Cone ice cream:ఈ షాపులో కోన్ ఐస్‌క్రీం కేవలం రూ.2 మాత్రమే.. ఇది ఫేక్‌ న్యూస్ కాదు, నమ్మండి..
ఈ వేసవి అతలాకుతలం చేస్తోంది. వేసవి తాపంతో ప్రజలు శీతల పానీయాలను ఆశ్రయిస్తుంటారు. మరోవైపు, కూల్‌ కూల్‌ ఐస్‌క్రీంలను కూడా బాగా లాగించేస్తుంటారు. ఎన్ని రకాల కూల్‌డ్రింక్స్‌ ఉన్నప్పటికీ, ఐస్ క్రీం తినటంలో ఉన్న మజాయే వేరు..
Updated on: May 28, 2022 | 6:52 PM
ఈ వేసవి అతలాకుతలం చేస్తోంది. వేసవి తాపంతో ప్రజలు శీతల పానీయాలను ఆశ్రయిస్తుంటారు. మరోవైపు, కూల్‌ కూల్‌ ఐస్‌క్రీంలను కూడా బాగా లాగించేస్తుంటారు. ఎన్ని రకాల కూల్‌డ్రింక్స్‌ ఉన్నప్పటికీ, ఐస్ క్రీం తినటంలో ఉన్న మజాయే వేరు..ఆరేళ్ల వారి నుంచి అరవై ఏళ్ల వయసు వారైన సరే, అందరికీ సమ్మర్‌లో ఫస్ట్‌ చాయిస్‌గా ఐస్‌క్రీం ఉంటుంది. అలాంటి ఐస్‌క్రీం ఓ చోట అతి చిప్‌గా లభిస్తుండటంతో ఐస్‌క్రీం లవర్స్ క్యూ కడుతున్నారు. కేవలం రెండు రూపాయలకే ఇష్టమైన ఐస్‌క్రీం లభిస్తుండటంతో బారులు తీరిన జనం డజన్లకొద్దీ లాగించేస్తున్నారు. అది కూడా కోన్ ఐస్ క్రీంలు కావటంతో భలే గిరాకీ నడుస్తోంది.
వివిధ కంపెనీలు వివిధ రకాల ఐస్‌క్రీమ్‌లను తయారు చేసి విక్రయిస్తున్నప్పటికీ, కోన్ ఐస్‌క్రీమ్‌ను నేటికీ ప్రజలు గొప్పగా ఆదరిస్తున్నారు. ఒక టీ 10, 12 రూపాయలకు అమ్ముడవుతున్న ఈ కాలంలో ఐస్‌క్రీం ప్రియులకు 2 రూపాయలకే కోన్ ఐస్‌క్రీం లభించడం రెట్టింపు ఆనందాన్ని కలిగిస్తుంది. ఇంత తక్కువ ధరలో ఐస్‌క్రీంలను విక్రయిస్తోంది చెన్నై మాంబళం తంబియా రెడ్డి వీధిలోని ప్రసిద్ధ ఐస్ క్రీం దుకాణం. తమ కస్టమర్లకు రెండు రూపాయలకే ఐస్ క్రీం ఇచ్చి వేసవి ఎండల్లో సంతోషాన్ని నింపుతోంది. వినూస్ ఇగ్లూ అనే ఈ ఐస్‌క్రీం పార్లర్‌ని ప్రస్తుత యజమాని వినోద్ తండ్రి 1995లో ప్రారంభించారట. అప్పట్లో వినియోగదారులను ఆకర్షించడానికి కేవలం 1 రూపాయికే కోన్ ఐస్‌క్రీం విక్రయించారట. మంచి ఆదరణ లభించడంతో ధరను 2 రూపాయలకు పెంచారు. అప్పట్నుంచి గత 12 ఏళ్లుగా ఇదే ధరకు విక్రయించబడుతుండటంతో ఈ ఐస్‌క్రీం పార్లర్ అంటే అందరికీ అభిమానమే. దీంతో ఈ పార్లర్ పశ్చిమ మాంబలం, దాని పరిసర ప్రాంతాల్లోనే కాకుండా చెన్నై అంతటా ప్రసిద్ధి చెందింది.
కానీ పునరుద్ధరణ పనులు, కార్మికుల సమస్యల కారణంగా 2008లో స్టోర్ మూతపడింది. దీంతో వేసవి వచ్చినప్పుడల్లా దుకాణం మళ్లీ తెరుచుకుంటుందని ఆశించిన వినియోగదారులు నిరాశకు గురయ్యారు. కస్టమర్లు చాలా కాలంగా ఎదురుచూస్తున్న అంచనాలను అందుకోవడానికి దుకాణం ఇప్పుడు తిరిగి తెరువబడింది. కోన్ ఐస్ క్రీమ్‌ను అదే రూ.2కి విక్రయిస్తోంది. ఇది విన్న ప్రజలు, వారి కుటుంబ సభ్యులు ప్రతిరోజూ ఈ దుకాణానికి పోటెత్తుతున్నారు. కస్టమర్ల రద్దీని అరికట్టడానికి బ్యాంకుల మాదిరిగానే ఇక్కడ కూడా టోకెన్ సిస్టమ్‌ అమలు చేస్తున్నారు. స్వచ్ఛమైన పాలనే ఐస్ క్రీం తయారీకి వినియోగిస్తున్నామని దుకాణ యజమానులు గర్వంగా చెబుతున్నారు. అయితే, ఈ తక్కువ ధరకు ఐస్ క్రీం విక్రయించటం వల్ల తనకు ఎలాంటి లాభం లేదని చెబుతున్నారు యజమాని వినోద్. కానీ, ఇతర ఉత్పత్తుల అమ్మకాలపై మార్జిన్‌తోనే తన లాభాలు చూసుకుంటామని చెబుతున్నారు.
