Telangana: స్వామి ఊపిరితో కదిలే దీపం.. వాడపల్లి నరసింహుడి గర్భగుడిలో అంతుచిక్కని అద్భుతం..

ప్రకృతి అందాలకు.. ఆధ్యాత్మిక వైభవానికి చిరునామాగా నిలుస్తోంది నల్లగొండ జిల్లా దామరచర్ల మండలం వాడపల్లి. ఒకవైపు కృష్ణమ్మ.. మరోవైపు మూసీ నది.. ఈ రెండు నదుల సంగమ తీరాన కొలువుదీరిన శ్రీ లక్ష్మీనరసింహస్వామి ఆలయం ఎంతో ప్రత్యేకం. ఇక్కడి స్వామివారి మహత్యం మాత్రం ఎంతో విశిష్టం. ఇది పంచ నరసింహ క్షేత్రాల్లో ఒకటి. శివకేశవుల అభేదాన్ని చాటే ఈ పుణ్యక్షేత్రానికి శతాబ్దాల చరిత్ర ఉందని స్థలపురాణాలు చెబుతున్నాయి. సాధారణంగా దేవుడి ముందు వెలిగించే దీపం ప్రశాంతంగా వెలుగుతూ ఉంటుంది. కానీ వాడపల్లి నరసింహుడి గర్భాలయంలోని అఖండ దీపానికి ప్రత్యేకత ఉంది. స్వామివారి సన్నిధిలో మాత్రం రెండు దీపాలు రెండు రకాలుగా కనిపిస్తాయి. స్వామి వారి ముఖానికి ఎదురుగా ఒక దీపం.. కాస్త కింద మరో దీపం ఏర్పాటు చేశారు. అందులో ముఖానికి ఎదురుగా ఉన్న దీపం నిరంతరం రెపరెపలాడుతూ కదులుతుంటే.. కింద ఉన్న దీపం మాత్రం నిశ్చలంగా వెలుగుతుంటుంది. ఈ ప్రత్యేకతను స్వామివారి ఉచ్ఛ్వాస, నిశ్వాసాలకు ప్రతీకగా భక్తులు భావిస్తారు. స్వామివారు సజీవంగా శ్వాసిస్తున్నారనే విశ్వాసంతో ఆ దీపాన్ని అత్యంత భక్తిశ్రద్ధలతో దర్శించుకుంటారు.

దీపావళి వేళ భక్తుల సందడి..

ఇక దీపావళి పండుగ రోజున వాడపల్లి ఆలయంలో ఆధ్యాత్మిక సందడి మరింత పెరుగుతుంది. చీకటిని పారద్రోలి వెలుగులు నింపే దీపావళి పర్వదినాన.. నరసింహుడి అఖండ దీపాన్ని దర్శించుకోవడం భక్తులకు ఓ ప్రత్యేక అనుభూతి. అందుకే ఏటా దీపాల పండుగ వేళ నరసింహుడి సన్నిధిలో నువ్వుల నూనె సమర్పిస్తూ.. అఖండ దీపం వెలుగుల్లో దైవదర్శనం చేసుకుంటారు. తమ ఇళ్లలోనూ సుఖశాంతులు వెల్లివిరియాలని.. కుటుంబాలు సుభిక్షంగా ఉండాలని స్వామివారిని వేడుకుంటారు. దీపం వెలుగులో లక్ష్మీనరసింహుడిని దర్శించుకోవడం తమకు ఎంతో పుణ్యప్రదమని భక్తులు విశ్వసిస్తారు.

అఖండ జ్యోతి వెనుక స్థలపురాణం..

ఈ క్షేత్రానికి సంబంధించి ఆసక్తికరమైన స్థలపురాణం ప్రచారంలో ఉంది. అగస్త్య మహాముని కృష్ణా, మూసీ నదుల సంగమ ప్రాంతానికి వచ్చి శివకేశవుల విగ్రహాలను ప్రతిష్ఠించినట్లు స్థానిక ఐతిహాసలు చెబుతున్నాయి. నరసింహస్వామివారు హిరణ్యకశిపుడిని సంహరించిన అనంతరం ఉగ్రరూపంలో ఉన్నారని.. ఆ ఉగ్రరూపంలోని ఉచ్ఛ్వాస నిశ్వాసాలకు గుర్తుగా ముఖం ముందు దీపం కదులుతుంటుందని చెబుతుంటారు. ఈ విశేషమే వాడపల్లి క్షేత్రానికి ప్రత్యేక గుర్తింపును తీసుకొచ్చింది. ఇక్కడి దీపం కేవలం వెలుగు మాత్రమే కాదు.. భక్తుల దృష్టిలో స్వామివారి సాన్నిధ్యానికి ప్రతీక. వెలుగుల పండుగకు ఆధ్యాత్మిక శోభను అద్దుతున్న వాడపల్లి అఖండ దీపం.. భక్తుల విశ్వాసానికి నిత్య ప్రతీకగా నిలుస్తోంది.