యూరప్‌ దేశాలను వణికిస్తున్న లైంగిక వ్యాధులు.. 300 శాతానికి పైగా పెరిగిన కేసులు.. కారణమేంటంటే

ఐరోపా దేశాలను లైంగిక సంక్రమణ వ్యాధులు తీవ్రంగా కలవరపెడుతున్నాయి, ముఖ్యంగా గోనేరియా కేసులు ఏకంగా 303 శాతం మేర పెరగడం ఆందోళన కలిగిస్తోంది. గడిచిన పదేళ్ల కాలంలో లైంగిక సంక్రమణ వ్యాధుల కేసులు ఎన్నడూ లేని విధంగా 2024లో గరిష్ఠ స్థాయికి చేరుకున్నాయి. యూరోపియన్ సెంటర్ ఫర్ డిసీజ్ ప్రివెన్షన్ అండ్ కంట్రోల్ (ఈసీడీసీ) తాజాగా విడుదల చేసిన వార్షిక నివేదికలో ఈ సంచలన విషయాలు వెలుగులోకి వచ్చాయి.

ఇరవై ఎనిమిది దేశాల్లో 1,06,331 గోనేరియా కేసులు నమోదు కావడం ప్రస్తుత పరిస్థితి తీవ్రతకు అద్దం పడుతోంది. సిఫిలిస్ కేసులు కూడా అనూహ్యంగా పెరిగి 45,577 కు చేరుకున్నాయి. కేవలం పదేళ్ల వ్యవధిలోనే ఈ సిఫిలిస్ కేసులు రెట్టింపు కావడం వైద్యులను తీవ్ర ఆశ్చర్యానికి గురిచేస్తోంది. క్లమిడియా కేసులు అత్యధికంగా 2,13,443 నమోదు కాగా, లింఫోగ్రాన్యులోమా వెనెరియం కేసులు కూడా 3,490 మేర వెలుగుచూశాయి. గర్భంలో ఉన్న శిశువులకు నేరుగా వ్యాపించే పుట్టుకతో వచ్చే సిఫిలిస్ కేసులు కూడా వేగంగా పెరుగుతున్నాయి.

2023లో 78 కేసులు మాత్రమే ఉండగా, 2024 నాటికి పద్నాలుగు దేశాల్లో ఆ సంఖ్య అమాంతం 140కి చేరుకుంది. పునరుత్పత్తి వయసులో ఉన్న మహిళల్లో ఈ వ్యాధి వేగంగా ప్రబలుతున్నట్లు తాజా గణాంకాలు స్పష్టం చేస్తున్నాయి. ముఖ్యంగా పురుషులతో లైంగిక సంబంధం పెట్టుకునే పురుషుల్లో ఈ వ్యాధులు అత్యధికంగా కనిపిస్తున్నాయి. గోనేరియా, అలాగే సిఫిలిస్ బారిన పడుతున్న వారిలో వీరే ఎక్కువగా ఉంటున్నారు. ఈ అంటువ్యాధుల కట్టడికి పలు దేశాలు సరైన చర్యలు తీసుకోకపోవడం, పాత విధానాలనే ఇంకా కొనసాగించడం వల్ల ఈ ముప్పు పెరుగుతోంది.

ఇరవై తొమ్మిది దేశాలకు గాను పదమూడు దేశాల్లో ఈ వ్యాధుల కనీస నిర్ధారణ పరీక్షల కోసం ప్రజలు తమ సొంత డబ్బును వెచ్చించాల్సి వస్తోంది. సరైన నివారణ వ్యూహాలు లేకపోవడం, చికిత్స విధానాల్లో లోపాలు కూడా ఈ కేసులు భారీగా పెరగడానికి కారణమవుతున్నాయి. గర్భధారణ సమయంలో సరైన పరీక్షలు చేయకపోవడం వల్ల చాలామంది వ్యాధి బారిన పడుతున్నారని ఈసీడీసీ గుర్తించింది.

ఇదే క్రమంలో నివారణ చర్యల్లో భాగంగా డాక్సీసైక్లిన్ మందుల వాడకంపై 2026 జనవరిలో ఈసీడీసీ కీలక మార్గదర్శకాలు జారీ చేసింది. అయితే యాంటీమైక్రోబయల్ రెసిస్టెన్స్ ప్రమాదం పొంచి ఉన్నందున గోనేరియా నివారణ కోసం డాక్సీసైక్లిన్ వాడకం పట్ల చాలా జాగ్రత్తగా వ్యవహరించాలని స్పష్టం చేసింది. అందరూ విచ్చలవిడిగా ఈ మందులను వాడకూడదని ఆ సంస్థ గట్టిగా సూచించింది.

ఈ పరిస్థితిని తక్షణమే అదుపులోకి తీసుకురావడానికి కఠిన చర్యలు అత్యవసరమని ఈసీడీసీ తీవ్రంగా హెచ్చరిస్తోంది. నిఘా వ్యవస్థను పటిష్టం చేయడంతో పాటు ప్రతి ఒక్కరికీ సులభంగా ఉచితంగా పరీక్షలు, మెరుగైన చికిత్స అందేలా చూడాలని సూచిస్తోంది. కచ్చితమైన చర్యలు తీసుకోకపోతే భవిష్యత్తులో ప్రజారోగ్య వ్యవస్థపై తీవ్ర ప్రభావం పడుతుందని, రోగులకు సరైన వైద్యం అందడంలో అసమానతలు పెరుగుతాయని స్పష్టం చేస్తోంది.

మరిన్ని అంతర్జాతీయ వార్తల కోసం ఇక్కడ క్లిక్ చేయండి.