Zaheer Khan: టీమిండియాలో షమీ రీ-ఎంట్రీపై మళ్లీ చర్చ.. సెలెక్టర్లకు జహీర్ ఖాన్ కీలక సూచన

Zaheer Khan: టీమిండియాలోకి సీనియర్ ఫాస్ట్ బౌలర్ మహమ్మద్ షమీ రీ ఎంట్రీపై చర్చ మళ్లీ జోరందుకుంది. గత కొంతకాలంగా జట్టుకు దూరంగా ఉంటున్న షమీ ఎంపికపై భారత మాజీ వేగవంతమైన బౌలర్ జహీర్ ఖాన్ స్పందిస్తూ సెలెక్టర్లకు క్లియర్ మెసేజ్ ఇచ్చారు. షమీ గనుక పూర్తిగా ఫిట్‌గా ఉండి, అందుబాటులో ఉంటే రాబోయే వరల్డ్ కప్ టోర్నీకి అతడిని ఖచ్చితంగా జట్టులో చేర్చుకోవాలని జహీర్ స్పష్టం చేశారు.

జహీర్ ఖాన్ ఏమన్నారంటే?

షమీకి మద్దతుగా మాట్లాడిన జహీర్ ఖాన్, డొమెస్టిక్ క్రికెట్‌లో రాణిస్తున్న ఆటగాళ్లను నిర్లక్ష్యం చేయకూడదని అన్నారు. “ఒక ఆటగాడు మైదానంలో నిలకడగా రాణిస్తున్నప్పుడు, అతడిని ఖచ్చితంగా టీమ్ ఇండియా ప్రణాళికల్లో భాగం చేయాలి. షమీ లాంటి బౌలర్ వరల్డ్ కప్ ఆడాలి, అతను జట్టులో ఉండటం చాలా అవసరం” అని జహీర్ వ్యాఖ్యానించారు. తుది నిర్ణయం కెప్టెన్, హెడ్ కోచ్, సెలెక్టర్లదే అయినప్పటికీ, ఫిట్‌గా ఉన్న సీనియర్ పేసర్‌ను పక్కన పెట్టడానికి ఎలాంటి బలమైన కారణం లేదని ఆయన చెప్పారు.

సౌతాఫ్రికా పర్యటనలో షమీ అనుభవం కీలకం

ప్రస్తుతం టీమిండియా మేనేజ్‌మెంట్ భవిష్యత్తు అవసరాల కోసం యంగ్ ఫాస్ట్ బౌలర్ల పూల్‌ను తయారు చేయడంపై దృష్టి పెట్టింది. అయితే, అనుభవాన్ని పూర్తిగా విస్మరించడం సరైనది కాదని జహీర్ అభిప్రాయపడ్డారు. ముఖ్యంగా సౌతాఫ్రికా వంటి పేస్‌కు అనుకూలించే విదేశీ పిచ్‌లపై పర్యటించేటప్పుడు షమీ అనుభవం, బౌలింగ్ నైపుణ్యం భారత జట్టుకు ఎంతో ప్రయోజనకరంగా మారతాయని వివరించారు.

ఫిట్‌నెస్‌పై షమీ వర్సెస్ అగార్కర్ సరసన సంచలన వ్యాఖ్యలు

గతంలో షమీ రీ-ఎంట్రీ ఆలస్యం కావడానికి ఆయన ఫిట్‌నెస్‌పై లేవనెత్తిన ప్రశ్నలే ప్రధాన కారణం. ప్రధాన సెలెక్టర్ అజిత్ అగార్కర్ కూడా షమీ ఫిట్‌నెస్‌పై ఆందోళన వ్యక్తం చేసిన సంగతి తెలిసిందే. దీనిపై షమీ స్వయంగా ఘాటుగా స్పందించారు. “నేను రంజీ ట్రోఫీలో రోజంతా బౌలింగ్ చేయగలిగినప్పుడు, వన్డే మ్యాచ్‌లో 10 ఓవర్లు వేయడం నాకు పెద్ద విషయం కాదు” అని స్పష్టం చేశారు. తాను సంపూర్ణ ఫిట్‌నెస్‌తో ఉన్నానని, టీమిండియాలోకి తిరిగి రావడానికి సిద్ధంగా ఉన్నానని షమీ ఆ వ్యాఖ్యల ద్వారా తేల్చి చెప్పారు.

టీమ్ మేనేజ్‌మెంట్ నిర్ణయంపై ప్రశ్నలు

యువ బౌలర్లకు ఎక్కువ అవకాశాలు ఇస్తూ, షమీ వయస్సు, గాయాల చరిత్రను నెపంగా చూపి పక్కన పెట్టడంపై విమర్శలు వ్యక్తమవుతున్నాయి. నిలకడైన ప్రదర్శన ఇస్తున్నప్పుడు వయస్సుతో సంబంధం లేకుండా అనుభవజ్ఞుడైన బౌలర్ సేవలను భారత్ ఉపయోగించుకోవాలని జహీర్ ఖాన్ స్పష్టం చేశారు.

మరిన్ని క్రీడా వార్తల కోసం ఇక్కడ క్లిక్ చేయండి..