Viral: పాడుబడ్డ ఇంటిలో పాత ఫ్రిడ్జ్.. ఏముందోనని చూసి అందరూ షాక్

కేరళలోని కొచ్చిలో ఓ నిర్మానుష్యమైన ప్రదేశంలో ఉన్న ఓ ఇంట్లోని ఫ్రిజ్‌లో మానవ పుర్రె, ఎముకలు లభ్యమయ్యాయి. జనావాసాలు లేని ఈ ఇంట్లోని ఫ్రిజ్‌లో ప్యాకెట్‌లో భద్రపరిచిన పుర్రె, ఎముకలను పోలీసులు స్వాధీనం చేసుకున్నారు. ఆ ప్రాంతం అంతా సంఘ వ్యతిరేక శక్తులకు అడ్డాగా మారిందని స్థానిక పంచాయతీ అధికారులు ఫిర్యాదు చేయడంతో పోలీసులు సోదాలు చేపట్టారు. వెతకగా, అక్కడే ఉన్న ఓ పాడుబడిన ఇంట్లోకి వెళ్లగా.. అక్కడున్న ఫ్రిడ్జ్‌లో ఈ పుర్రె, ఎముకలను గుర్తించారు ఖాకీలు. ఎముకలు మూడు వేర్వేరు కవర్లలో ప్యాక్ చేసి ఉండగా.. పుర్రె చాలా సంవత్సరాల కిందటిదిగా పోలీసులు అంచనా వేశారు. ఆ పుర్రె, ఎముకలు ఎవరివి అనేది తెలియడానికి.. ఫోరెన్సిక్ ల్యాబ్‌కి తీసుకెళ్లారు. ఇంట్లో కరెంటు లేకపోవడం.. ఫ్రిజ్‌లో కంప్రెసర్ ఉండకపోవడం గమనార్హం.

ఈ ఘటన చొట్టనిక్కరలోని ఎరువేలి సమీపంలోని ప్యాలెస్ చౌరస్తాలో, చోట్టనిక్కర భగవతి ఆలయానికి ఉత్తరాన 4 కిలోమీటర్ల దూరంలో ఉన్న ఇంట్లో జరిగింది. ఈ ఇల్లు చాలా సంవత్సరాల క్రితమే తాళం వేసి ఉంది. 14 ఎకరాల స్థలంలో ఉన్న ఈ ఇల్లు ఎర్నాకులంకు చెందిన వ్యక్తికి చెందినదిగా.. సుమారు 15-20 సంవత్సరాలుగా ఎవరూ ఇక్కడ నివాసం ఉండట్లేదని పోలీసులు తేల్చారు. ఈ ఘటనపై కేసు నమోదు చేసి దర్యాప్తు చేపట్టారు.

మరిన్ని ట్రెండింగ్ న్యూస్ కోసం క్లిక్ చేయండి