాల్ట్ ఏవియేషన్ నుంచి నిర్వహణ మద్దతు ఉంటుంది. ఇక ప్రత్యేకతల విషయానికి వస్తే.. రీన్ఫోర్స్డ్ ల్యాండింగ్ గేర్, అరెస్టర్ హుక్స్, షార్ట్ టేక్-ఆఫ్ బట్ అరెస్టెడ్ రికవరీ (STOBAR) వంటి అత్యాధునిక సౌకర్యాలు ఉన్నాయి. ఈ జెట్లు భారత నేవీలో చేరితే.. మన శత్రు దేశాల గుండెల్లో గుబులు పుట్టడం ఖాయం.
మరిన్ని అంతర్జాతీయ వార్తల కోసం ఇక్కడ క్లిక్ చేయండి.
